កីឡាអូឡាំពិកក្រុងប៉ារីស២០២៤ បើកសម្ពោធផ្លូវការ នៅថ្ងៃនេះ
ប្រទេសបារាំង បានរៀបចំព្រឹត្តិការណ៍កីឡាអូឡាពិក ចំនួន២ដងរួចមកហើយ។ ម្តង នៅឆ្នាំ១៩០០ ហើយលើកទី២ នៅឆ្នាំ១៩២៤។ មួយសតវត្សរ៍ក្រោយមក បារាំងមានឱកាសធ្វើជាម្ចាស់ផ្ទះរៀបចំព្រឹត្តិការណ៍កីឡាពិភពលោកនេះជាថ្មី ដែលត្រូវចាប់ផ្តើមសម្ពោធ នៅល្ងាចថ្ងៃទី២៦ ខែកក្កដា ឆ្នាំ២០២៤នេះ នៅកណ្តាលទីក្រុងប៉ារីស។
ចុះផ្សាយនៅថ្ងៃ៖ កែប្រែថ្ងៃទី៖
ការប្រកួតកីឡាអូឡាំពិករដូវក្តៅ លើកទី៣៣ នេះ ជាលើកដំបូងបំផុតក្នុងប្រវត្តិសាស្ត្រនៃកីឡាអូឡាំពិក ដែលកម្មវិធីបើកសម្ពោធផ្លូវការ ត្រូវគេរៀបចំនៅបរិវេណខាងក្រៅពហុកីឡាដ្ឋាន។ ពិធីសម្ពោធកីឡាអូឡាពិក២០២៤ នឹងប្រារព្ធឡើងនៅកណ្តាលទីក្រុងប៉ារីសតែម្តង តាមដងទន្លេសែន។
ស្ពានអូស្ទែរលីត្ស (Pont d’Austerlitz) ជាកន្លែងចំណុចចាប់ផ្តើម នៃ ក្បួនដង្ហែទូក ក្នុងព្រឹត្តិការណ៍កីឡាអូឡាំពិក។ កម្មវិធីផ្លូវការ ចាប់ផ្តើមនៅម៉ោង ៧ កន្លះល្ងាចម៉ោងនៅក្រុងប៉ារីស ត្រូវនឹងម៉ោង១កន្លះយប់ ម៉ោងនៅស្រុកខ្មែរ។
តាមគម្រោងនៅម៉ោង៨និង៤៥នាទីយប់ មានក្បួនដង្ហែទូកធំៗ មានប្រមាណជា ៨៥ ត្រូវដឹកប្រតិភូកីឡា និងកីឡាករ មកពីគ្រប់ជ្រោយនៃពិភពលោក ចំនួនជា ៧ ០០០ នាក់។ សូមជ្រាបថា កីឡាករអូឡាំងពិកដែលមកប្រកួតនៅបារាំងលើកនេះ មានចំនួន ១០ ៥០០ នាក់ ក៏ប៉ុន្តែ មានប្រហែលជា ៦ ទៅ ៧ ពាន់នាក់ ប៉ុណ្ណោះ ដែលត្រូវចូលរួមដង្ហែក្បួនទូក បើកឆាកនៅល្ងាចនេះ។
តាមទម្លាប់ជាប្រពៃណី ក្បួនទូកសម្រាប់កីឡាករក្រិក នឹងត្រូវចាប់ផ្តើមចេញដំណើរមុនគេ។ មុនគេ ក៏ព្រោះប្រទេសក្រិក ជាប្រភពកំណើតដើមរបស់កីឡាអូឡាំពិក។ ចំណែកឯ ទូករបស់កីឡាករតំណាងបារាំង ជាម្ចាស់ផ្ទះ ត្រូវចេញទៅក្រោយគេបង្អស់។ ក្បួនទូករាប់សិបគ្រឿងទាំងនោះ នឹងបណ្តែតខ្លួន បង្អួតបង្ហាញរាង បណ្តោយតាមទន្លេសែន ចាប់ពីស្ពានស្ពានអូស្ទែរលីត្ស រហូតដល់ស្ពានឌ្យេណា (Pont d’Iéna) ចម្ងាយប្រមាណ ៦ គីឡូម៉ែត្រ ។
តាមដងទន្លេកន្លែងអមសងខាង មានរៀបចំឆាកពិធីសម្តែងសិល្បៈ និងកន្លែងអង្គុយសម្រាប់ទស្សនិកជននិងថ្នាក់ដឹកនាំ។ សិល្បករជាង ២ ពាន់នាក់ ចូលរួមសម្តែង។ តារាចម្រៀងលំដាប់ពិពភលោកជាច្រើននាង នឹងចូលខ្លួនមកកំដរបរិយាកាសនៅរាត្រីនេះ តួយ៉ាង អ្នកនាង សេលីន ឌីយ៉ុង (Céline Dion) និង នាង ឡេឌី ហ្កាហ្កា (Lady Gaga) ជាដើម។ តារាចម្រៀងបារាំង អ្នកនាង អាយ៉ា ណាកាមួរ៉ា (Aya Nakamura) និងបង្ហើរសំនឿងបទចម្រៀងមនោសញ្ចេតនាដ៏ល្បីរបស់អ្នកចម្រៀងជើងចាស អេឌីត ពីយ៉ាហ្វ ( Edith Piaf) ក្រោមចំណងជើងថា La vie en rose។
គប់ភ្លើងអូឡាំពិក នឹងត្រូវគេយកទៅដល់ Tour Eiffel ប្រហែលម៉ោង ១១ យប់។ មានបទអន្តរាគមន៍ជាបន្តបន្ទាប់របស់ លោក តូនី អេស្តង់ហ្កេត៍ ( Tony Estanguet) ប្រធានគណៈកម្មការអូឡាំពិកបារាំង និងលោក តូម៉ាស់ បាក (Thomas Bach) ប្រធានគណៈកម្មការអូឡាំពិកអន្តរជាតិ។ តទៅទៀត លោកប្រធានាធិបតីបារាំង អេម៉ានុយអែល ម៉ាក្រុង ធ្វើសុន្ទរកថាខ្លី ប្រកាសបើកព្រឹត្តិការណ៍អូឡាំពិក ផ្លូវការ នៅពេលនោះតែម្តង។
ភ្លើងរំលេចពណ៌ប្លែកៗយ៉ាងប្រណិត នឹងត្រូវបាញ់បញ្ចាំងឡើង យ៉ាងច្រើនសន្ធឹកសន្ធាប់នារាត្រីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ