Фәрит Хатыйпов (1948)

Фәрит Хатыйпов
Туган телдә исем	Фәрит Кәнәфи улы Хатыйпов
Туган	1 гыйнвар 1948(1948-01-01) (76 яшь) СССР, РСФСР, ТАССР, Теләче районы, Югары Кибәхуҗа
Милләт	татар
Ватандашлыгы	Русия
Әлма-матер	Казан музыка көллияте
Һөнәре	музыкант, концертмейстер-аккомпаниатор, композитор.
Эш бирүче	Габдулла Тукай исемендәге Татар дәүләт филармониясе
Җефет	Рабига Сибгатуллина

Фәрит Хатыйпов, Фәрит Кәнәфи улы Хатыйпов (1948 елның 1 гыйнвары, СССР, ТАССР, Теләче районы, Югары Кибәхуҗа) ― музыкант, концертмейстер-аккомпаниатор, композитор, Татарстан Республикасының атказанган сәнгать эшлеклесе һәм халык артисты (2013).

Биографиясе

Фәрит Хатыйпов 1948 елның 1 гыйнварында Татарстан АССРның Теләче районы Югары Кибәхуҗа авылында туган. Габдулла Тукай исемендәге Татар дәүләт филармониясенә Фәрит Хатыйпов 1972 елда, Казан музыка училищесын тәмамлаганнан соң, җитлеккән музыкант, баянчы буларак килә.

Иҗаты

Ф.Хатыйповның җырларын профессиональ башкаручылар гына түгел, һәвәскәрләр дә яратып башкара. Бигрәк тә аның "Һаман яратам" (Зөлфәт шигыре), "Синең елмаюың" (Х.Туфан шигыре), "Гөлнарым" (Г.Афзал шигыре), "Авыл кызы" (Д.Хәбибуллин шигыре), "Сау бул инде" (Р.Валиев шигыре)" Җилфел-җилфер җил искәндә" (Ә.Ерикәй шигыре), "Моңлану" (Ф.Сафин шигыре), "Туган ягым Теләче" (А.Сабиров шигыре), "Миләүшә" (М.Хөсәен шигыре), "Тәрәзәңдә утың бар" (Н.Акмал шигыре), "Яңа Бүләк" (М.Миншин шигыре), "Чык юлларга" (Ф.Яруллин шигыре), "Яз җыры" (Ф.Шәфигуллин шигыре), “'Шулай шул" (Р.Миңнуллин шигыре), һ.б. җырлары аның иҗатының узенчәлекләрен билгели торган матур җырлар.

Ф.Хатыйпов "Һаман яратам" исемле үзенең 127 җырын үз эченә алган беренче җырлар җыентыгын 1998 елда бастырып чыгарды, 106 җырдан торган "Моңлану" дип аталган икенче китабы 2003 елда дөнья курде, "Парлы гашыйк" исемле 151 җырдан торганы 2008 елда чыкты, дүртенче "Синең нурың" дигән китап 100 җырдан тора; 150 җырны эченә керткән бишенче китапта Ф.Хатыйповның соңгы еллардагы иҗаты тупланган.

Ф.Хатыйпов яшь музыкантларны табу, барлау җәһәтендә, төрле мәктәпләр белән тыгыз элемтәдә яши. Озак еллар буе ул Казан шәһәренең 10 нчы татар интернат мәктәбе укучыларын үз канаты астына алып хезмәттәшлек итә, төрле эчтәлектәге концерт-кичәләр оештыра. Үсеп килүче яшь буынга музыкага мәхәббәт тәрбияләнгән әлеге лекция - концертларында ул татар халык уен кораллары тарихын һәм халык иҗаты үрнәкләрен җиткерә.

Бүләкләре

• 1987 елда Мәскәүдә узган II Бөтенсоюз халык иҗаты фестивале лауреаты
• 1994 елда "Балалар җыры - 1993-1994" конкурсы лауреаты
• 2001 елда "Татар җыры-2001" телевизион конкурсы лауреаты
• Музыка сәнгатенә зур өлеш керткәне өчен 1993 елда "Татарстан Республикасының атказанган сәнгать эшлеклесе" мактаулы исеме
• 2013 ― Татарстанның халык артисты

Чыганаклар

• Арское землячество