Gemeng Colmer-Bierg

Gemeng Colmer-Bierg
Gemeng Colmer-Bierg
	d'Märei vu Colmer-Bierg
An anere Sproochen	fr: Colmar-Berg; de: Colmar-Berg
Land	Lëtzebuerg
Kanton	Kanton Miersch
Chef-lieu	Colmer
Buergermeeschter	Mandy Arendt (PPLU)
Awunner	2.429
	1. Januar 2024
Fläch	1.231 ha
Héicht	201 m
Koordinaten	49° 48’ 42’’ N; 06° 05’ 32’’ O
LAU-Code	LU0401
Websäit	https://colmar-berg.lu/

D'Gemeng Colmer-Bierg ass eng vun den 100 lëtzebuergesche Gemengen. Se läit am Kanton Miersch. De Chef-lieu vun der Gemeng ass d'Uertschaft Colmer.

Uertschaften an der Gemeng

D'Gemeng Colmer-Bierg setzt sech aus den Uertschafte Bierg, Colmer a Welsdref zesummen.

Geschicht

Duerch Gesetz vum 25. Mäerz 1991 gouf den Numm vun der Gemeng vu Berg op Colmar-Berg geännert^[1].

Häre vu Bierg

Am 16. Joerhonnert gouf et zu Bierg en etlech grouss Proprietéite mat Schlässer. De gréissten Deel dovu war an den Hänn vun der Famill Von der Horst, déi ëm 1615 der Koppel Von Heisgen-Woordt alles verkaaft huet. Deenen hiert Kandskand de Johann Gerhard von Heisgen huet nach en etlech Terrainen derbäikaaft. Him ass d'Parkierch, déi 1744 gebaut gouf, ze verdanken. Deemools huet Bierg zur Par Biissen gehéiert, bis et 1803 eng eege Par gouf.

De Johann von Heisgen a seng Fra d'Marie-Anne de Moreau haten zwee Meedercher, d'Maria Klara Gisberta (*1719) an d'Maria Gisberta Johanna (*1722).

D'Maria Klara hat sech mat engem franséische Kapitän, dem Antoine Leclerc de Vrainville aus dem Herzogtum Bar a Loutrengen bestuet. Si hat d'Herrschaft Bierg geierft, an d'Gisberta déi sech mat dem Jean-Baptiste Thierry de Saint-Baussant bestuet huet, hat Folkendeng kritt hat.

Den de Vrainville huet op groussem Fouss gelieft, a lues a lues d'Verméige verpolvert an nach e Pak Schold derbäigemaach. Besonnesch vill Schold hat hie bei der Maria Gisberta vu Blochausen, der Besëtzerin vun der Colmer Schmelz. 1764 koum sou déi ganz Proprietéit an d'Hänn vun der Famill vu Blochausen.

Wopen

	Beschreiwung am Originaltext: D'argent à l'aigle de sable accompagnée en chef, aux flancs et en pointe de cinq trèfles de sinople posés 2-2-1; au chef d'azur chargé d'une couronne grand-ducale d'or. D.C. 15. Dezember 1988 Projet: Marcel Lenertz 1983

Armoiries adoptées par le conseil communal dans sa séance du 15 décembre 1988. Projet : M. Lenertz en 1983

Entwécklung vun der Awunnerzuel

Quell:STATEC

Politik

Buergermeeschteren

00Dëst Kapitel ass nach eidel oder onvollstänneg. Hëlleft wgl. mat, fir et ze komplettéieren.

1815-1821: Jean-Baptiste Papier^[2]
1844: Mathias Maillet^[3]
...
1994-2011: Fernand Diederich
2011-2017: Gast Jacobs
2017-2023: Christian Miny
zanter 2023: Mandy Arendt (PPLU)

Ekonomie

En Ofleeër vum amerikanesche Pneuefabrikant Goodyear Tire & Rubber Company, d'Goodyear-Dunlop Colmar-Berg, gehéiert mat 3.570 Aarbechter zu de gréisste Patronen zu Lëtzebuerg.^[4] Zanter 1957 huet d'Goodyear zu Colmer-Bierg en Technical Center, dee virun allem Pneue fir den europäesche Maart entwéckelt. Donieft ginn zu Colmer-Bierg an der Pneuefabréck och nach Camionspneuen a Sécherheetspneue produzéiert.

Infrastrukturen

Zu den Infrastrukture vu Colmer-Bierg zielen:

e Centre culturel
eng Sportshal
3 Foussballsterrainen
5 Tennisterrainen (5-mol French Court)
en ëffentleche Park
eng Gare (d'Gare Colmer-Bierg)
e Scoutschalet
eng Kierch
eng Post

eng Schoul

Colmer-Bierg huet ee Précoce, eng Spillschoul, eng Grondschoul an eng Maison relais. 2005 gouf de Bau vun engem neie Schoulkomplex mat 4 Klassesäll fir d'Spillschoul, 2 Klassesall fir de Précoce an engem Schoulrestaurant beschloss. Dëse Schoulkomplex, deen 6.429.475 € kascht huet, gouf fir d'Rentrée 2008/2009 fäerdeg.

eng Schwämm

D'Schwämm Nordpool vu Colmer-Bierg huet een Haaptbaseng vun 25x10m an een Niewebaseng vun 10x10m. D'Schwämm war tëscht August 2009 a Mëtt 2011 zou well en neie Komplex mat Wellness-Beräich bäigebaut an den alen Deel komplett renovéiert gouf. Den Devis gouf op 11.319.816 € chiffréiert, wouvun de Sportsministère 4,5 Millioune bezuele sollt, a Colmer-Bierg 850.000 €. Der Rescht vun de Käschte gouf op déi aner 7 Gemenge verdeelt, deenen hir Schoulklasse vun der Schwämm profitéieren, an zwar am Verhältnes zu de Stonnen déi se fir sech reservéiert hunn. D'Soumissioun fir d'Aarbechte gouf den 21. Juni 2010 op der Colmer Gemeng opgemaach.

Verkéier

Stroosseverkéier

Colmer-Bierg ass un de Stroosseverkéier ugeschloss iwwer d'Autobunn A7, d'Schnellstrooss B7, d'Nationalstroossen N7 an N22, an d'Chemin reprisen CR345 an CR123.

Ëffentlechen Transport

Eisebunn

Duerch d'Colmer Gare fiert d'CFL-Linn 1 Lëtzebuerg-Ëlwen.

Et gëtt nach eng Eisebunnslinn vun Ettelbréck iwwer Colmer bis op Biissen, déi fréier zu der Atertlinn gehéiert huet. Dës Linn gëtt nëmmen nach geleeëntlech fir Giddertransport benotzt.

Bussen

Colmer gëtt och vun enger Rëtsch RGTR-Buslinnen ugefuer.

Duuss Mobilitéit

Ënnert der Uelzechtbréck (N7) kräize sech d'Vëlospist PC15, déi Bäreldeng mat Ettelbréck verbënnt, souwéi d'PC12, déi sech Richtung Westen (zu Näerden) mat der PC17 kräizt.

Veräiner

Colmer-Bierg huet 18 Veräiner, dorënner 6 Sportsveräiner:

Action catholique des femmes du Luxembourg
Association des parents
Chorale St. Cécile
Club des jeunes
Croix-Rouge
Football ASC
Frënn vum Velo Colmar-Berg
Goodyear Fëscherclub
Goodyear Photoclub Colmar-Bierg
Harmonie grand-ducale Orania
Indiaca
Seniorenclub 2006 asbl Colmar-Berg
Service d'incendie de la commune de Colmar-Berg
Société gymnastique Alouette
Supporterclub ASC
Syndicat d'initiative
Tennis Club

Partnerstad

Zanter 2004 ass Colmer-Bierg d'Partnerstad vu Weilburg an Däitschland. Colmer-Bierg ass d'Residenz vum Lëtzebuerger Herrscherhaus, dat vu Weilburg kënnt.

Perséinlechkeeten aus der Gemeng Colmer-Bierg

Prinzessin Alix vu Lëtzebuerg (1929-2019),
Frantz Heldenstein (1892-1975), Sculpteur an Innenarchitekt,
Groussherzog Jean vu Lëtzebuerg (1921-2019),
Prënz Charles vu Lëtzebuerg (1927-1977),
Groussherzogin Charlotte (1896-1985),
Prinzessin Élisabeth vu Lëtzebuerg (1922-2011),
Prinzessin Hilda vu Lëtzebuerg (1897-1979),
Groussherzogin Marie-Adélaïde (1894-1924),
Prinzessin Marie-Gabrielle vu Lëtzebuerg (1925-2023),
Prinzessin Sophie vu Lëtzebuerg (1902-1941),
Prinzessin Marie-Adélaïde vu Lëtzebuerg (1924-2007).

Interkommunal Syndikater

D'Gemeng ass Member vu follgenden interkommunale Syndikater:

Kuckeswäertes

Fotoalbum

Gemengenhaus
De Park
D'Uelzecht beim Park
Schlass Bierg
Gare Colmer-Bierg
D'Atertlinn

Kuckt och

Um Spaweck

Commons: Colmer-Bierg – Biller, Videoen oder Audiodateien

Referenzen

↑ Loi du 25 mars 1991 portant modification du nom de la commune de Berg en celui de Colmar-Berg. legilux.public.lu (30.04.1991). Gekuckt de(n) 19.07.2020.
↑ Buch "La famille PAPIER, Famille de Mme de MUNKACSY" vum Dr. Jean-Claude Loutsch
↑ ARRÊTÉ ROYAL GRAND-DUCAL, du 29 décembre 1843, n°2926f, portant nomination des Bourgmestres et Echevins des villes, et des Bourgmestres des campagnes du Grand-Duché am Memorial N°3 vun 1844
↑ Luxembourg en chiffres 2021. STATEC. Gekuckt de(n) 21 November 2021.

[1] Loi du 25 mars 1991 portant modification du nom de la commune de Berg en celui de Colmar-Berg. legilux.public.lu (30.04.1991). Gekuckt de(n) 19.07.2020.

[2] Buch "La famille PAPIER, Famille de Mme de MUNKACSY" vum Dr. Jean-Claude Loutsch

[3] ARRÊTÉ ROYAL GRAND-DUCAL, du 29 décembre 1843, n°2926f, portant nomination des Bourgmestres et Echevins des villes, et des Bourgmestres des campagnes du Grand-Duché am Memorial N°3 vun 1844

[4] Luxembourg en chiffres 2021. STATEC. Gekuckt de(n) 21 November 2021.

[1]

[2]

[3]

[4]