អេត្យូពី៖ អាចមានស្លាប់ដល់៥០០នាក់ ដោយគ្រោះមហន្តរាយបាក់ដី
នៅប្រទេសអេត្យូពី មានករណីគ្រោះមហន្តរាយបាក់ដី លាយឡំដោយភក់ល្បប់ បានកើតឡើងកាលពីថ្ងៃចន្ទ ទី២២កក្កដាកន្លងទៅ។ គិតត្រឹមថ្ងៃព្រហស្បតិ៍ មហន្តរាយនេះបានផ្តាច់ជីវិតមនុស្ស២៥៧នាក់។ តែយោងតាមអង្គការសហប្រជាជាតិ ចំនួនមនុស្សស្លាប់អាចនឹងឡើងដល់៥០០នាក់យ៉ាងហោច ព្រោះថានៅមានមនុស្សបាត់ខ្លួនជាច្រើនរយនាក់ ដែលក្រុមសង្គ្រោះនៅពុំទាន់រកឃើញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៧
ករណីបាក់ដីភ្នំលាយឡំដោយភក់ល្បប់ បានកើតឡើងនៅថ្ងៃចន្ទទី២២កក្កដា នៅតំបន់ភ្នំដាច់ស្រយ៉ាល ភាគខាងត្បូងអេត្យូពី។ ទីភ្នាក់ងារមនុស្សធម៌នៃអង្គការសហប្រជាជាតិ ហៅកាត់ថា Ocha បានចេញតួលេខបណ្តោះអាសន្ននៅថ្ងៃព្រហស្បតិ៍ថា យ៉ាងហោចណាស់ មានមនុស្ស២៥៧នាក់បានស្លាប់ ដោយសារតែដីភក់បាក់សង្កត់លើ។ តែទន្ទឹមនេះ ចំនួនអ្នកស្លាប់ អាចឡើងដល់៥០០នាក់យ៉ាងហោច ខណៈប្រតិបត្តិការរុករកសាកសពនិងអ្នកបាត់ខ្លួននៅតែបន្ត។
លោក Paul Handley ប្រធាន Ocha ប្រចាំអេត្យូពី បានលើកឡើងថា ក្រុមសង្គ្រោះពិបាកនឹងធ្វើប្រតិបត្តិការនៅតាំងរងគ្រោះខ្លាំងណាស់ ដោយសារតែជាតំបន់ភ្នំដាច់ស្រយ៉ាល ដីភក់រអិល គ្មានផ្លូវធ្វើដំណើរ ពិបាកក្នុងការបញ្ជូនគ្រឿងចក្រធំៗ ទៅកកាយដីសង្គ្រោះមនុស្សឲ្យទាន់ពេលវេលា។
ទីភ្នាក់ងារមនុស្សធម៌នៃអង្គការសហប្រជាជាតិបានឲ្យដឹងផងដែរថា រដ្ឋាភិបាលអេត្យូពី ដោយសហការជាមួយមន្ត្រីមូលដ្ឋាន បានជម្លៀសមនុស្សចំនួនជាង១៥៥០០នាក់ ចេញពីតំបន់ ដែលស្ថិតនៅក្បែរតំបន់កើតហេតុ ព្រោះអាចប្រឈមនឹងករណីបាក់ដីជាថ្មីទៀត។ ក្នុងចំណោមមនុស្សដែលគេជម្លៀសចេញ ពីមាន១៣២០នាក់ជាកុមារ អាយុក្រោម៥ឆ្នាំ និងស្ត្រីមានផ្ទៃពោះឬបំបៅដោះកូនចំនួន៥២៩៣នាក់
ទឹកភ្លៀងបានធ្លាក់យ៉ាងគំហុក កាលពីថ្ងៃអាទិត្យ ហើយបានបណ្តាលឲ្យដីភ្នំមួយផ្ទាំងធំ បាក់សង្កត់ផ្ទះប្រជាជននៅ ព្រឹកថ្ងៃចន្ទ។ បន្ទាប់មកទៀត ដីល្បប់ភក់ផ្សេងទៀត បានហូរសង្កត់ផ្ទះសំបែងនិងកប់ប្រជាជនជាច្រើនរយនាក់។ ជាមួយនឹងចបជីកចបកាប់ និងខ្លះមានតែដៃទទេ អ្នកភូមិបានព្យាយាមកាប់គាស់កកាយដីដើម្បីស្វែងរកជនរងគ្រោះ។ គិតត្រឹមថ្ងៃព្រហស្បតិ៍ ជំនួយមនុស្សធម៌បានចាប់ផ្តើមទៅដល់ហើយ ដោយអង្គការកាកបាតក្រហម និងទីផ្នាក់ងារផ្សេងៗទៀតនៃអង្គការសហប្រជាជាតិ បានចាប់ចែកទៅឲ្យប្រជាជនរងគ្រោះ។
គួរបញ្ជាក់ថា អេត្យូពីដែលមានប្រជាជនប្រមាណ១២០លាននាក់ គឺជាប្រទេសអេហ្វ្រិកធំជាងគេទី២ ដែលមានប្រជាជនច្រើនជាងគេបង្អស់។ ជាធម្មតា ១៨%នៃប្រជាជនអេត្យូពី ពោលគឺប្រមាណជាង២១,៤លាននាក់ រស់រំពឹងនឹងជំនួយស្បៀងអាហាររួចទៅហើយ ហើយក្នុងនោះ ៤,៥នាក់ ត្រូវបង្ខំចិត្តធ្វើបំលាស់ទីចោលផ្ទះសំបែង ដោយសារតែជម្លោះប្រដាប់អាវុធ និងវិបត្តិអាកាសធាតុ។
គួរកត់សំគាល់ដែរថាតំបន់នៅភាគខាងត្បូងអេត្យូពី តែងតែរងគ្រោះដោយគ្រោះមហន្តរាយបាក់ដី នៅរដូវភ្លៀងចាប់ពីខែមិថុនា ដល់ខែកញ្ញា។ កាលពីឆ្នាំទៅមិញ ករណីដូចគ្នានេះបានផ្តាច់ជីវិតមនុស្សជាង២០នាក់។ កាលពីខែមេសា-ឧសភាកន្លងទៅនេះ តំបន់ភាគខាងត្បូងអេត្យូក៏បានរងគ្រោះដោយទឹកជំនន់ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ