លោក ចូ បៃដិន ដកខ្លួនដើម្បីសង្គ្រោះប្រជាធិបតេយ្យនិងផ្តល់ឱកាសដល់អ្នកបន្តវេនវ័យក្មេង
ប្រធានាធិបតីសហរដ្ឋអាមេរិក ចូ បៃដិន មានប្រសាសន៍ថា លោកដកបេក្ខភាពចេញពីការប្រកួតប្រជែងបោះឆ្នោតប្រធានាធិបតី ពីព្រោះដើម្បីជួយសង្គ្រោះលទ្ធិប្រជាធិបតេយ្យ ព្រមទាំង ទុកកន្លែងនិងសំឡេងឲ្យយុវជនជាន់ថ្មីបន្តវេន។ នេះជាការធ្វើសុន្ទរកថាពន្យល់ ជាលើកទី១របស់លោក ចូ បៃដិន ក្រោយងើបពីឈឺជំងឺកូវីដ១៩។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២៣
ក្នុងសារថ្លែងទៅកាន់ប្រជាជាតិ នៅថ្ងៃទី២៤កក្កដា ប្រធានាធិបតីសហរដ្ឋអាមេរិក ចូ បៃដិន អះអាង ថាលោកដកខ្លួនពីការប្រកួតបោះឆ្នោតអាណត្តិថ្មី ដើម្បីប្រទេសសហរដ្ឋអាមេរិក។ ពោលគឺក្នុងគោលបំណង ដើម្បីបង្រួបបង្រួមជាតិ និងដើម្បីការពារប្រយោជន៍គណបក្សប្រជាធិបតេយ្យ ហើយនិងទុកឱកាសដល់យុវជនជាន់ថ្មី ឲ្យគេបញ្ចេញសំឡេងថ្មី បញ្ចេញសមត្ថភាពបម្រើប្រទេសជាតិ បន្តពីរូបលោក។ សំឡេងយុវជនថ្មី ដែលលោកចង់សំដៅដល់នោះ គឺគ្មាននរណាផ្សេង ក្រៅពីលោកស្រី ខាម៉ាឡា ហារីស អនុប្រធានាធិបតី ដែលមានវ័យត្រឹមតែ ៥៩ ឆ្នាំ នោះឡើយ។ បើតាមប្រសាសន៍របស់លោក បៃដិន, លោកស្រី ខាម៉ាឡា ហារីស ជាមេដឹកនាំស្រីឆ្នើម មានបទពិសោធច្រើន និងពោរពេញដោយសមត្ថភាព។
«ប៉ុន្មានសប្តាហ៍មកនេះ ខ្ញុំកាន់តែយល់ច្បាស់ថា ខ្ញុំចាំបាច់ត្រូវតែបង្រួបបង្រួមគណបក្សរបស់ខ្ញុំ ក្នុងស្ថានភាព១ដ៏លំបាកដូច្នេះ។ ខ្ញុំប្រាកដក្នុងចិត្តថា តាមរយៈសមិទ្ធផលស្នាដៃក្នុងនាមជាប្រធានាធិបតី, ក្រោមការដឹកនាំរបស់ខ្ញុំ និងទស្សនវិស័យរបស់ខ្ញុំចំពោះអនាគតសហរដ្ឋអាមេរិក, គឺរូបខ្ញុំសក្តិសមបំផុត នឹងត្រូវឈរឈ្មោះអាណត្តិទី២។ ក៏ប៉ុន្តែ ដើម្បីសង្គ្រោះលទ្ធិប្រជាធិបតេយ្យអាមេរិក ខ្ញុំត្រូវតែដកមហិច្ឆតាផ្ទាល់ខ្លួនទុកមួយឡែកសិន។
អាស្រ័យហេតុនេះ ខ្ញុំសម្រេចចិត្តថា ខ្ញុំត្រូវផ្តល់ឱកាសទៅអ្នកជំនាន់ថ្មីបន្តវេន ដែលនេះជាផ្លូវដ៏ប្រសើរបំផុត ដើម្បីបង្រួបបម្រួមជាតិយើង។ ខ្ញុំដឹងថា គេអាចមានឱកាសនិងពេលវេលាយូរអង្វែងដើម្បីកាន់តួនាទីក្នុងមុខតំណែងនយោបាយសាធារណៈ តែខ្ញុំយល់ថា ខ្ញុំត្រូវតែផ្ទេរតំណែងទៅឲ្យមនុស្សជំនាន់ថ្មី សំឡេងថ្មី ជាចាំបាច់ ក្នុងកាលៈទេសៈនេះ។»
ក្នុងអាណត្តិដឹកនាំប្រទេស ដែលនៅសល់ប៉ុន្មានខែទៅមុខទៀតនេះ លោក ចូ បៃដិន បញ្ជាក់ថានឹងប្រឹងប្រែងជំរុញលើកម្ពស់កម្រិតជីវភាពពលរដ្ឋ និងបង្កើនសន្ទុះសេដ្ឋកិច្ច ព្រមទាំងបន្តតស៊ូការពារសិទ្ធសេរីភាពពលរដ្ឋ ចាប់ពីសិទ្ធិបោះឆ្នោត រហូតដល់សិទ្ធិជ្រើសរើស។ លោក បៃដិន ក៏អំពាវនាវឲ្យលុបបំបាត់ភាពស្អប់ខ្ពើមរើសអើង និងជ្រុលនិយម ហើយនិងត្រូវបញ្ជាក់ឲ្យកាន់តែច្បាស់ថា អំពើស្អប់ខ្ពើមរើសអើងជ្រុលនិយម មិនត្រូវមាននៅសហរដ្ឋអាមេរិកឡើយ។ អាមេរិក ជាទីដែលគ្មានអំពើហិង្សានយោបាយនិងគ្មានហិង្សាជាទូទៅ។ នេះបើតាមលោក បៃដិន ដោយបញ្ជាក់ថា លោកខំខ្នះខ្នែងទៀត ដើម្បីលុបបំបាត់អំពើហិង្សានិងប្រើកាំភ្លើងនៅតាមបណ្តាសាលារៀន។
ប្រធានាធិបតីអាមេរិកជិតផុតអាណត្តិរូបនេះ បង្ហាញចេតនាចង់ធ្វើសំណើកែទម្រង់តុលាការកំពូលអាមេរិក។ ពេលវេលាដែលសេសសល់ប្រមាណជាជិត៦ខែ លោកថានឹងបន្តដឹងនាំអាមេរិក ដើម្បីឲ្យអាមេរិកខ្លាំងក្លា រក្សាភាពជាមេដឹកនាំពិភពលោកសេរី។ ក្នុងវ័យជាង៨១ឆ្នាំហើយ លោក ចូ បៃដិន អះអាងបន្តធ្វើការដើម្បីពង្រីងអង្គការសម្ព័ន្ធអូតង់ ឲ្យកាន់តែខ្លាំង ហើយនិងសន្យាធ្វើការថែមទៀត ដើម្បីបញ្ចប់សង្គ្រាមហ្កាហ្សា ដោះលែងចំណាប់ខ្មាំង និងកសាងសន្តិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ