Нәсим Акмал

Нәсим Акмал
Туган телдә исем	Нәсим Рәшит улы Акмалов
Туган	1 июль 1960(1960-07-01) (64 яшь) СССР, РСФСР, ТАССР, Сарман районы, Каташ-Каран
Милләт	татар
Ватандашлыгы	СССР→ РФ
Һөнәре	радиожурналист, публицист
Ата-ана	Әхмәтрәшит Әкмәлетдин улы (әти) Хәлимә Шиһап кызы (әни)
Бүләк һәм премияләре

Нәсим Акмал, Нәсим Рәшит (Әхмәтрәшит) улы Акмалов (1960 елның 1 июле, СССР, РСФСР, ТАССР, Сарман районы, Каташ-Каран) ― радиожурналист, публицист, «Татарстан» радиосының шеф-мөхәррире, «Казан утлары» журналының «Газиз тавышлар» сәхифәсенең даими алып баручысы. Татарстан Республикасы Журналистлар берлеге әгъзасы (1995). Татарстанның атказанган мәдәният хезмәткәре (2010).

Тәрҗемәи хәле

1960 елның 1 июлендә Татарстан АССР Сарман районы Каташ-Каран авылында дин әһелләре нәселеннән булган укытучы гаиләсендә бишенче бала булып туган. Әтисе, сугыш ветераны Рәшит (Әхмәтрәшит) Әкмәлетдин улы — математика, әнисе Хәлимә Шиһап кызы татар теле һәм әдәбияты укытучылары булган. Бертуган абыйсы ― шагыйрь Нияз Акмал (1954―2007). Шәҗәрәсе: Бикмәт авылыннан Каташ-Каран мәчетенә күчерелгән Афзалетдин Хәбибулла улы (1852―1897) → Әкмәлетдин Афзалетдин улы (1884―1919) → Әхмәтрәшит Әкмәлетдин улы (1919―1984). Каташ-Каран сигезьеллык (1975), Сарман урта (1977) мәктәпләрен, Казан дәүләт мәдәният институтын (1982) тәмамлаган. Диплом алгач, 1982―1989 елларда ― Яңа Бүләк авылы (хәзерге Тукай районы), Мөслим районы Мөслим (1984 елдан), Сарман районы Сарман (1985―1988) мәдәният йортлары директоры.

1989 елдан Казанда. Татарстан телевидениесендә ― музыкаль тапшырулар мөхәррире, «Татарстан» радиосының әдәбият-сәнгать бүлеге мөхәррире.

1991 елдан «Татарстан» телерадиокомпаниясенең Чаллы төбәгендәге үз хәбәрчесе. 1993 елда, җирле телевидениене оештыру өчен, Алабугага чакырыла.

1995 елдан яңадан Казанда. «Татарстан» радиосында сәяси тапшырулар мөхәррире, «Татар-информ» мәгълүмат агентлыгының баш мөхәррире урынбасары, «Шәһри Казан», «Мәгърифәт» газеталарында бүлек мөдире. ТР Фәннәр академиясенең Татар энциклопедиясе институтында өлкән фәнни хезмәткәр, «Идел», «Салават күпере» журналларында бүлек җитәкчесе булып эшли.

2007 елның апреленнән ― «Татарстан» радиосында мөхәррир, 2014 елдан ― әдәбият-сәнгать тапшырулары редакциясенең баш мөхәррире, «Татарстан дулкынында» тапшыруы мөхәррирләренең берсе.

Хәзерге вазыйфасы ― «Бөтенроссия дәүләт телевидение һәм радиотапшырулар компаниясе» ФДУП филиалы «Татарстан «дәүләт телевизион һәм радиотапшырулар компаниясе радиотапшырулар хезмәтенең әдәби-драматик, музыкаль һәм балалар программалары төркеме шеф-редакторы.

Әдәби иҗат белән мәктәптә укыган елларында ук шөгыльләнә башлаган. Шигырьләре республика балалар матбугатында басылган. Казанда эшләгәндә «Идел», «Мәдәни Җомга», «Шәһри Казан»да хикәяләре, шигырьләре, балладалары басылган. Татарстан радиосында яңгыраучы күп санлы радиоспектакьләр аның тарафыннан язылган.

Бүләкләре, мактаулы исемнәре

• 2010 – Татарстанның атказанган мәдәният хезмәткәре
• 2020 – «Фидакарь хезмәт өчен» медале – күпьеллык нәтиҗәле хезмәте һәм республиканың массакүләм мәгълүмат чараларын үстерүгә керткән өлеше өчен

Әдәбият

• Акмалов Нәсим Рәшит улы / Сарман районы энциклопедиясе (төзүче Дамир Гарифуллин). 1нче китап. Чаллы: «Идел-йорт», 2000, 11нче бит.
• Әдәбият, сәнгать, мәдәният / Сандугачлар моңы булып Сарман кала хәтердә. К.: АО «ИД Казанская Недвижимость», 2020, 130нчы бит. ISBN 978-5-6044058-7-1
• Акмалов Нәсим Рәшит улы / Илһамлы Сарман. Антология (төзүче-мөхәррире Дамир Гарифуллин). Казан: Яз, 2017, 20-23нче бит. битләр. ISBN 978-5-95-00696-1-1

Сылтамалар

• Нәсим Акмал автор яңалыклары. Казан утлары
• Нәсим Акмал публицистикасы. Казан утлары
• Нәсим Рәшит улы Акмалов / Т. Исмәгыйлов. Сарман / Сарман ягы - нурлы як
• Нәсим Акмал Рөстәм Зариповтан интервью ала. Youtube, 37:58