Sega ulam
Sega ulam yaiku sega campur khas Betawi kang digawé saka sega putih dicampur srundhèng lan bumbu rempah manéka warna. Masakan iki wiwitané didol déning wong-wong peranakan Indonésia-Tionghoa.[1][2] Ing jaman biyèn, bakul nasi ulam dodolan nganggo grobag saka Tangerang tekan Glodok.[2] Sejatiné, nasi ulam iku meh padha karo nasi uduk. Kekaroné minangka sega gurih. Bedhané yaiku nasi uduk dimasak nganggo santen, déné nasi ulam dicampur karo srundhèng. Nasi ulam padatan disuguhaké mawa rong cara yaiku garing lan nyemek. Nasi ulam nyemek iku nganggo duduh semur. Lawuh kang kudu ana ing nasi ulam teles yaiku mihun gorèng, irisan endhog dadar, srundhèng, remekan kacang brol, diwènehi duduh semur tahu lan kenthang. Saliyanè iku, nasi ulam nyemek diwènèhi kemangi lan krupuk. Nasi ulam liyané yaiku nasi ulam garing. Bedha saka nasi ulam nyemek, nasi ulam garing ora nganggo duduh semur.
Cathetan sikil
[besut | besut sumber]
 | Artikel magepokan panganan iki minangka artikel rintisan. Kowé bisa ngéwangi Wikipédia ngembangaké. |