La Tante DC10 ռեստորան
| Ստեղծում | 9 Նոյեմբերի 2013  | |
|---|---|---|
| Երկիր | Գանա | |
| Վարչատարածքային միավոր | • Մեծ Աքրա • La-Dade-Kotopon Municipal District | |
| Վայր | Airport City Accra | |
| Աշխարհագրական կոորդինատներ | 5°36′10″N 0°10′29″W | |
| Տարողություն | 118 individual seat | |
| Պաշտոնական կայք | www.latantedc10restaurant.com | |
| Cuisine | Ghanaian cuisine | |
La Tante DC10 ռեստորան (անգլ.՝ La Tante DC 10 Restaurant), որը տեղաբնակներն անվանում են «Կանաչ ինքնաթիռ», հանրային և մասնավոր համագործակցության ռեստորան, որը հիմնադրվել է Գանայի մայրաքաղաք Աքրայում: Այն գործում է նախկին Ghana Airways-ի McDonnell Douglas DC-10 օդանավում, որը 1983-2005 թվականներին ծառայել է որպես ուղևորատար ինքնաթիռ։ Ռեստորանը մատուցում է հիմնական գանայական ճաշատեսակներ: Ռեստորանը լավ ընդունելություն է գտել տեղաբնակների շրջանում:
Նկարագրություն
[խմբագրել | խմբագրել կոդը]La Tante DC10 ռեստորանը գտնվում է նախկին Ghana Airways-ի McDonnell Douglas DC-10 ինքնաթիռի վերափոխված տարբերակում: Նախկինում 380 ուղևոր տեղափոխող այս ինքնաթիռը վերածվել է 118-տեղանոց ռեստորանի, որտեղ նստատեղերի մեծ մասը հեռացվել է՝ հաճախորդների համար բավարար տարածք և ճաշասեղաններ տեղադրելու նպատակով[1]։ Ինքնաթիռի աջ կողմում ստեղծվել է հավելյալ հատված՝ խոհանոցը տեղավորելու համար[2]։
Ինքնաթիռը տեղափոխվել է Airport City Accra՝ Աքրայի արվարձան, որը գտնվում է Կոտոկա միջազգային օդանավակայանի մոտ և Marina Mall Accra-ի դիմաց[3]։ Մարդիկ ինքնաթիռ-ռեստորան մուտք են գործում և այնտեղից դուրս են գալիս գետնի մակարդակից՝ ծածկով աստիճանների միջոցով։ Նրանք մուտք են գործում նախկին առաջին կարգի նստատեղերի տարածքով, որը վերածվել է սպասասրահի[1]: Տղամարդ և կին հաճախորդների համար տեղադրվել են առանձին սանհանգույցներ, և ռեստորանն ամբողջությամբ օդորակված է[3]:
Ճաշացանկ
[խմբագրել | խմբագրել կոդը]Ռեստորանը մատուցում է գանայական խոհանոց: Այնստեղ մատուցվում են այնպիսի հիմնական ուտեստներ, ինչպիսին է համեմված տիլապիան՝ մատուցված բանկուի հետ, որը եգիպտացորենի հիմքով շիլայի տեսակ է[1]: Այլ ճաշատեսակների թվում են հավի մսով ջոլոֆ բրինձը և «կարմիր կարմիր» «սևաչյա» ոլոռը՝ շոգեխաշած ձկան հետ[2]: Թեպետ La Tante DC10 ռեստորանի գներն ավելի բարձր են, քան տեղական մյուս ռեստորաններում, այնուամենայնիվ ռեստորանն իր գներով ավելի մատչելի է, քան Աքրայի այլ վայրերում գտնվող թանկարժեք ռեստորանները[1]:
Պատմություն
[խմբագրել | խմբագրել կոդը]
DC-10-ը, որն օգտագործվում է որպես ռեստորան, նախկինում պատկանել և շահագործվել է Ghana Airways-ի կողմից՝ Գանայի և Եվրոպայի ու Ամերիկայի Միացյալ Նահանգների միջև երթուղիներում[1]։ Ghana Airways-ը DC-10-30 է պատվիրել 1976 թվականին, որը ժամանել է 1983 թվականի փետրվարի 24-ին: 1985 թվականի հուլիսին այն օգտագործվել է Միավորված ազգերի կազմակերպության զորքերին Լիբանանի մայրաքաղաք Բեյրութ տեղափոխելու և այնտեղից դուրս բերելու համար: Հաջորդ տարվա հունվարին ինքնաթիռն օգտագործվել է Caribbean Airlines-ի պայմանագրով՝ շաբաթական երկու անգամ ուղևորներին Եվրոպայից Կարիբյան կղզիներ տեղափոխելու համար[4]:
2002 թվականի հունիսին ինքնաթիռն առգրավվել է Լոնդոնի Հիթրոու օդանավակայանում՝ ազգային ավիափոխադրողի՝ պահեստամասերի մատակարար AJ Walters Aviation-ին 4 միլիոն ֆունտ ստեռլինգ չվճարված պարտքերի պատճառով: Սա հանգեցրել է Աքրայի, Միացյալ Թագավորության և Իտալիայի միջև չվերթների ժամանակավոր դադարեցման[1][4]: Ավիաընկերությունը սնանկ է ճանաչվել 2005 թվականին[1]: Դրանից հետո ինքնաթիռը լքվել է և թողնվել Կոտոկա օդանավակայանում. հաջորդ տարիների ընթացքում տարբեր մասեր վաճառվել են որպես մետաղի ջարդոն, ներառյալ՝ երեք շարժիչները[5]:
Երբ 2011 թվականին օդանավը գնեց Տոգոյի նախարարի կինը, արդեն այն փրկելու ծրագրեր կային[5]: Ինքնաթիռը վերափոխվել է և վերաբացվել որպես ռեստորան 2013 թվականի նոյեմբերի 11-ին՝ որպես հանրային-մասնավոր համագործակցություն Ghana Airport Company Limited-ի և Vindira Company Limited-ի միջև[1][3]: Սա առաջին դեպքն է, երբ ինքնաթիռի վրա հիմնված ռեստորան է բացվել Աֆրիկայում[3]: 2024 թվականի դրությամբ ռեստորանը փակվել է:
Ընդունելություն
[խմբագրել | խմբագրել կոդը]Ռեստորանը մեծ հաջողություն է ունեցել հաճախորդների շրջանում. մենեջեր Ինդիրա Շիյամը 2014 թվականին BBC News-ին տված հարցազրույցում բացատրել է. «Սկզբում մարդիկ ցանկանում էին զգալ ինքնաթիռի ներսում ռեստորանի մթնոլորտը, բայց նրանք զարմանալիորեն շարունակում են գալ»: Հաճախորդներից ոմանք ճաշում են ռեստորանում, քանի որ նախկինում երբեք ինքնաթիռի ներսում չեն եղել, մինչդեռ մյուսները հետաքրքրված էին ինքնաթիռում հիմնված ռեստորանում ուտելու գաղափարով[1]:
«Ask the Pilot» (թարգմանաբար՝ անգլերենից «Հարցրեք օդաչուին») սյունակի հեղինակ Պատրիկ Սմիթը ռեստորան է այցելել 2016 թվականին. նրա ակնարկը հետագայում հրապարակվել է «Business Insider»-ում: Նա ասել է, որ ռեստորանն էժան է և լավը, բայց ոչ բացառիկ: Նա քննադատել է ռեստորանին՝ «համատեքստի պակասի» պատճառով, քանի որ կցանկանար տեսնել ինքնաթիռի լուսանկարները, երբ այն օգտագործվել է որպես ուղևորատար: Սմիթն ասել է. «Շատ ռեստորաններ ունեն երկար ու հետաքրքիր պատմություններ, բայց սովորաբար միայն մեկ վայրում: Իսկ այստեղ ռեստորան է, որը բառացիորեն ամենուր եղել է»[2]:
Ծանոթագրություններ
[խմբագրել | խմբագրել կոդը]- ↑ 1,0 1,1 1,2 1,3 1,4 1,5 1,6 1,7 1,8 «In pictures: Plane eating in Ghana». BBC News. 15 January 2014. Վերցված է 31 October 2016-ին.
- ↑ 2,0 2,1 2,2 Smith, Patrick (25 January 2016). «This is what it's like to have dinner in an old jet that's been converted to a restaurant». Business Insider. Վերցված է 31 October 2016-ին.
- ↑ 3,0 3,1 3,2 3,3 «La Tante DC 10 Restaurant Opens In Accra». News Ghana. 9 November 2013. Վերցված է 31 October 2016-ին.
- ↑ 4,0 4,1 Guttery, 1998, էջ 77
- ↑ 5,0 5,1 «Ghana Airways Aircraft To Be Used As Restaurant». GhanaWeb. 11 October 2011. Վերցված է 31 October 2016-ին.
Գրականություն
[խմբագրել | խմբագրել կոդը]- Guttery, Ben R. (1998). Encyclopedia of African Airlines. Jefferson, N.C.: McFarland. ISBN 978-0-7864-0495-7.
Արտաքին հղումներ
[խմբագրել | խմբագրել կոդը] | Վիքիպահեստն ունի նյութեր, որոնք վերաբերում են «La Tante DC10 ռեստորան» հոդվածին։ |