Pikëpamja e qeverisë së SHBA

Rreth dy miliardë njerëz sot jetojnë në zona të prekura nga konflikti. “Detyra jonë”, deklaroi ambasadorja e amerikane në OKB, Linda Thomas-Greenfield, “duhet të jetë të shpëtojmë madje edhe një person tjetër nga përjetimi i ferrit të luftës”.

Lajmi i mirë, tha ambasadorja Thomas-Greenfield, është se “ne dimë të krijojmë kushte që nxisin paqen”. Hapi i parë është investimi në aspektin e parandalimit të konflikteve.

“Parandalimi i konflikteve kërkon qasje afatgjata dhe gjithëpërfshirëse, vullnet politik, partneritete efektive, burime të qëndrueshme dhe angazhime kombëtare. Zhvillimi i strategjive kombëtare të frenimit të konflikteve ka dëshmuar se ndihmon në trajtimin e faktorëve që nxisin konfliktin dhe forcimin e infrastrukturës kombëtare për paqen.”

Me kontribut dhe mbështetje të gjerë, strategjitë e parandalimit të konflikteve mund të përforcojnë institucionet shtetërore, të nxisin sundimin e ligjit, të forcojnë shoqërinë civile dhe të ndërtojnë tolerancë dhe kohezion shoqëror më të madh.

“Paqja, zhvillimi dhe përpjekjet humanitare kanë lidhje reciproke dhe përforcuese mes tyre”, tha ambasadorja Thomas-Greenfield. Ajo u bëri thirrje gjithashtu vendeve anëtare që të vazhdojnë të mësojnë nga njëri-tjetri në lidhje me parandalimin e konflikteve. Sierra Leone është një rast i tillë, vuri në dukje ambasadorja Thomas-Greenfield.

“Sierra Leone ka bërë përparim të rëndësishëm në rindërtimin dhe forcimin e institucioneve të pasluftës dhe në përmbushjen e disa nevojave themelore të banorëve të saj dhe viktimave të luftës, duke përfshirë krijimin e Komisionit të së Vërtetës dhe Pajtimit. Mbështetja e Fondit për Ndërtimin e Paqes për Sierra Leonen ka përfshirë një përqëndrim të fortë në konfliktin e tokës, sfidat e komuniteteve ndërkufitare dhe fuqizimin dhe pjesëmarrjen e grave dhe të rinjve në proceset demokratike.”

Për të qenë efektive, përpjekjet për parandalimin e konflikteve dhe ndërtimin e paqes duhet të jenë gjithëpërfshirëse, tha ambasadorja Thomas-Greenfield.

“Kur gratë, të rinjtë dhe zërat e tjerë jo të përfaqësuar mirë mund të marrin pjesë plotësisht, në mënyrë të barabartë dhe domethënëse në jetën politike dhe publike, politikat dhe zbatimin e tyre, ka më shumë gjasa të pasqyrojnë nevojat e të gjithë shoqërisë dhe të sjellin rezultate të qëndrueshme për të gjithë.”

Samiti i së Ardhmes i muajit të ardhshëm dhe ai i vitit 2025 mbi Rishikimin e Arkitekturës së Ndërtimit të Paqes janë mjete të rëndësishme për të forcuar përpjekjet për ndërtimin e paqes, duke përfshirë parandalimin e konflikteve dhe ndërmjetësimin për zgjidhjen e tyre.

Shtetet e Bashkuara mbeten të përkushtuara ndaj përpjekjeve të OKB-së për parandalimin e konfliktit dhe ndërtimin e paqes përmes planeve të saj 10-vjeçare në katër vende me përparësi të lartë, përkatësisht Haiti, Libi, Mozambik dhe Papua Guinenë e Re, si dhe në rajonin bregdetar të Afrikës Perëndimore.

Shtetet e Bashkuara do të vazhdojnë të mbështesin nismat e OKB-së për zgjerimin e përpjekjeve gjiththpërfshirëse për parandalimin e konflikteve, ndërmjetësimin e tyre dhe përpjekjet për paqe. Shtetet e Bashkuara u bëjnë thirrje të gjitha vendeve anëtare të OKB-së që të bëjnë të njejtën gjë.

Ndërsa luftimet vazhdojnë në të gjithë Rripin e Gazës, “situata mbetet katastrofike për civilët”, sipas Organizatës së Kombeve të Bashkuara. Ekziston një nevojë urgjente për arritjen e një armëpushimi, lirimin e pengjeve dhe rritjen e dergesava të ndihmave humanitare për banorët në Rripin e Gazës.

“Asnjë zonë nuk është e sigurt në Gaza, megjithatë civilët vazhdojnë të urdhërohen të evakuohen në zona të ndryshme brenda saj", tha Rosemary DiCarlo, nënsekretare e përgjithshme për çështjet politike dhe ndërtimin e paqes. Dhjetë muaj pas fillimit të luftës, kërcënimi për një përshkallëzim të saj rajonal është "më i mundshëm dhe më rrëqethës se kurrë më parë”.

“Siç theksoi Presidenti Biden në një deklaratë javën e kaluar me udhëheqësit e Katarit dhe Egjiptit, nuk ka më kohë për të humbur dhe as justifikime nga asnjëra palë për vonesa të mëtejshme. Është koha për të liruar pengjet, për të filluar zbatimin e armëpushimit dhe kësaj marrëveshjeje”, tha ambasadorja amerikane në OKB, Linda Thomas-Greenfield.

“Një armëpushim i qëndrueshëm mund të përshpejtojë përpjekjet për të rikthyer shërbimet bazë, duke përfshirë energjinë elektrike, ujin dhe shërbimet sanitare, duke sjellë lehtësim shumë të nevojshëm për civilët palestinezë, shumë prej të cilëve janë zhvendosur disa herë. Kjo mund të mundësojë një fushatë vaksinimi të nevojshme për të frenuar përhapjen e poliomielitit. Dhe kjo do të lehtësonte kushtet për lirimin e të gjitha pengjeve të mbajtura nga Hamasi”.

Një armëpushim në Gaza mund të ndihmojë gjithashtu të mundësojë përpjekjet diplomatike për ulur tensionet në rajon.

“Që nga fillimi i këtij konflikti mes Hamasit dhe Izraelit, Shtetet e Bashkuara kanë punuar për të shmangur shndërrimin e luftimeve në Rripin e Gazës në një konflikt më të gjerë rajonal", tha ambasadorja Thomas-Greenfield. “Shtetet e Bashkuara kanë punuar ngushtë me Izraelin dhe partnerët tanë në rajon për të zmbrapsur sulmin e pashembullt të Iranit ndaj Izraelit dhe për të shmangur një konflikt më të gjerë.”

“Tani, ne jemi sërish në prag të një rritje tjetër kërcënimi.”

“Rrjedhimisht, Shtetet e Bashkuara kanë ndërmarrë hapat e nevojshëm paraprak, duke përfshirë lëvizjen e një aeroplanmbajtëseje dhe mjeteve ajrore shtesë në rajon, në mënyrë që, nëse do të jetë e nevojshme përsëri, ne të jemi të përgatitur për mbrojtur Izraelin dhe personelin ushtarak të Shteteve të Bashkuara në rajon nga çdo kërcënim.”

“Dislokimet tona të mjeteve ushtarake shtesë nuk janë një paralajmërim mbi atë që do të ndodh. Një konflikt më i gjerë rajonal nuk është i pashmangshëm”, tha ambasadorja Thomas-Greenfield.

“Qëllimi i përgjithshëm i Shteteve të Bashkuara mbetet për të ulur tensionet në rajon, për të frenuar dhe për t’u mbrojtur nga çdo sulm i mundshëm dhe për të shmangur konfliktin rajonal. Kjo fillon me finalizimin e një marrëveshjeje për një armëpushim të menjëhershëm, që përfshin lirimin e pengjeve në Gazë. Duhet ta kalojmë vijën përfundimtare për ta arritur këtë.”