ប្រឈមនឹងទោសជាប់គុក ៥ឆ្នាំ ដោយសារធ្វើរូបភាព ចំអកមេដឹកនាំចិន ស៊ីន ជីនពីង
អាជ្ញាធរចិន កាលពីថ្ងៃពុធទី ២៨ ឧសភាបានចាប់ខ្លួនសិល្បករម្នាក់ ក្នុងបទខ្វះការគោរពដល់លោកប្រធានាធិបតីចិន ស៊ីន ជីនពីង។ តាមអង្គការការពារសិទ្ធិមនុស្សចិន សិល្បករចិន នឹងអាចប្រឈមនឹងទោសជាប់គុក ៥ឆ្នាំ ដោយសារតែការធ្វើរូបភាពចំអកប្រមុខដឹកនាំចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
![លោកប្រធានាធិបតីចិន ស៊ី ជីនពីង](https://s.rfi.fr/media/display/ef2fc90c-0fec-11ea-a111-005056bf7c53/w:980/p:16x9/xi%20jinping%20by%20reuters.jpg)
សិល្បករ តៃ ជៀនយុងត្រូវបានប៉ូលិសចាប់ខ្លួន កាលពីថ្ងៃពុធ បន្ទាប់ពីគាត់បានផ្សព្វផ្សាយរូបភាពមួយ ដែលមិនសមប្រពៃសម្រាប់ភ្នែករដ្ឋអំណាចចិន។ នោះគឺរូបលោកប្រធានាធិបតីចិន ស៊ី ជីនពីង ដែលជ្រួញមុខ និងមានពុកមាត់។ តាមមិតភក្តិម្នាក់របស់តៃ ជៀនយុង ដែលបានផ្តល់បទសម្ភាសន៍ឲ្យវិទ្យុអាស៊ី សេរី សិល្បករបានកែច្នៃ យករូបជ្រួញមុខរបស់គាត់ ទៅកាត់បញ្ចូលក្នុងរូបរបស់លោកប្រធានាធិបតីចិន។
រូបភាពមនុស្សជ្រួញមុខ ជាប្រធានបទស្នាដៃសិល្បៈដែល តៃ ជៀនយុងបានបង្កើត និងផ្សព្វផ្សាយតាមបណ្តាញសង្គមហ្វេសប៊ុក។ លោកធ្លាប់បានបង្កើតរូបភាពមនុស្សជ្រួញមុខជាច្រើនកន្លងមក ដោយគ្មានបញ្ហា។ ប៉ុន្តែ រូបភាពប្រធានាធិបតីចិន ដែល តៃ ជៀនយុងយកទៅកែច្នៃ បន្ថែមពុកមាត់ និងដាក់មុខជ្រួញយ៉ាងដូច្នេះ បានធ្វើឲ្យអាជ្ញាធរចិនប្រតិកម្មភ្លាម ព្រោះថា រូបភាពប្រធានាធិបតីចិន មានពុកមាត់ និង មុខជ្រួញបានទទួលការអត្ថាធិប្បាយច្រើនពីអ្នកប្រើអ៊ីនធ័រនែត។ អ្នកខ្លះថែមទាំងសរសេរថា លោកស៊ី ជីនពីងមានពុកមាត់ដូច ហ៊ីត្លែរ មេដឹកនាំពួកណាហ្ស៊ីអាល្លឺម៉ង់។
តៃ ជៀនយុងត្រូវបានអាជ្ញាធរចិន ចាប់ខ្លួន ពីបទមិនគោរពថ្នាក់ដឹកនាំ និងរងការចោទប្រកាន់ពីបទ ញុះញង់បង្កឲ្យជម្លោះ និងបង្កើតចលាចលក្នុងសង្គម។ តាមអង្គការការពារសិទ្ធិមនុស្ស បទចោទប្រកាន់នេះនឹងអាចធ្វើឲ្យសិល្បករចិន ប្រឈមនឹងទោសជាប់គុក ៥ឆ្នាំ។
នៅប្រទេសចិន រូបភាពមេដឹកនាំរបបកុម្មុយនិស្ត ត្រូវបានការពារខ្ពស់ មិនឲ្យយកទៅនិយាយលេងសើច។ ចាប់តាំងពីចូលកាន់តំណែងជាប្រធានាធិបតីចិន លោកស៊ី ជីនពីងត្រូវបានគេមើលឃើញថា កំពុងចង់កសាងមុខមាត់ក្នុងនាមជាមេដឹកនាំដ៏ខ្ពង់ខ្ពស់ ដូចម៉ៅ សេទុង ដែលគេមិនអាចប៉ះពាល់បាន។ លោកស៊ី ជីនពីងផ្ទាល់ ធ្លាប់រិះគន់ បរិហារការងាររបស់សិល្បករឯករាជ្យមួយចំនួន ថា មានបង្កប់ដោយចរិកថោកទាប។
សិល្បករដែលប្រើស្នាដៃដើម្បីបញ្ចេញគំនិតយល់ឃើញរបស់ខ្លួន ទៅលើរបបដឹកនាំចិន ត្រូវបានអាជ្ញាធរចិន ចាប់ឃុំខ្លួន។ ជាក់ស្តែង សិល្បករដ៏ល្បីឈ្មោះ អៃ វៃវៃ ដែលគេស្គាល់តាមរយៈ រូបស្តាតអូឡាំពិក នៅប៉េកាំង ត្រូវបានប៉ូលិសចិន ចាប់ឃុំខ្លួន ក្នុងគេហដ្ឋាន មិនឲ្យធ្វើដំណើរចេញក្រៅប្រទេស។ សម្រាប់លោកស៊ី ជីនពីង សិល្បករត្រូវធ្វើស្នាដៃ ដែលចូលរួមជួយលើកតម្កើងគំនិតស្នេហាជាតិ និងតម្លៃនយោបាយសង្គមនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ