Grugeux
- Cotentinais : grugeus
- Guernésiais : vermaenne
- Jèrriais : un grugeux (
grugeux), des grugeurs
Ch't' articl'ye fut c'menchie en Jèrriais
|
![](http://upload.wikimedia.org/wikipedia/commons/thumb/0/01/Squirrel_and_mouse_in_brumidi_corridors.jpg/220px-Squirrel_and_mouse_in_brumidi_corridors.jpg)
Un grugeux est un mammiféthe d'la fanmil'ye Rodentia.
Les souothis, les rats, l's êtchutheurs, les couochons d'la Dginnée et les bièvres sont des grugeurs, mais y'en a un tas d'bêtes tchi sont d'chutte fanmil'ye. La fanmil'ye des grugeurs a pus d'manniéthes qu'autcheune aut' fanmil'ye dé mammiféthes: dans les 2,277 manniéthes v'là tch'est dans les 40% des manniéthes dé mammiféthe.
Les grugeurs sont pustôt des p'tites bêtes tchi peuvent mangi eune grande vâriêté d'mangi et produithe des généthâtions dé p'tits grugeurs bein quédaine.
Les grugeurs ont deux grandes dents cop'rêsses dans les mâchouailes dé haut et d'bas tchi craîssent sans cêssi. Ch'est en grugeant tout l'temps – l'mangi, les nouaix, l'bouais – qu'les bêtes gardent ches dent en bouon êtat.
Ouaithe qu'les grugeurs saient pustôt p'tits, lé capybara d'l'Améthique du Sud est l'pus grand grugeux d'achteu (jusqu'à 65kg) et y'avait des grugeurs préhistoriques tchi 'taient acouo pus grands.
Nou dit qu'les grugeurs (ch'est en tchi les souothis et les rats) sont d'la vèrminne car i' peuvent grugi un c'mîn dans des granges, des tchuîsinnes, des boêtes et des stôrres. Mais dans des pays y'a des grugeurs tchi sont utiles – lé pé dé tchiques manniéthes a 'té r'chèrchi avaû les siècl'yes (par exempl'ye du rat mustchi, d'la chînchilla).