Eugène Boudin
Ch't' articl'ye fut c'menchie en Jèrriais
|
Eugène-Louis Boudin 'tait un peintre Nouormand tchi fut né à Honflieur lé 12 dé Juilet 1824 et mouothit à Dgieauville lé 8 d'Août 1898. I' faîthait ses portraits d'houors, sustout d'la mé, du conmèrce d'la cauchie et du marchi, et les vîsiteurs et les fanmil'yes sus les grèves d'la Nouormandie.
San péthe travaillait sus les batchieaux tchi viageaient entre Lé Hâvre et Hambourg. En 1835 la fanmil'ye èrmuit au Hâvre où'est qu'lé janne Ûgène allit travailli dans eune înmprînm'thie et pis dans eune papét'tie. En 1844, Ûgène stèrtit sa papét'tie à li et rencontrit un tas d'artistes tchi l'encouothageaient d'continnuer la dessinn'nie dé tchi qu'i' 'tait entchéthinné. I' r'nonchit don l'conmèrce et, auve l'aîgue d'la meunicipalité du Hâvre, allit êtudier à Paris auprès d'Ûgène Isabey.
Il aimait pâsser l'Hivé à Paris, mais viagi duthant l'Êté en Nouormandie et en Brétangne où'est qu'i' fîtent un tas d'portraits du paysage, d'la mé et du ciel.
Nou dit qu'i' 'tait iun des prieurs dé l'Împressionisme. Claude Monet apprînt d'la technique auprès d'Boudin, et Ûgène fut r'connu officiellement pouor san travas d'mêtchi.
Lé musée dé Honflieur, tchi fut fondé auve l'aîgue d'Ûgène Boudin, a 92 portraits par l'artiste.
