Eugène Boudin
Eugène Boudin | |
![]() | |
Statsborgarskap | Frankrike |
Fødd | 12. juli 1824 Honfleur |
Død |
8. august 1898 (74 år) |
Yrke | kunstmålar |
Sjanger | landskapsmåleri, marinemåleri |
Eugène Boudin på Commons |
![](http://upload.wikimedia.org/wikipedia/commons/thumb/1/18/Boudin_Beach_of_Trouville.jpg/220px-Boudin_Beach_of_Trouville.jpg)
![](http://upload.wikimedia.org/wikipedia/commons/thumb/c/c0/Eug%C3%A8ne_Boudin_Cotenord.jpg/220px-Eug%C3%A8ne_Boudin_Cotenord.jpg)
Eugène Boudin (12. juli 1824–8. august 1898) var ein fransk landskapsmålar frå Honfleur i Normandie. Motiv med hav og himmel går att i arbeida hans. Han vert rekna som ein banebrytar for impresjonismen, og ein av dei fyrste friluftsmålarane.
Liv og gjerning
[endre | endre wikiteksten]Boudin var son til ein hamnnelos og arbeidde frå han var ti år gammal som matros på ei dampdriva ferje som gjekk mellom Le Havre og Honfleur. I 1835 flytta familien til Le Havre, der far hans dreiv ein butikk med papirvarer og biletrammer. Sonen arbeidde i butikken, som han seinare overtok.
Boudin vart kjend med fleire målarar frå regionen, og stilte ut av bileta deira i butikken sin. Målarar som Constant Troyon, Jean-François Millet og Eugène Isabey oppmuntra Boudin til sjølv å byrje måle. Sine fyrste eigne bilete stilte han ut i rammeforretninga si i Le Havre. 22 år gammal satsa han som kunstmålar på heiltid.
Med stipend frå byen Le Havre reiste han i 1851 til Paris for å studere. Han var på studieturar både til Flandern, Sør-Frankrike, Venezia, og framfor alt Bretagne. Likevel var det heimtraktene i Normandie som stod han nærast.
Noko etter 1850 danna det seg ein liten kunstnakoloni i Ferme Saint-Simeon nær Honfleur. Boudin vart her venn med andre kunstnarar som Gustave Courbet, Johan Jongkind, Claude Monet og førnemnde Isabey og Troyon, målarar som han inspirerte til å måle i friluft. I lag med Jongkind måla han på 1860-talet ei rekke miniatyrbilete frå kysten i Normandie.
Frå 1859 stilte Boudin jamnt ut bilete på salongen i Paris. I 1874 deltok han med verk på den alle første impresjonistiske utstillinga i Paris, som fotografen Nadar stod bak.
Boudin sine måleri er prega av eit inntrengande og rikt studium av lysspelet over landskapet; verka hans vart lovprisa i samtida og er framleis mykje påakta. Favorittmotivet hans var badebyar med si stemning av friluftsliv og av eit borgarleg liv som tillet slike forlystingar.
Boudin døydde i Deauville i 1898 og vart gravlagt i bydelen Montmartre i Paris.
Kjelder
[endre | endre wikiteksten]Aschehougs kunsthistorie. Bind 4 Kunstleksikon
- Denne artikkelen bygger på «Eugène Boudin» frå Wikipedia på tysk, den 17. mars 2012.