Anas

Anas er ei biologisk slekt med grasender i andefamilien.

Slekta samlar ender av varierande storleik, frå krikkand på 34 centimeter i kroppslengd til raudfotand og golfand som kan bli over 60 cm. Dei hekkar ved ferskvatn. Anas-grasender beitar typisk på akvatiske plantar og virvellause dyr på grunt vatn. I motsetnad til dukkender i slektene Netta, Aythya og Bucephala dukkar Anas-endar i vatnet ved å vippe framkroppen ned i vatnet og bakkroppen opp i lufta. Dei er i stand til å flyge rett opp frå vassoverflata.

I vinterhalvåret har mange artar særs iaugefallande oppvisingar ved kurtise. Dette byrjar på ei tid der fuglane ikkje er i stand til formering. Kurtisen blir tatt opp att jamleg i vårmånadane og inkluderer artsspesifikke positurar, gestar og rørsler. Den langvarige kurtisen bidreg til å sikre at det finst partnarar av same art.

Dei fleste artane i denne slekta, spesielt viss dei er utbreidde i temperert klima i nord, syner stor kjønnsdimorfisme i fjørdrakt. Fjørdrakta åt andriken endrar seg vesentleg mellom vår og haust, praktdrakta blir utvikla allereie tidleg på hausten, etter andre myting. Hos hofuglar derimot, er fjørdrakta ikkje så veldig annleis gjennom året.

Blant dei mest kjende og mest utbreidde representantar for denne slekta er stokkand, Anas platyrhynchos. Stokkanda har ein populasjon på meir enn 19 millionar individ spreidd over store delar av den nordlege halvkula. Slekta inneheld òg nokon av dei mest avgrensa og isolerte øyartar som dessutan er truga eller sterkt truga. Til dømes lever ein estimert populasjon på maksimum 2500 individ (2002) av gassarkrikkand, Anas bernieri på vestsida av Madagskar. Campbelland, Anas nesiotis med berre maksimalt 200 kjønnsmodne individ, overlever på berre 23 dekar på Dent Island, Campbell-øyane. Laysanand, Anas laysanensis, som er blant dei mest sjeldne vassfuglar i verda, lever på den 370 hektar store øya Laysan, Hawaii. Populasjonen er på om lag 500 - 680 hekkande individ (2010).

Det har vist seg at mange artar innanfor denne slekta er i stand til å reprodusere med kvarandre. Avkommet, derimot, er vanlegvis sterilt.

Artslista

Anas i rekkjefølgje etter Clementslista versjon 6.6 frå august 2011 med norske namn etter Norske navn på verdens fugler.

• Elveand, Anas sparsa
• Snadreand, Anas strepera
• Sibirand, Anas falcata
• Brunnakke, Anas penelope
• Amerikablesand, Anas americana
• Sørblesand, Anas sibilatrix
• Raudfotand, Anas rubripes
• Gulnebband, Anas undulata
• Madagaskarand, Anas melleri
• Stokkand, Anas platyrhynchos
• Golfand, Anas fulvigula
• Hawaiiand, Anas wyvilliana
• Laysanand, Anas laysanensis
• Flekknebband, Anas poecilorhyncha
• manglar norsk namn*, Anas zonorhyncha
• Stripeand, Anas superciliosa
• Filippinarand, Anas luzonica
• Blåvengand, Anas discors
• Kaneland, Anas cyanoptera
• Prikkskeiand, Anas platalea
• Kappskeiand, Anas smithii
• Sigdskeiand, Anas rhynchotis
• Skeiand, Anas clypeata
• Kvitkinnand, Anas bahamensis
• Raudnebband, Anas erythrorhyncha
• Stjertand, Anas acuta
• Kerguelenand, Anas eatoni
• Spisshaleand, Anas georgica
• Sølvand, Anas versicolor
• Punaand, Anas puna
• Hottentottand, Anas hottentota
• Knekkand, Anas querquedula
• Gulkinnand, Anas formosa
• Krikkand, Anas crecca
• manglar norsk namn*, Anas andium
• Gulnebbkrikkand, Anas flavirostris
• Kappand, Anas capensis
• Gassarkrikkand, Anas bernieri
• Gråkrikkand, Anas gibberifrons
• Kvitstrupekrikkand, Anas albogularis
• Nomadeand, Anas gracilis
• Kastanjeand, Anas castanea
• Bronseand, Anas aucklandica
• Campbelland, Anas nesiotis
• Koparand, Anas chlorotis

Kjelder

• Denne artikkelen byggjer på «Anas» frå Wikipedia på tysk, den 20. juli 2012

Bakgrunnsstoff

Wikimedia Commons har multimedia som gjeld: Anas