Wikipedia in lombard
![]() |
Quest articol chì l'è scrivud in lombard, con la Noeuva Ortografia Lombarda |
La Wikipedia in lombard (despess breviada lmo.wikipedia, lmo.wiki o lmo.wp) a l'è l'edizzion in lengua lombarda de la Wikipedia, in pee de l'otober 2005.
Adess la gh'ha 74 259 articoi, 145 000 pagine e 44 794 utent registrad, 4 de che inn ministrador.
Storia
[Modifega | modifica 'l sorgent]La creazzion e 'l period de koiné
[Modifega | modifica 'l sorgent]Dopo de la creazzion in l'otober 2005 la se forma una ministrazzion che la voleva propi tant fà su una koiné cisalpina che la desvilupa una grafia - ciamada Koiné ocidentala - che la gh'ha di ciar trat catalan e la insubiss 'me bandera de la Lombardofonia una version de l'Estelada, ma la resta tollerada anca l'ortografia milanesa. 'Sta ministrazzion chi la dopera fiss i bot e la fa rivà la Wikipedia a pussee de 100'000 articoi, tucc de poch pussee de 'na riga.
La reforma e l'intervent di ministrador italian
[Modifega | modifica 'l sorgent]In del 2007, per 'sti reson chì, l'è insubid de sarrà sù la Wikipedia in lombard. A la fin l'è decidud de fàll no, ma in bas a 'na proposta del Kemmótar, prim utent de la Wikipedia, l'è decidud de toeu via i bot e de eleger una noeuva class di ministrador, per la pupart utent de la Wikipedia in italian che voreven salvà la Wikipedia de la sarradura.
'Sta noeuva ministrazzion la mena i vègg ministrador ai dimission e la mena a di noeuve regole che permeten una convivenza pussee bona in tra i vari dialet, favorissen el doperà di grafie che esisten sgiamò e toeuven via el roeull de standardizzazzion de la Wikipedia.
El desvilup
[Modifega | modifica 'l sorgent]Intorna al 2010 i ministrador de la Wikipedia in italian fornissen i so mandad e la taca a creàss una bas ministrativa che la gh'ha 'me proget principal la Wikipedia in lombard e pussee concentrad in d'una gestion a longh termen dopo del salvatagg del proget.
Del 2016 la comunità de la Wikipedia in lombard l'è impegnada in di proget inter-comunitari e l'ha promovud una colaborazzion con la Wikipedia in Galizzian, l'ha tolt part in del 2017 a 'n event dedicad a la Comunità Germanofona del Belgi e in del 2020 l'ha tolt part a du event insema a la Wikipedia in italian insema a di alter edizzion in lengov regionai e minoritari d'Italia relativ a la pandemia de COVID-19.
In del november 2021 a l'è reformada propi tant la classifegazzion grafega e dialetal, cont un noeuv sistema di template che 'l permet una classifegazzion automatega.
La Wikipedia in lombard foeura de la Wikipedia
[Modifega | modifica 'l sorgent]In di media
[Modifega | modifica 'l sorgent]In del 2018 la Wikipedia in lombard l'è in del mez de un pien mediategh quand che l'è descovert che 'l Stefano Parisi, a l'epoca candidad president del Lazzi e du agn prima candidad sindegh de Milan, el gh'haveva domà un articol in su l'edizzion lombarda de l'enciclopedia, che per un quaj media - compagn de l'AGI - el saria stad part de un pian per ingraziàss la Liga Nord per la minga milanesità del candidad.
In del marz 2019 el youtuber Favij el fa un video reazzion indova che 'l descovriss de vesser in su la Wikipedia, in quell period lì domà in su l'edizzion lombarda.
In l'otober 2020 i media del Sudtirol riporten che la Wikipedia in lombard l'ha fad i auguri a la Wikipedia in ladin dolomitegh per la soa creazzion.
In di studi
[Modifega | modifica 'l sorgent]La Wikipedia in lombard l'è stada doperada in d'un quaj studi: l'Emanuele Miola l'ha doperad la Wikipedia per trè voeulte in di so studi: in del 2013 in del studi "Aspetti della negazione nel milanese di Wikipedia e Facebook" el studia la negazzion in milanes, in del 2016 el dopera di dacc de la Wikipedia per studià l'ortografia classega milanesa in del studi "Che cosa resta di Cherubini oggi? Due casi di studi" e in del 2018 in del studi "Chì pòdom tucc scriv come voeurom. Scrivere in lombardo online" el valuta i varie manere de scriver el lombard.
El Brian Sciretti l'ha inveci doperad la Wikipedia per studià la possibilità de doperà di filer bayesian per identificà la grafia doperada di vari dialet lombard in manera automatega in del 2018.
In l'avost 2022 l'Athos Birra l'ha tirad foeura una tesi che la analizava el doperà del dialet ticines, e di alter dialet lombard, in su la red, e l'ha doperad assee la Wikipedia in del so studi. In d'un convegn del 2 de dicember in su la grafia lombarda, fad a Palazzi Lombardia, la Wikipedia in lombard a l'è stada tirada a man ancamò del Miola in d'un'analisi di ortografie.
Riferiment
[Modifega | modifica 'l sorgent]- Proposal of closure: Lombard Wikipedia
- Regionali Lazio, il candidato del centrodestra Stefano Parisi ha la pagina Wikipedia in milanese
- Il candidato del centrodestra per il Lazio ha la pagina Wikipedia solo in milanese
- Sono su Wikipedia! - Favij
- Wikipedia ladina «Finalmente ce l’abbiamo fatta»
- Chì pòdom tucc scriv come voeurom. Scrivere in lombardo online
- CHE COSA RESTA DI CHERUBINI OGGI? DUE CASI DI STUDIO
- Progetti - Brian Sciretti Arqiviad qé: [1]
- Aspetti della negazione nel milanese di Wikipedia e Facebook
Bibliografia
[Modifega | modifica 'l sorgent]- BIRRA, Athos. Il dialetto ticinese nella comunicazione mediata dal computer. Analisi di un corpus. Master : Univ. Genève, 2022