Vocal

Un vocal es un sona silabal de parla, pronunsiada con cualce streta en la curso vosal. Vocales es un de la du clases xef de sonas de parla; la otra es la consonante. Vocales varia en cualia, fortia, e cuantia (longia). Los es plu comun vosida.

La theoria tradisional de la produi de vocales usa la loca de la lingua e la forma de la boca e labias per distingui vocales. Plu resente, rexercores ia trova ce la indicantes plu importante es la frecuentias de la sonas. Ma la modo tradisional es bon per descrive fasil. On pote descrive vocales con esta variables:

La altia de la lingua es la plu importante, e trovada en tota linguas conoseda. Vocales como /i/ e /u/ es "alta" (o "cluida") car la lingua es plu prosima la palato. Otras, como /a/ es "basa" (o "abrida") car la lingua es plu distante de la palato.

Ance importante es la fronti de vocales. Vocales como /i/ ave la lingua plu frontal; Otras, como /u/ ave la arco de la lingua plu posterior.

Rondia es nomida per la rondi de la labios en alga vocales. Esta varia es fasil oservada. Vocales ronda es plu tipal ance posterior, como /u/ e /o/, ma en multe linguas, vocales frontal pote ance es rondida, como la ü e ö en deutx. Simil, an si la vocales nonrondida es plu comun a la fronte, en alga linguas los pote es trovada a la posterior, como la u en japanes.

Alga linguas ance distingui vocales nasal de vocales bocal (nonasal). En vocales nasal, la vela (la parte posterior de la palato) es basida e alga aira move tra la caveta nasal en ajunta tra la boca. Franses, portuges, e polsca, per esemplo, ave vocales nasal.

Vosi descrive la vibra de la cordas vosal. La plu de linguas ave sola vocales vosida, ma alga, como xeien e totonac de la Americas. Vocales en otra linguas pote apare en parla xuxada.

Un sona vocal de cual sua cualia no cambia tra la dura de la vocal es nomida un monoftongo; un cual lisca de un cualia a un otra es nomida un diftongo; e un cual lisca tra tre cualias es un triftongo.

La alfabeta fonetica internasional ave un colie grande de vocales comun. Otras pote es indicada con diacritos variosa.

	Fronte	Sentral	Dorsal
Cluida	i • y	ɨ • ʉ	ɯ • u
Prosima cluida	ɪ • ʏ		ʊ
Media cluida	e • ø	ɘ • ɵ	ɤ • o
Media		ə
Media abrida	ɛ • œ	ɜ • ɞ	ʌ • ɔ
Prosima abrida	æ	ɐ
Abrida	a • ɶ		ɑ • ɒ

La vocales de elefen es multe limitada. Ma nota ce la lingua permete varias estendeda, spesial la usa de /ɛ/ per /e/ e /ɔ/ per /o/.

	Vocal anterior	Vocal posterior
Vocal cluida	i	u
Vocal media	e	o
Vocal abrida	a