Lista de personaxes de Harry Potter

A continuación móstrase unha lista cos personaxes máis importantes que saen nos libros da saga Harry Potter, creados pola escritora británica J. K. Rowling.

Principais

Trío protagonista

Harry Potter

Artigo principal: Harry James Potter.

É o protagonista principal dos libros, e arredor de quen xiran os sucesos que ocorren no libro. Naceu o 31 de xullo de 1980. Vive cos seus tíos desde que tiña 1 ano de idade debido a que seus pais, Lily e James Potter, foron asasinados por lord Voldemort. É a única persoa que sobreviviu a unha maldición Avada Kedavra (esconxuro que produce a morte instantánea); mentres que a única marca visible que lle quedou foi unha cicatriz con forma de raio na fronte. Isto foi o que o levou a recibir os alcumes de "O neno que viviu" e "O elixido". Os seus amigos máis achegados en Howarts son Ron e Hermione, pero tamén ten unha relación moi próxima con Hagrid, o gardabosques de Hogwarts e con Albus Dumbledore, o director do colexio. Ademais, no colexio, pertence á casa Gryffindor, coñecida por pertencer a ela alumnos con valor.

Ron Weasley

Artigo principal: Ron Weasley.

Naceu o 1 de marzo de 1980. É o mellor amigo de Harry dende que ámbolos dous entraron como alumnos no seu primeiro ano en Hogwarts. Todos os membros da familia son meigos de vello. Ten 5 irmáns máis vellos e unha irmá máis nova. A pesar de que polo xeral sempre está con Harry cando este vive unha aventura, Ron sempre é relegado a un segundo plano pola fama do seu amigo. Como el, tamén pertence á casa Gryffindor.

Hermione Granger

Artigo principal: Hermione Granger.

Naceu o 19 de setembro de 1979. É a mellor amiga de Harry e Ron. É filla de muggles, e a mellor estudante do curso no que están en Hogwarts. Encántalle ler e opina que todo o que vale a pena saber, pódese ler nun libro. É un ano maior que Harry e Ron. Coma eles, tamén forma parte da casa Gryffindor.

Outros principais

Albus Dumbledore

Artigo principal: Albus Dumbledore.

É o director de Hogwarts e o mago máis poderoso da súa época. Durante os seus últimos anos de vida ocupouse, indirectamente, da educación de Harry Potter e de ensinarlle a única forma de vencer a Voldemort. Foi asasinado por Severus Snape), o Príncipe Mestizo, no sexto libro. Ademais, foi o único mago ao que Voldemort temeu. Trala súa morte, o mundo máxico entristece, e ao longo do sétimo libro Harry descobre que non ten un pasado tan brillante como el cría.

Lord Voldemort

Artigo principal: Lord Voldemort.

É o antagonista da saga. O seu verdadeiro nome é Tom Morlov Riddle (Tom Marvolo Riddle nas edicións en inglés). Trátase do mago escuro máis grande de tódolos tempos. Ademais, é a persoa que máis avanzou en cuestión das artes escuras e a única capaz de alcanzar a inmortalidade. É o líder dos devoradores da morte, aos que utiliza para levar acabo as tarefas que el mesmo non quere (ou pode) realizar. É descendente directo de Salazar Slytherin, e herdou del a súa habilidade para falar coas serpes (a lingua pársel). Perdeu o seu corpo ao intentar, sen éxito, matar a Harry Potter, e logo intentou recuperalo. Logrou volverse xerar no cuarto libro grazas ó sangue de Harry e de maxia escura, axudado por Rabeleiro e dende entón está a desenvolver novos proxectos. Creou seis Horcrux, dividindo a súa alma en sete partes, para intentar ser inmortal, e así, poder acabar con Harry.

Severus Snape

Artigo principal: Severus Snape.

É un profesor de Hogwarts, ten con Harry Potter un profundo sentimento de odio mutuo. Nos seus días de mocidade sufría as burlas e ataques do pai de Harry e os seus amigos. É un mago moi poderoso con grandes habilidades escuras, ademais de enormes coñecementos acerca de pocións, legeremancia e oclumancia. Foi devorador da morte durante un tempo, pero logo entrou ao servizo de Dumbledore como espía. Máis adiante, porén, convértese nun dobre espía ao servizo de Dumbledore e Voldemort, e non está claro de que lado está realmente. No sexto libro, descóbrese que segue sendo devorador da morte tras asasinar a Dumbledore coa maldición imperdoable Avada Kedavra. Non obstante, no sétimo libro compróbase que non é tan malo como parece, xa que, en realidade, amou dende pequeno á nai de Harry, Lily Evans.

Minerva McGonagall

Artigo principal: Minerva McGonagall.

É a subdirectora de Hogwarts e xefa da casa Gryffindor, que trala morte de Dumbledore pasa a ser a directora do colexio. Está sempre disposta a axudar no que sexa aos alumnos que a precisen. Como profesora, imparte a clase de Transformacións.

Draco Malfoy

Artigo principal: Draco Malfoy.

Naceu o 5 de xuño. É inimigo de Harry Potter e de case tódolos seus amigos. A familia é de meigos de vello. É fillo de devoradores da morte e a partir do sexto libro el mesmo se converte nun. Pertence á casa Slytherin e despreza aos fillos de lameiro.

Sirius Black

Artigo principal: Sirius Black.

É o padriño de Harry Potter. Era o mellor amigo do pai de Harry, James Potter. Foi levado a Azkaban, (o cárcere do mundo máxico) por un crime que non cometeu. No terceiro libro, porén, logra escapar e poñerse en contacto con Harry, para logo fuxir. Ademais, é un animeigo; pode transformarse nun can. Morreu no quinto libro ás mans da súa curmá Bellatrix Lestrange.

Rubeus Hagrid

Artigo principal: Rubeus Hagrid.

É o gardabosques de Hogwarts. Foi o que entregou a Harry aos seus tíos por orde de Dumbledore, e tamén o que o foi buscar para que comezase as súas clases no colexio. El e Harry son grandes amigos case dende que se coñeceron. No terceiro libro consegue un posto como profesor impartindo a materia de Coidado das criaturas máxicas na que ensina como familiarizarse con moi diversas criaturas. No cuarto libro, revélase que Hagrid é un semixigante (de nai xigante e pai mago).

Secundarios

Albus Severus Potter

Albus Severus Potter é un personaxe de ficción da saga Harry Potter, escrita pola novelista inglesa J. K. Rowling. É o segundo fillo de Harry e de Ginny Weasley.

Ten o cabelo negro e os ollos verdes. Recibe o seu nome de, segundo Harry di, dous grandes directores de Hogwarts: Albus Dumbledore e Severus Snape.

No sétimo (e último) libro da saga, Harry Potter e as reliquias da morte, sae no derradeiro capítulo, o epílogo, titulado "Dezanove anos despois". Ten once anos e en breve irá a Hogwarts, a escola de magos, preocupándolle que o seleccionen para a casa Slytherin.

Neville Longbottom

Neville Longbottom é un personaxe da saga Harry Potter, escrita pola británica J. K. Rowling. Na serie de filmes de Harry Potter é interpretado por Matthew Lewis.

É o fillo duns importantes aurores que foron torturados no pasado polos devoradores da morte ata que os deixaron tolos para o resto dos seus días. Neville ten fama de alumno despistado e zoupón pero a realidade non é así.

Neville é un membro da casa Gryffindor en Hogwarts, e a valentía e a coraxe, xunto coa nobreza de corazón son as calidades que un meigo debe ter para entrar nesa casa. Neville é valente e iso demóstrase no último libro onde el é o encargado de librarse dos devoradores da morte que lord Voldemort enviou ó castelo de Hogwarts para a batalla final. Neville é capaz de probarse a si mesmo e de facerlle ver á súa avoa (coa que vive) que el pode e vale o mesmo ou máis que calquera Gryffindor.

Luna Lovegood

Luna Lovegood (nada c. 1981) é un personaxe de ficción da serie literaria de Harry Potter, un ano máis nova có protanista, preséntasenos como excéntrica e aparece sempre cun colar feito con rollas de cervexa de manteiga. Sempre co pelo desguedellado e con trazas de non estar limpo é moi intelixente e boa, disposta en todo momento a axudar a Harry.

Na película Harry Potter e a Orde do Fénix interpreta o papel a actriz irlandesa Evanna Lynch.

Véxase tamén

Outros artigos