Manuel Iglesias Corral

Manuel Iglesias Corral

Biografía
Nacemento	1 de xaneiro de 1901 A Coruña, España
Morte	8 de setembro de 1989 (88 anos) A Coruña, España
Senador de España
23 de xuño de 1986 – 2 de setembro de 1989 Nomeado por: Xunta de Galicia
Deputado do Parlamento de Galicia
30 de outubro de 1981 – 8 de setembro de 1989
Senador de España
15 de xuño de 1977 – 31 de agosto de 1982 Circunscrición electoral: A Coruña
Deputado no Congreso dos Deputados
6 de decembro de 1933 – 7 de xaneiro de 1936 Circunscrición electoral: Provincia da Coruña
Deputado nas Cortes republicanas
6 de decembro de 1933 – 7 de xaneiro de 1936 Lexislatura: II lexislatura da Segunda República Española Circunscrición electoral: A Coruña
Alcalde da Coruña
1932 – 1934 ← Juan González Rodríguez – Alfredo Suárez Ferrín →
Alcalde
Datos persoais
Educación	Universidade de Santiago de Compostela Universidade de Valladolid
Actividade
Lugar de traballo	Madrid
Ocupación	político, avogado, empresario, xurista
Partido político	Partido Popular
Premios
(1971)  Cruz de Honra da Orde de San Raimundo de Peñafort
Descrito pola fonte	Gran Enciclopedia Galega Silverio Cañada Dicionario biográfico de Galicia

Manuel Iglesias Corral, nado na Coruña o 1 de xaneiro de 1901 e finado na mesma cidade o 8 de setembro de 1989, foi un avogado e político galego.

Traxectoria

Estudou Dereito na Universidade de Valladolid e na Universidade de Santiago de Compostela, iniciou a súa andaina política como concelleiro na cidade da Coruña en 1931, concello do que chegou a ser Alcalde entre 1932 e 1934.

Participou na redacción do anteproxecto do estatuto de Galicia, elixido deputado pola ORGA nas Cortes Republicanas en 1933 e fiscal da República en 1936. Durante o franquismo tivo cargos directivos en empresas privadas e coa recuperación da democracia foi senador pola Candidatura Democrática Galega e pola UCD (1977-1982), foi presidente da UCD de Galicia, deputado no Parlamento de Galicia por Alianza Popular (1981-89) e senador de novo, desta vez por Alianza Popular (1986-1989), en representación da comunidade autónoma.

Foi decano do Colexio de Avogados da Coruña desde 1963 a 1988, ano no que foi distinguido como Decano Honorario. Tamén foi Fiscal Xefe do Tribunal Supremo e do Tribunal de Garantías Constitucionais da República.

Foi Avogado da Cámara Oficial de Comercio, Industria e Navegación da Coruña. Tamén no plano empresarial, foi Secretario Xeral da Industria Baleeira Española, S.A.; Presidente de Frigoríficos do Noroeste, S.A. e Secretario do Consello de Administración de La Voz de Galicia, S.A.

Decano do Ilustre Colexio de Avogados da Coruña; Presidente da Academia Galega de Xurisprudencia e Lexislación; Presidente da Comisión do Consello Xeral da Avogacía Española para a Unión de Avogados Hispanoamericanos; Conselleiro da Avogacía Española e Vogal da Comisión Xeral de Codificación en 1968. Foi membro da Union Internationale des Avocats, do Instituto José Cornide de Estudos Coruñeses; membro correspondente da Academia de Ciencias, Letras e Artes de San Romualdo, de San Fernando (Cádiz); membro do Instituto Padre Feijóo, de Estudos Ourensáns; membro fundador do Instituto Español de Dereito Foral; Académico de Honra da Xurisprudencia e Lexislación, de Barcelona e da Xurisprudencia e Lexislación de Valencia, así como Colexiado de honra do Colexio de Avogados de Lima (Perú).

Foi condecorado coa Lexión de Honra (Francia), coa Condecoración da Orde do Cristo de Portugal e da Cruz da Orde de San Carlos, no grao de Grande Oficial, da República de Portugal.

Véxase tamén

Bibliografía

• "Iglesias Corral, Manuel". Dicionario biográfico de Galicia 2. Ir Indo Edicións. 2010-2011. p. 200. 
• "Iglesias Corral, Manuel". Gran Enciclopedia Galega Silverio Cañada (DVD). El Progreso. 2005. ISBN 84-87804-88-8. 

Outros artigos

• Lista de senadores galegos desde a Transición