Internet

Internet es un conjuntu descentralizau de redis de comunicacion interconectás que gastan la família de protocolus TCP/IP, garantizandu que las redis físicas eterogénias que la conponin huncionin comu una redi lógica única, d'arcanci mundial. Los sus orígin se remontan a 1969, quandu s'estableció la primel conession de conputaoras, conocia comu ARPANET, entre tres universiais en Califórnia i una en Utah, enos Estaus Unius.

Unu de los servícius que mas déssitu á teniu en Internet á siu la World Wide Web (WWW, o "la Web"), hata un puntu qu'es corrienti la conhusion entre dambus los dos términus. La WWW es un conjuntu de protocolus que premiti, de horma cenzilla, la consulta remota d'archivus d'ipertestu. Esta hue un desarrollu posteriol (1990) i gasta Internet comu meyu de transmission.

Essistin, polo tantu, albondu servícius i protocolus en Internet, amás de la Web: el enviu de correu eletrónicu (SMTP), la transmission d'archivus (FTP y P2P), las caravas en línia (IRC), la mensageria istantánia i presséncia, la transmission de conteniu i comunicacion multimeya -telefonia (VoIP), televisión (IPTV)-, los boletinis eletrónicus (NNTP), el acessu remotu a otrus dispositivus (SSH i Telnet) o los juegus en línia.