Triskell

Ur strollad sonerien zo anvet An Triskell

An triskell (henc'resianeg τρισκελης triskelê "teir gar", dre ar gallekadur triscèle) zo un arouez teirgarek. E broioù zo (Manav, Sikilia) ez eo eeun linennoù an triskell, e re all eo kromm, evel e Breizh ma'z eo deuet da vout unan eus an arouezioù breizhek.

E broioù all ivez e kaver triskelloù nemet ne vez ket kromm an teir gar atav, evel war banniel Anguilla, war hini Enez Manav, war hini Ingouchetia ha war hini Sikilia. E Sikilia e vez graet trinacria eus an triskell.

Tud zo a gred hag a lavar ez eo un arouez keltiek. Re all a lavar n'eo ket, nag a orin nag a implij hiziv. Met gwir eo n'eus lec'h ebet ma vez gwelet kement a driskelloù hag e Breizh. Keñveriet e vez gant al lauburu euskarat a-wechoù dre m'int deuet o-daou da vezañ evel arouezioù broadel.

Istor

Kavet ez eus bet an arouez war ar vein en ul lec'h a zo ken kozh ha Oadvezh ar Maen, e Sí an Bhrú (Newgrange) e Kontelezh An Mhí en Iwerzhon.

Deuet eo an arouez da vezañ diouzh ar c'hiz gant brud sonerezh breizhek Alan Stivell er bloavezhioù 1970.

Meur a ster zo lakaet d'an triskell, ha liamm ebet etreze alies pa weler kristenien ouzh e implij evel arouez an Drinded, ha sadomazoc'haded evel arouez ar c'hoari-tri.

Politikerezh

Implijet eo bet an arouez gant ur rannarme Schutzstaffel e-pad an Eil Brezel-Bed, gant ur strollad Suafrikat, ha gant strolladoù politikel e Sikilia. Implijet e vez ivez gant kleuboù sport, e Breizh evel e lec'h all, en Aostria da skouer.

Skeudennoù

Kizelladurioù ha livadurioù istorel

Gorgon askellek. VIvet kantved kent JK
Kib aour e Mikenai
Kib eus kêr Numancia
Triskell eus Gotland (Sveden), gant naered
Triskell eus an XIIvet pe XIIIvet kantved en un iliz Karja, e Saaremaa, en Estonia
Triskell gant teir gad en iliz-veur Paderborn en Alamagn
La Triscele e Sikilia
En iliz Saint-Marcellin (Isère)
En liz Saint-Marcellin