Kresna
![](http://upload.wikimedia.org/wikipedia/commons/thumb/a/a5/Krishna_Avatara.jpg/250px-Krishna_Avatara.jpg)
Kresna utawi Krishna (Déwanagari: कृष्ण; IAST: kṛṣṇa; kabaca [ˈkr̩ʂɳə]) inggih punika silih tunggil tokoh agama Hindu sané sampun kasub ring sakancan sastra Hindu taler ring lelampahan Pawayangan. Ida taler kabawos Vāsudéwa Krishna (Vāsudéwa artinipun 'warih Ida Sang Basudéwa' – Basudéwa punika ajin Ida Sang Kresna). Manut ring Sastra Hindu, Kresna punika Awatara Bhatara Wisnu sané kaping pitu. Ring gumi India, Ida Sang Kresna punika kasungsung pinaka Sang Hyang Pasupati olih sékté Waisnawa.
Kresna puniki tasih pateh tekén awatara Déwa Wisnu sané kaping ulu (kutus) sané marupa anak lanang makulit selem utawi béru, nganggén dhoti kuning miwah magelung kaiyas antuk bulu mayura (merak).[1] Ring sakancan seni rupa, Ida kapindayang makta suling tur ngadeg nganggén cokor sané matekuk ka samping. Manut ring kitab Purana tur Mahabharata kaucap Ida pinaka oka kaping ulu Basudewa miwah Déwaki, pinaka anak ménak saking karaton Suraséna, pinaka karaton sané dados mitologi ring India Utara. Manut tradisi Hindu, sakadi Gaudiya Waisnawa, Ida kabaos panyrewadian saking kawiaktian sané sujati, utawi panyrewadian saking Widi, miwah ring kitab-kitab sané mligbagang indik Wisnu tur Kresna, sakadi Bhagawatapurana, Ida kaucap pinaka angga Ida Sang Hyang Widhi. Ring Bhagawatapurana, ida kapindayang pinaka pangangon nguda sané wikan nyuling, punika taler ring wiracarita Mahabharata, ida kasumbung pinaka pamimpin sané wicaksana, sakti tur mawibawa. Taler Ida kaloktah pinaka angga sané prasida micayang ajah-ajahan sané sujati, tur agama Hindu percaya yéning Bhagawadgita pinaka kitab sané madaging sabda-sabda Kresna kapining Arjuna indik kaweruhan sané suci.
Manut ring kosakata basa Sangsekerta, kruna Krishna punika maarti "peteng" utawi "ireng" (selem). Punika macihna Ida Sang Kresna madrebe kulit sané mawarna ireng.
- ↑ Wijaya, G. Putra Kusuma. "10 Awatara Turun ke Dunia ( Dewata Nawa Sanga)". Kaaksés 2020-05-24.