Knight and Day

Knight and Day
Títol	Knight and Day
Póster d'a cinta.
Ficha tecnica
Dirección	James Mangold
Aduyant de dirección	Javier Franco
Dirección artistica	Greg Berry Jeff Wisniewski
Producción	Cathy Konrad Todd Garner Steve Pink
Disenyo de producción	Andrew Menzies
Guión orichinal	Patrick O'Neill
Musica	John Powell
Fotografía	Phedon Papamichael
Montache	Michael McCusker Quincy Z. Gunderson
Escenografía	Andrew Menzies
Vestuario	Arianne Phillips
Maquillache	Jane Galli
Peluquería	Kathrine Gordon
Actors	Tom Cruise Cameron Diaz Peter Sarsgaard Viola Davis Jordi Mollà Paul Dano
Datos y cifras
País(es)	Estaus Unius
Anyo	2010
Debantadera	16 de chunio de 2010 Sevilla (Espanya)
	23 de chunio de 2010 Estaus Unius
Chenero(s)	Cine d'aventuras Cine d'espionache Cine d'acción Cine de comedia
Durada	109 min.
Idioma(s)	Anglés
Companyías
Productora(s)	Regency Enterprises Dune Entertainment New Regency Pink Machine Todd Garner Productions Tree Line Film
Distribución	20th Century Fox
Estudio(s)	117 millons de dólars
Presupuesto	262 millons de dólars
Informacions en bases de datos especializadas:

L'actor Tom Cruise, en o papel de Roy Miller.

L'actriz Cameron Diaz, en o papel de June Havens.

L'actor Peter Sarsgaard, en o papel de Fitzgerald.

L'actor Jordi Mollà, en o papel d'Antonio Quintana.

L'actriz Viola Davis, en o papel d'Isabel George.

L'actor Paul Dano, en o papel de Simon Feck.

L'actor Falk Hentschel, en o papel de Bernhard.

L'actor Marc Blucas, en o papel de Rodney.

L'actriz Maggie Grace, en o papel d'April Havens.

L'actor Dale Dye, en o papel de Frank Jenkins.

Knight and Day (títol orichinal en anglés, en aragonés Caballero y Día, enguerada en Aragón con o títol en castellano de Noche y Día, Nueit y Día en aragonés) ye una cinta de l'anyo 2010 de cine estausunidense d'aventuras comicas d'espías y acción dirichida por James Mangold seguntes un guión orichinal de Patrick O'Neill con una dirección de fotografía de Phedon Papamichael y una banda sonora orichinal de John Powell producida por Cathy Konrad, Todd Garner y Steve Pink. En l'elenco d'a cinta amanixen, entre d'atros, os actors Tom Cruise, Cameron Diaz, Peter Sarsgaard, Viola Davis, Jordi Mollà y Paul Dano.

O rodache d'a cinta se fació en Boston y d'atras localidaz de Massachusetts, con as escenas en l'aeropuerto filmadas en l'aeropuerto de Worcester en Worcester; bellas escenas se filmoron en Cádiz y Sevilla en Andalucía (Espanya), en Salzburgo (Austria) y en Port Antonio (Chamaica). S'ambienta en a calendata d'a cinta (anyos 2010) en cuantos lugars (Boston, Nueva York y Kansas en Estaus Unius y Sevilla (a on en a cinta presentan os Santfermíns de Pamplona) en Espanya. L'enguero mundial d'a cinta s'escaició en a ciudat andaluza de Sevilla.

Ye lo segundo treballo conchunto de Tom Cruise y Cameron Diaz dimpués de Vanilla Sky (2001, Cameron Crowe) y la cinta recibió criticas negativas y positivas, estando las positivas centradas en l'actuación de Cruise y Diaz y las negativas mas que mas en o guión. Se'n fació un remake en idioma hindi (Bang Bang!, 2014, Siddharth Anand).

Argumento

June Havens ye en aeropuerto de Wichita en Kansas de tornada enta la suya casa en Boston (Massachusetts) dimpués de mercar bellas piezas de recambio ta restaurar un antigo Pontiac GTO que ha d'estar o suyo regalo de voda ta la suya chirmana. En ixe aeropuerto coincide de forma no masiau accidental con Roy Miller, un achent secreto, que la fa servir ta pasar o filtro de contyrol d'acceso con bella mercadería. Cuan June creye que puet acceder a lo suyo vuelo, li dicen que no en queda garra plaza libre, pero bien luego bel atro achent secreto d'a CIA que ye controlando a Roy, John Fitzgerald, decide que la dixen puyar en l'avión con él, en creyer-la companyera d'él. En l'avión, June veye que lo vuelo ye cuasi vuedo de raso, pero no veye que mientres que ella se troba en os lavabos Roy tien una baralla con os poquets pasachers de l'avión y con os miembros d'a tripulación y los mata. June creye que ye una broma cuan Roy li diz que toz os tripulants de l'avión han muerto pero que él fará aterrizar l'avión, dica que comprueba que lo que li diz ye verdat y finalment Roy lo fa aterrizar en un millocar.

Dimpués d'aterrizar Roy li da consellos de cómo ha d'actuar y dimpués la droga y la dixa en a suya casa, Cuan June dispierta se prepara ta la voda d'a suya chirmana April y descubre que ista no tien garra intrés en o Pontiac GTO y que de feito la suya intención ye de vender-lo. alavez aparixe l'achent Fitzgerald, qui fa puyar en un auto a June, aparentment ta protecher-la pero que tot fa pensar que ye ta fer-li bel mal. De rapiconte aparixe Roy, qui mata a muitos achents dica conseguir rescatar-la, y June plega en una reunión con o suyo antigo novio Rodney, un bombero d'a ciudat. Pero torna a plegar Roy y aparentment sequestra a June, en ferindo levement d'un tiro a Rodney ta lo sequestro.

Roy li explica a June que con él será en seguridat y que lo que buscan os achents que lo persiguen ye un invento clamau Zephyr, una batería que puet suministrar enerchía electrica de durada infinita, un movimiento perpetuo, un invento que heba feito un choven cientifico, Simon Feck, a qui teneba que protecher Roy pero que Fitzgerald preba de sequestrar ta robar-li l'invento, en culpando a Roy de mientras. June y Roy marchan a Brooklyn en Nueva York ta trobar a Simon, pero cuan plegan él ha marchau, en dixando pistas ta Roy decindo-le que se troba en os Alpes. alavez plegan uns matons d'un traficant d'armas espanyol, Antonio Quintana, y Roy acaba con éls y torna a drogar a June.

Cuan June torna a dispertar, se troba ista vegada en una isla desierta a on Roy tien o suyo xaco secreto, y Roy li diz que ye un puesto completament seguro. Tanimientres, June accepta una trucada telefonica d'a suya chirmana y ixo inadvertidament fa que los hombres de Quintana pleguen en a isla y Roy y June han de fuyir-ne; una vegada mas, Roy torna a drogar a June ta que s'adorma. Cuan June torna a dispertar, se troba ista vegada puyada en un tren en Austria, a on Roy finalment s'ha trobau con Simon. Tanimientres tamién los ha seguiu Bernard, un asasín contractau por Quintana, y dimpués d'una dura baralla a on tamién colabora June, Roy consigue matar-lo.

En plegar en a ciudat de Salzburgo, Roy dixa a Simon y June en l'hotel seguros y marcha, pero June lo sigue, aparentment sin que Roy en pare cuenta. June puet escuitar cómo Roy alcuerda con Quintana vender-le o Zephyr y, en tornar en a suya cambra de l'hotel, troba a Fitzgerald y a Isabel George, la directora d'a CIA, qui li explican que en realidat Roy ha estau de contino fendo-la servir tga los suyos fins, en pasando de contrabando lo Zephir por os controls de l'aeropuerto. Escorazonada y decepcionada, June accepta colaborar con éls ta fer preso a Roy. Cuan preban de fer-lo, bi ha un tiroteyo y Roy, feriu, caye en un río con o Zephyr y muere. Simon ye entregau a Fitzgerald ta la suya custodia, pero iste mata a los atros achents y sequestra a Simon ta vender-lo a Quintana.

En tornar en a suya casa y en a suya vida normal, June acude a la voda de su chirmana pero dimpués decide visitar bella dirección que heba visto casualment que Simon cosiraba y cuan i plega, descubre que la casa ye en realidat a casa d'os pais de Roy, qui ye realment un sarchento de l'exercito estausunidense y a qui sus pais creyen muerto en acción de guerra. En ixa visita, June descubre que Roy yera un magnifico nadador. June decide fer-se a sí mesma una trucada, sabendo que será interceptada, afirmando que lo Zephir ye en o suyo poder. Y, como June asperaba, la consecuencia ye que la secuestran os hombres de Quintana y la portan enta la residencia d'o suyo chefe en Sevilla, a on en ixe momento dicen en a cinta que se son celebrando os Sanfermíns, y la drogan ta que diga la verdat. Y, tal como June heba deduciu, una vegada mas amanixe Roy ta salvar-la, con una persecución por as carreras de Sevilla en plenos Santfermíns con toros corriendo, a on finalment Quintana muere. Pero Fitzgerald encara tien a Simon, y finalment Roy cambia lo Zephir por Roy, fuyindo Fitzgerald en un helicoptero. Tanimientres, a batería d'o Zephir ye defectuosa y esclata, matando a Fitzgerald.

Finalment parixe que tot ha tornau en a normalidat. Roy se troba ingresau en un hospital ta curar-se d'as suyas feridas, y la directora d'a CIA li diz a June que ella mai no popdrá estar con Roy, que la vida de Roy ye en o mundo de l'espionache, y June torna en a suya vida normal. Pero ye nomás que aparentment, porque June ha podiu aprender muitas cosas de Roy de cómo actúa un achent secreto y no se conforma con fer a suya vida sin él, y prepara un plan ta poder estar chuntos.

Elenco

Actor	Papel	Notas
Tom Cruise	Roy Miller
Cameron Diaz	June Havens
Peter Sarsgaard	Fitzgerald
Jordi Mollà	Antonio Quintana
Viola Davis	Isabel George, directora d'a CIA
Paul Dano	Simon Feck
Falk Hentschel	Bernhard
Marc Blucas	Rodney
Lennie Loftin	Braces
Maggie Grace	April Havens
Rich Manley	Danny
Dale Dye	Frank Jenkins
Celia Weston	Molly
Gal Gadot	Naomi
Jack O'Connell	Wilmer
Trevor Loomis	Eduardo
Nilaja Sun	Allison
Tommy Nohilly	Randy, macanico
Taylor Treadwell	Azafata d'a puerta
Christian Finnegan	Controlador d'acceso a l'aeropuerto
Brian Dykstra	Oficial d'a companyía aeria
Brian Tarantina	Hombre en o deposito de ferralla
Natasha Paczkowski	Petra, sastre
Lee Wesley	Fireman Paul
Matthew Lawler	Achent
Ronn Surels	Pasachero
Eric Robert Bradshaw Bennett	Conductor de l'auto de 18 ruedas
Scott Wahle	Locutor
Sara Underwood	Locutora
Helen L. Welsh	Vecina
King Orba	Contrabandista
Michael Enright	Incheniero d'o tren
Adam Gregor	Cocinero d'o tren
Mitch E. Bowan	Tecnico d'evacuación medica
Gerry Carbajal	Medico en Hallway
Diana Afonso	Chefa d'o restaurant	No acreditada
Charlie Alejandro	Soldau en l'aeropuerto	No acreditau
Carl Alleyne	Padrino	No acreditau
Stanis Krista Ames	Conductora de precisión	No acreditada
Nicholas Art	Mozo en l'aeropuerto	No acreditau
Jacqueline Astbury	Pasachera de l'aerolinia	No acreditada
Nicole Boucher	Mesacha con a coda preta en o stand	No acreditau
Gonzalo Bouza	Secuaz	No acreditau
Brian Bradbury	Duenyo d'o restaurant	No acreditau
Joshua Brown	Treballador de l'aeropuerto	No acreditau
Catherine Burt	Cambrera	No acreditada
Katelyn Cahill	Dama d'honor	No acreditada
Hélène Cardona	Moza mayor	No acreditada
Arnold Chon	Pistolero con fusil	No acreditau
Desiree April Connolly	Corredora	No acreditada
Jeffrey Corazzini	Tecnico automovilistico	No acreditau
D.W. Cormier	Vendedor de l'aeropuerto	No acreditau
Christopher J. Davis	Duenyo d'o restaurant	No acreditau
Óscar de la Casa	Cuantos papels menors	No acreditau
Holland Diaz	Achent	No acreditau
Sean Patrick Doherty	Policía estatal	No acreditau
Paul Elicone	Aduyant d'o cambrero	No acreditau
Frederick Fairbanks	Achent encubierto	No acreditau
Susan Farese	Muller en l'aeropuerto	No acreditada
Mugisha Feruzi	Oficial d'a companyía aeria	No acreditau
Jay Finocchiaro	Pasachero en l'aeropuerto	No acreditau
Keith Fluker	Achent	No acreditau
Shawn Fogarty	Viachero en l'aeropuerto	No acreditau
Jim Ford	Agent	No acreditau
Hugo Garcia	Corredor en os toros	No acreditau
Suzanne Gillies	Controladora de billez en l'aeropuerto	No acreditau
Karlos Granada	Corredor en os toros	No acreditau
Josh Gunderson	Treballador en a oficina	No acreditau
London Hall	Azafata	No acreditada
Lily Blaisdell Hamilton	Convidada a la voda / Mesacha en l'aeropuerto	No acreditada
Gina Hernandez	Muller en a escala mecanica	No acreditada
David Hernández Silva	Corredor en os toros	No acreditau
Mark Hetherington	Corredor	No acreditau
Frankie Imbergamo	Duenyo d'o restaurant	No acreditau
Ren Knopf	Corredor	No acreditau
Bianca Kovacs	Mesacha	No acreditada
Erica LaRose		No acreditada
Gwen MacKay	Treballador de l'aeropuerto	No acreditau
Tim MacLean	Extra con auto	No acreditau
Jeffrey Malick	Soldau	No acreditau
Conan Marchi	Duenyo d'o restaurant	No acreditau
Dan Marshall	Duenyo d'o restaurant	No acreditau
Olivier Martinez	Escena en a placha	No acreditau
Robert Masiello	Invitau a la barbacoa	No acreditau
Katie McCabe	Muller en l'aeropuerto	No acreditau
Erica McDermott	Dama d'honor	No acreditada
Thomas McGowan	Furruchaga en l'aeropuerto	No acreditau
Peter Motson		No acreditau
Scott Neufville	Pasachero de l'autobús	No acreditau
Wolf-Dieter Nitsch	Oficial de Policía	No acreditau
Morgan O'Brien	Pâsachero de l'aerolinia	No acreditau
Sam Oussama	Achent encubierto	No acreditau
Greg Paul	Policía / Bombero	No acreditau
Stephen Radochia	Achent especial	No acreditau
Georgina Ransley	Mesacha en l'aeropuerto	No acreditada
Donna Glee Reim	Pasachera de l'atobús	No acreditada
Wilma Rivera	Muller choven	No acreditau
Tony Sagastizado	Corredor en os toros	No acreditau
Hester Schell	Treballadora de l'aeropuerto	No acreditada
Nicole Signore	Convidada a la voda	No acreditada
Bobby Silva	Doble d'Antonio Quintana	No acreditau
Toshi Sinha	Doble de June Havens	No acreditau
Michael Stavrinos	Achent encubierto	No acreditau
Stream	Treballadora de l'aeropuerto	No acreditau
David Struffolino	Corredor	No acreditau
George J. Vezina	Treballador d'a cxonstrucción	No acreditau
Billy "V" Vigeant	Oficinista	No acreditau
Cari Waterman	Turista	No acreditada
Darryl Wooten	Aduyant d'o senador	No acreditau
Stephanie Worth	Parella de Rodney	No acreditada
Christopher Wyman	Policia austriaco	No acreditau

Producción

Desembolique

Antes d'estar designau James Mangold ta dirichir Knight and Day, o primer director que treballó en o prochecto estió Tom Dey. Ta la elaboración d'o guión colabororon mas de doce guionistas, pero finalment o Writers Guild of America decidió que nomás que amanixese uno en os títols de credito d'a cinta, Patrick O'Neill, qui heba treballau en a primer versión d'o guión; d'atros guionistas que colaboron estioron Scott Frank, Laeta Kalogridis, Ted Griffin, Dana Fox y Simon Kinberg.

Cásting

Mientres o desembolique d'o guión definitivo, se facioron cuantos cambios en l'elenco d'a cinta. En primeras, lo títol heba d'estar Wichita y se ufrió lo papel protagonista masculín a l'actor comico Adam Sandler, qui s enegó en decindo que "no se veyeba en portando un arma", En ixe momento, Wichita yera un prochecto d'a productora Revolution Studios dica que s'encargó Sony Pictures. En ista nueva etapa se pensó como protagonistas d'a cinta (que agora se clamaría Trouble Man) en Chris Tucker y Eva Mendes, en concebindo-la como una cinta romantica ta exalzar la figura d'istos dos actors.

Dimpués, tanto Tucker como Mendes decidioron no participar en a cinta y finalment Cameron Diaz fue esleyida por Sony Pictures ta estar la suya protagonista femenina; ta lo papel masculín se reunioron con Gerard Butler. Tanimientres Butler finalment se decidió por participar en a comedia The Bounty Hunter chunto con Jennifer Aniston. alavez qui amostró o suyo intrés en protagonizar-la estió Tom Cruise, qui yera en ixe momento fendo dica cinco audicions ta cinco cintas diferents, incluyindo-ie Salt y The Tourist, encara que Cruise decidió tamién que quereba moficicar o papel protragonista masculín t'adpatar-lo enta la suyas propias ideas.

Financiación

Os socios de producción d'a cinta, New Regency y Dune Entertainment, compensoron as nuevas necesidaz de financiación d'o presupuesto d'a cinta con toz istos cambios en reducindo d'una man o pago a Cruise, qui acceptó no cobrar so que 11 millons de dólars, cuan la suya tarifa yera de 20 millons por cinta, y d'atra man, reducindo os pagos futuros a Cruise, qui tamién acceptó renunciar a la suya clausula habitual en os contractos de primer dólar bruto, seguntes a cual Cruise recibiba un porcentache d'os ingresos brutos d'a cinta dende lo suyo enguero; ista vegada Cruise acceptó no cobrar dica que los inversors no hesen recuperau a suya inversión en a cinta. En total, os costes de producción d'a cinta superoron os 125 millons de dólars.

Rodache

A meyaus de setiembre de 2009 principió la filmación d'a cinta en as ciudaz de Boston y Bridgewater, en Massachusetts, filmando-se as escenas de l'aeropuerto en l'aeropuerto de Worcester, tamién en Massachusetts. Posteriorment se filmoron bellas escenas en atras localidaz d'o mesmo estau en Melrose, Danvers y New Bedford. Fuera d'Estaus Unius se rodoron escenas en as ciudaz andaluzas de Cádiz y Sevilla en Espanya, en Salzburgo en Austria y en a ciudat chamaicana de Port Antonio.

Banda sonora orichinal

O grupo de musica rap estausunidense Black Eyed Peas grabó una canción ta la cinta, titulada Someday.

Mercatotecnia

Se fació un enguero mundial d'a cinta en a ciudat de Sevilla o 16 de chunio de 2010, y ta lo suyo enguero en Estaus Unius s'heba previsto ta lo 25 de chunio, pero Fox prefirió fer-lo lo 23 de chunio, en previsión d'as malos resaultaus de publico y recaudo anunciaus., y mesmo facioron una agresiva campanya de marketing ta prebar d'impulsar a cinta. Christophe Rosen, en The New York Observer analizó iste marketing en decindo que "pareixeba mas intrusivo y desesperau que cualsiquier atro enguero important d'os zaguers tiempos". O productor cinematografico Don Carmody afirmó que lo tráiler d'a cinta yera "aburriu", continando con que creyeba que la cinta no funcionaría masiau bien en o mercau por a excesiva edat d'os suyos protagonistas, "creigo que Cameron Diaz yera una estrela pero ya no en ye. Bellunas d'ixas estrelas son augmentando una mica (en edat)". En The Hollywood Reporter comentoron que "os espèctadors potencials permaneixen sorprendentment indiferents a si en zagueras la veyen. Y dica l'inte, sigue atrayendo l'atención mas que mas de menors de 25 anyadas, i ixo indica que los fanaticos que creixioron con Tom Cruise como estrela han cambiau.

Fox decidió fer un pase previo d'a cinta o 19 de chunio. en Los Angeles Times informoron o mesmo día que as enquestas previas a l'enguero determinoron que yera posible que la cinta se convertise en un fracaso de taquilla. As procheccions indicaban que la cinta nomás que faría un recaudo de 20 millons de dólars, muito menos que lo coste de producción d'a cinta, que heba estau de 125 millons. Emma Watts, presidenta de producción de FOX, dició que "no somos a on pensabamos que hebamos d'estar", en referencia a istas previsions. En Los Ángeles Times consideroron que "...Cruise y Diaz no son tan populars entre los cinefilos mas chóvens, que a sobén refincan os grans recaudos de cabos de semana d'enguero en o verano (...) Entre varons adolescents y universitarios la cinta cuasi que no rechistra movimientos, seguntes qui ha podiu veyer os resultaus d'a enquesta". New York Magazine informó que la cinta "se yera comportando miserablement" antes de cumplir a suya primera semana, y ta New York Magazine una d'as desavantallas mas grans d'a cinta yera l'actor Tom Cruise. Un directivo d'a FOX comentó a ixe mesmo diario respective d'os datos d'a enquesta previa a l'enguero que "con ixos numeros no podemos enguerar a cinta en iste momento. Con suerte, ixo cambiará en os proximos días".

En conoixer que los datos de seguimiento d'o 22 de chunio amostraran que no yera probable que Knight and Day chenerase ingresos superiors a 30 millons de dólars en os suyos primers cinco días en exhibición, un executivo de FOX dició a The Wrap que yera "esturdiu", continando que "o seguimiento diz una cosa, pero os nuestros abances d'iste cabo de semana dicioron bella cosa diferent de raso... pero si se miran os datos empiricos, no somos en garra puesto". en New York Magazine informoron que lo día anterior a l'enguero s'heba puyau a iTunes un largo tráiler de Knight and Day ta prebar de millorar o delucio intrés por a cinta. Luego de fer-se publicos os resultaus de l'enguero d'a cinta, Bruce Snyder, executivo de FOX, comentó a The Hollywood Reporter que "ye una cinta t'adultos que s'enguera un miercols pero la engueremos astí y puyara lo sabado porque creyemos que o boca a boca será bueno, por a cual cosa somos preparaus ta un cabo de semana d'enguero prou bueno. Cal remerar que ye una cinta t'adultos, que asperamos que se mantienga prou tiempo.

Recepción

Recaudo

Knight and Day fació un recaudo de 76,4 millons de dólars en Estaus Unius y Canadá y atros 185,5 en atros países d'o mundo, con un recaudo mundial total de 261,9 millons de dólars. No funcionó masiau bien en o suyo enguero, con un recaudo de nomás que 3,8 millons de dólars en o suyo primer día en Estaus Unius y Canadá. Estió muito menos que Toy Story 3, que fació un recaudo de 13 millons en ixe mesmo día. Knight and Day no se trobaba entre los 50 millors engueros de cintas en un miercols de toz os tiempos. Un analís d'o resultau d'o día de l'enguero feito por Box Office Mojo amostró que estió l'enguero d'una cinta d'acción de Tom Cruise con pior asistencia dende la suya actuación en Legend en 1986. Estió lo día d'enguero con menor recaudo de Cruise en un papel protagonista dende la suya actuación en Far and Away (1992, Ron Howard). Comparativament, o papel protagonista anterior de Cruise antes de Knight and Day, Valkyrie (2008, Bryan Singer), heba chenerau en o día d'o suyo enguero la cifra de 8,5 millons de dólars, y l'anterior cinta protagonizada por Cruise y Diaz, Vanilla Sky, n'heba feito 8,9 millons de dólars en o día d'o suyo enguero.

Moira Macdonald en The Seattle Times caracterizó los resultaus inicials d'os ingresos d'a cinta como "una decepción de taquilla". Lou Lumenick en New York Post comentó: "No son grans numeros"; y lo periodista Roger Friedman afirmó en Hollywood News que "las malas criticas no ayudoron. "K&D" rechistró nomás que un 52% en Rotten Tomatoes. Mesmo las citicas consideradas positivas no estioron tan buenas, yeran estirando-se". Nicole Sperling en Entertainment Weekly indicó que "las audiencias simplament no s'amuestran d'a manera que Fox asperaba", y Ben Fritz en Los Angeles Times calificó l'enguero de "baixo" y comentó: "No estió un buen primer día u nueit en a taquilla de "Knight and Day".

Critica

En Rotten Tomatoes, a cinta tien un index d'aprobación d'o 52% basau en 232 resenyas y una calificación promeyo de 5.60/10. O consenso critico d'a web ye que se tracta "de pura formula, pero gracias a lo suyo ritmo vivo y a dos actuacions encisadoras de Tom Cruise y Cameron Diaz, Knight and Day ufre una agradable y mediocre acción veraniega". En Metacritic, a cinta tien una puntuación de 46 sobre 100 basada en 38 criticos, cosa que indica "criticas mixtas u promeyo". O publico enquestau por CinemaScore lio atorgó a la cinta una calificación promeyo de "B+" en una escala de A+ a F.

Justin Chang en Variety caracterizó la cinta como "una comedia de zanganadas de gran enerchía y baixo impacto que se dixa la pelleta en aportar una mesura d'inchenio, romance y glamour a una plantilla de thriller d'espías con exceso de treballo". Kirk Honeycutt en The Hollywood Reporter escribió: "Conclusión: la lochica y la verosimilitut fan unas vacacions en ista cinta d'acción contina a on i amanixen as estrelas Tom Cruise y Cameron Diaz ta vender as sinconisions". Honeycutt criticó la escritura, "o guión es masiau engalbanau ta desembolicar cual que siga d'os suyos personaches, y ixo inclui a los protagonistas", y comentó, "la galbana impregna la cinta dende las fuyidas inexplicables dica lo romance descudiau". Michael Phillips en o Chicago Tribune criticó lo guión, a dirección, a cinematografía, os escenarios y las secuencias d'acción. Phillips concluyó, clamandolo "una farsa d'o sieglo XXI embotargada con toz los esteroides entrebolicaus, Knight and Day bien puet ser suficient ta audiencias desesperadas por la paradoxa financiable conoixida como la sorpresa predecible, y disposadas a pasar por alto una mediocridat galopant ta poder concentrar-se en temas d'odontolochía".

Lou Lumenick, d'o New York Post, calificó la cinta con una estrella y media de cuatro, y escribió: "Ista ye una cinta de verano gran y faba sin garra atra ambición aparent que la de tapar un clot en o cronograma de un estudio porque a suya estrela s'esvaneixió". "Estió disponible nomás que mientres bellas pocas semanas". Emanuel Levy criticó lo guión d'a cinta, en calificandola de "cinta sin sentiu"; continó: "La historia abanza a una velocidat vertichinosa, como ta amagar as incongruencias en a narración". Levy li dió a la cinta una calificación de "C" y comentó: "Con una trama esconisiada, la saga ye dominada por secuencias d'acción largas, enerchicas y desiguals, pero careixe de lochica y presta minima atención a la caracterización. D'estructura repetitiva y con humor, que a sobén no atina a dar en o blanco, "Knight and Day" se caracteriza por a violencia nihilista y lo tono amoral, que no hese importau si la cinta hese estau incheniosa u divertida ta veyer-la". Simon Abrams en Slantle Magazine dió a la cinta una calificación de dos estrelas sobre cuatro y comentó sobre o director y o guionista d'a cinta: "Clarament, O'Neill y Mangold son tractando de dar-lis a los espectadors ixo que a los productors sin garra dandalo lis cuacaría de vender como "bella cosa ta toz", pero no bi ha consistencia en a cosa y garra quimica en absoluto entre Cruise y Diaz, i ixo fa que la pulsiada alternada entre los elementos femenins y masculins d'a cinta pareixca extraordinariament forzada". Rene Rodríguez en The Miami Herald escribió que "no heba quimica entre Cruise y Díaz", y comentó respective a l'actuación de Cruise: "Tom Cruise pasa gran parte de "Knight and Day" lucindo como si estase asperando que belún vierta a moldura de fundición sobre la suya cabeza ta fer una figura d'acción", y Peter Howell en o Toronto Star comentó: "Se suposa que ha d'haber romance en Knight and Day, y Díaz ye disposada a fer-lo, pero encara parixe que Cruise ha tomau leccions de carisma d'Al Gore".

Lisa Schwarzbaum, d' Entertainment Weekly, li dió a Knight and Day una calificación de "C+" y la comparó con a cinta Killers de 2010 protagonizada por Katherine Heigl y Ashton Kutcher: "Os productors asumen que l'intrés de l'audiencia en as estrelas de cine ye mayor que l'intrés de l'audiencia en os personaches. A conclusión ye sobredeterminada, en estar Roy y June construcciones tan cagarrisclas... A lo menos no son Katherine Heigl y Ashton Kutcher en Killers". Colin Covert en Star Tribune fació una comparación similar: "A cinta parixe poco ambiciosa, como una nueva versión de "Killers", la tirada de pistolas y risetas d'Ashton Kutcher-Katherine Heigl que toz ya han ixuplidau, pero con acrobacias mas grans y mas potencia d'estrela". En una resenya ta The Huffington Post, o critico Marshall Fine deciba que "la cinta gorgolla felizment mientres cuasi que una hora antes d'atroncar-se". Robert Bell en Exclaim! escribió sobre lo guión: "Pro que sí, as cosas se ralentizan una mica arredol d'o punto medio, lo que amuestra clarament que bi ha muit pocos escaicimientos astí dillá d'a cursi fantasía escapista, pero las cosas se recuperan rapedament, involucrando-nos en o momento d'una cinta que sabe exactament lo que haberba d'estar o cine vasuera convencional". En Orlando Sentinel, o critico Roger Moore comentó: "Os displicents artiluchios d'a trama (un gadget, o tipo friki que la inventó), os villans insipidos, a cursa masiau rapeda a traviés de lugars exoticos, no importan siempre que Cruise y Díaz fagan clic y fagan que as suyas escenas, persecucions y abrazadas, cobren vida. Y Cruise, arrullando-se a ixo como si estase la suya Misión: imposible y, de feito, toda la suya carrera dependese d'ixo, s'asegura de que sía asinas".

O critico d'o Wall Street Journal, Joe Morgenstern, comentó: "Knight and Day me fació yeyer cómo s'han tornau de fierizos bellos entretenimientos de verano. No ye que la cinta sía danyina, nomás que ta las alforchetas d'os cinefilos y d'a suya moral, sino que ye verdaderament fenomenal por a pureza d'a suya incoherencia". Escribindo Chicago Sun-Times, Roger Ebert calificó la cinta con 3 estrelas de 4 y escribió: "Knight and Day aspira a l'encanto leve d'una comedia d'acción romantica como Charade u Romancing the Stone, pero samanaría mas si reducisea l'acción implacable. A parte romantica ye evident en veyer a escena de meet cute presentada en un aeropuerto, y la comedia parixe chenerar-se naturalment entre Tom Cruise y Cameron Diaz. Pero, por qué tantas cintas de verano consideran obligatorio inflichir-nos un exceso d'imáchens cheneradas por ordenador?</ref> Preferiría veyer a Díaz y Cruise en escenas de acción a escala humana, en cuentas de que se lis esfregue lo feito de que mientres muitos peroodos, basicamente son reemplazaus por animacions". Ty Burr en The Boston Globe declaró: "A cinta ye una sinconisión veraniega d'alto octanache: elegant, divertida, sin cerebro, sin ser masiau desagradable, y Cruise ye lo suyo principal animador maniaco". Escribinto ta Associated Press, Christy Lemire comentó: "A presencia de Cruise tamién aduya a mantener as cosas licheras, frescas y fácils de veyer cuan l'acción, y la mesma historia, s'escapa sale ridiculament de control". Bill Goodykoontz en The Arizona Republic observó: "Mangold, treballando basando-se en un guión de Patrick O'Neill, accelera los escaicimientos de una manera que ye una representación perfecta de cómo se fan as cintas d'acción actuals u una demostración de todo lo que ye mal en as cintas de hue. Fácil que sían todas dos cosas". Tom Charity d'a CNN comentó: "Bi ha una creixent ansiedat sobre iste prochecto, una tendencia a compensar en exceso que evidencia insuficiencias subyacents".

En Fotogramas Jordi Costa, en calificando-la con dos estrelas de cinco, indica que:].

...no ye tanto una obra cinematografica como una elechiaca "joint venture" de dos productos –Tom Cruise y Cameron Díaz- que saben que fácil que lo proximo verano ya no podrán rentabilizar a suya condición, tan acotada en o tiempo, d'eficaces refrescos caniculars

Jordi Costa

Beatriz Valdivia en Espinoff,

...destacaría que no se prene en serio a sí mesma (...) si tractase d'estar bella cosa mas que una pixorrotera, fracasía (...) la sola pretensión que tien ye la d'entretener, pero considero que los suyos creyadors hesen podiu decantar-se mas clarament por a comedia (...) L'interprete (Tom Cruise) ye perfecto ta lo personache (...) as persecucions, tiros y explosions, encara que son correctas, no son pas as millors que s'han podiu veyer

Beatriz Valdivia

Se veiga tamién

• Cine en 2010.
• Cintas de 2010.

Vinclos externos

• (en) Knight and Day en Internet Movie Database.
• (en) Knight and Day en AllMovie.
• (en) Knight and Day en Box Office Mojo.
• (en) Knight and Day en TCM Movie Database.
• (en) Knight and Day en Metacritic.
• (en) Knight and Day en Rotten Tomatoes.
• (en) / (es) Knight and Day en FilmAffinity.
• (fr) Knight and Day en Allociné.

• Datos: Q679918