Bács-Kiskun

Komitat Bács-Kiskun
Komitatssitz	Kecskemét
Flächi	8445 km² (1. Platz)
Ywohnerzahl	533'710 Ywohner (2008, 5. Platz)
Bevölkerigsdichti	63 Ywohner pro km²
Dialekt	Süd- und Theiß-Dialäkt (Déli és tiszai nyelvjárások)
ISO-3166-2-Abchürzig	HU-BK

Bács-Kiskun (uff Ungarisch Bács-Kiskun megye [ba:tʃkiʃkunmɛɟɛ], ungarndütsche Name: Batsch-Kleinkumanien; Batschka) isch e Komitat im Süde vo Ungarn. S isch noch em Zweite Wältchrieg uss de Komitat Bács-Bodrog und Pest-Pilis-Solt-Kiskun gründet worre. Mit re Flächi vo 8'445 Quadratkilometer isch Bács-Kiskun s gröschte ungarische Komitat. Näbe e baar Erhebige um Baja umme isch s Komitat zimlig flach. Komitatssitz und gröschti Stadt isch Kecskemét.

Geografy

S Komitat isch für d sini nadürligi Schönheit bekannt. De Nationalpark vo Kiskunság litt uff sinem Bode.

Bács-Kiskun gränzt im Weste an d Komitat Baranya, Tolna und Fejér (Gränze isch d Donau), im Norde an Pest, im Oste an Jász-Nagykun-Szolnok und Csongrád und im Süde an s Land Serbie.

Bács-Kiskun hät Adeil an de Große Ungarische Diefebeni. D Höchedifferänz zwüschem höchste und em diefste Punkt isch numme 80 Meter.

Im Verglych zum Rest vo Ungarn isch d'Azahl Sunnestunde hoch; Bács-Kiskun ghört zu de sunnigste Gegende vom Land. Durch de Sand werre d'Temperaturschwankige als stärcher empfunde, des heißt d'Luft wird chälter bzw. wärmer empfunde wie si wirklig isch. Z Bács Kiskun fallt wenig Nyderschlag; di jöhrligi Mitteltemperatur litt zwüsche 10 und 10,5 Grad.

Di gröschte Flüss vom Komitat sin d'Donau und d'Theiß. Größeri Stehgwässer sin d'See vo Szelid und Vadkert.

D'Pflanzewält vo Bács-Kiskun isch zimli vylfältig; vyli devo sin im Kiskunsági Nemzeti Park z seh.

Gschicht

S Komitat isch noch em Zweite Wältchrieg uss Deile vo de ehemolige Komitat Pest-Pilis-Solt-Kiskun und Bács-Bodrog entstande. De Namme Bács chunnt vo de serbische Stadt Bač (Bács uff Ungarisch), Kiskun heißt übersetzt Chlei-Kumanie.

Bevölcherig

Obwohl d Bevölcherig abnimmt, stigt d Geburtsziffere im Gegesatz zum Rest vo Ungarn.

D Bevölcherig isch fast homogen; 94,1 Prozänt vo de Lüt sin Ungare. In de Regione Hajós und Baja git s kroatischi und dütschi Minderheite. Vo de Bevölcherig sin 65,3 Prozänt römisch-katholisch, 11 Prozänt kalvinistisch.

Zwei Drittel vo de Bevölcherig läbt in de Städt; elei d Hauptstadt Kecskemét beheimatet e Sechstel devo. Di höchsti Bevölcherigsdichti hät aber Kalocsa (353 Ywohner pro km²), di diefsti Újsolt (6 Ywohner pro km²).

Obwohl Bács-Kiskun s fümftgröschte Komitat vo Ungarn isch, isch d Bevölcherigsdichti verglychswis dief. 13 Prozänt vo de Bevölcherig läbt uff em Land.

Wirtschaft

D Bács-Kiskuner Wirtschaft hät im Johr 2001 3,7 Prozänt vom Bruttoinlandprodukt vo Ungarn usgmacht. S hät sich sit 1995 um 50% gsteigert. Vo sällem Bruttoinlandprodukt hät 2001 de primär Sektor 12,3% usgmacht. Säll isch zwar meh wie in de andere Komitat, isch aber sit 1995 (15,6%) weniger worre.

De Adeil vom sekundäre Sektor isch fast konstant blybe; 2001 hät er an de Wirtschaft e Adeil vo 30,9 Prozänt gha (29,5 im Johr 1995). De tertiäre Sektor isch am meiste gstyge, allerdings isch er mit 56,8 Prozänt im Verglych zum Rest vo Ungarn (64,4%) zimlig dief.

Tourismus

Di beliebteste Touristezyl sin di rysige Fläche vo de Große Ungarische Diefebeni, di unberiehrti Natur und d'Denkmäler vo de verschydene Städt. Au di beide Flüss, d'Donau und d'Theiß, ghöre dezüe; d'Donau bsunders vo Tass im nordwestlige Äck vom Komitat bis zu de Gränze und d'Theiß bsunders bi Tiszakécske im Nordoste vo Bács-Kiskun. Au di beliebti Romantik vo de Puszta isch bekannt.

Gröschti Städt

Namme	Ywohnerzahl
Kecskémet	108'286
Baja	37'690
Kiskunfélegyháza	31'404
Kiskunhalas	29'528
Kalocsa	18'034

Ungarndütschi Ortsnämme

Ungarndütschi Ortsnämme im Komitat Bács-Kiskun

• Bácsalmás - Almasch
• Bácsbokod - Wikitsch
• Bácsborsód - Borschod
• Bácsszentgyörgy - Batsch-Sankt-Georg
• Baja - Baje, - Frankenstadt
• Császártöltés - Tschasatet, Kaiserdamm
• Csátalja - Tschatali
• Csávoly - Tschawal
• Felsőszentiván - Ober-Sankt-Iwan
• Gara - Gara
• Hajós - Hajosch, Hajasch
• Harta - Harta, Hartau
• Katymár - Katschmar, Schanzmark
• Kiskrös - Körösch
• Kunbaja - Kumbai
• Nemesnádudvar - Nadwar
• Vaskút - Waschkut, Eisenbrunn

Weblink

 Commons: Komitat Bács-Kiskun – Sammlig vo Multimediadateie

• www.bacstourist.hu
• www.bacs-kiskun.hu
• Ungarndütschi, mit ere Lischt vo dütsche Ortsnämme

Dä Artikel basiert uff ere fräie Übbersetzig vum Artikel „Bács-Kiskun_County“ vu de änglische Wikipedia. E Liste vu de Autore un Versione isch do z finde.