Wikipedia:是日正文/2021年1月
古典力學，又叫做牛頓力學或者經典力學，喺物理學上係力學嘅兩大分枝之一。佢主要由英國科學家牛頓同埋德國哲學家萊布尼茲搞起。佢主要研究宇宙入面啲物體點樣喺力嘅影響之下郁動－呢個研究題目好古老，但係要到咗 15 世紀打後牛頓等思想家嘅研究先至正式噉有飛躍性嘅發展：古典力學涉及幾條簡單嘅物理定律，並且嘗試用呢柞定律嚟解釋嗮宇宙入面啲物體嘅郁動－即係話佢解釋現象嘅能力勁得嚟又好簡潔，所以喺牛頓等人提出咗佢之後嗰幾個世紀，佢一路都好有影響力，要等到成廿世紀初之後古典力學先至開始喺進階物理學研究嗰度失去影響力。
古典力學喺符合咗兩個條件嘅環境之下會俾到極之準嘅預測：（一）研究嘅物體唔算好重得嚟又明顯大過原子尺度；而且（二）啲嘢郁嘅速度要明顯低過光速一截。當呢兩個條件是但一個達唔到嗰時，用古典力學計出嚟嘅結果會冇嗮準確性－當研究得原子噉細粒（更者更細粒）嘅嘢嗰陣要用量子力學至得，而研究一啲速度接近光速嘅嘢嗰陣就要用相對論至得。所以一去到高級嘅物理學研究嗰陣（喺呢啲研究嗰度成日都會撞到啲細粒過原子或者以接近光速飛嘅嘢）啲物理學家實係會用好似後者等嘅高階理論，而唔會用古典力學。雖然係噉，喺一般嘅地球環境之下，呢兩個條件幾乎一定會達到，令到古典力學就算到咗廿一世紀都仲係喺好多工程學嘅應用嗰度有用。
古典力學早期幾乎係由牛頓等人一手搞起嘅，而喺 18 到 19 世紀嗰陣仲有咗拉格朗日力學同埋哈密頓力學呢啲理論框架將牛頓嗰套嘢用分析力學延伸。(成篇文章……)