項羽
![](http://upload.wikimedia.org/wikipedia/commons/thumb/c/c0/%E9%A0%85%E7%BE%BD.jpg/220px-%E9%A0%85%E7%BE%BD.jpg)
項羽(前232年3月29號—前202年),本名項籍(「羽」係佢嘅字),係秦代末年起義者,建立西楚政權,自封「西楚霸王」。前202年,佢最後畀劉邦打到輸咗,割頸自殺,被譽為中國史上最勁揪嘅軍事家,史學家話「羽之神勇,千古無二」,而且响「楚霸王」一詞通常專係指項羽。
生平
[編輯]出身
[編輯]項羽係項燕個孫,世世代代都學武,項氏有唔少人做過楚國將領。項羽本人據記載係有每隻眼都有兩粒眼珠,身高有八尺,大力到可以抬起個鼎,才氣過人。項羽後生嗰陣讀書唔成要輟學,學劍術都係中途而廢。佢阿叔項梁亦因為咁而好唔啹,項羽就答:「讀書只不過係學識點寫名,學劍只不過學嚟抵擋一個人,冇必要學。要學就學啲抵擋到萬人嘅本領。」所以項梁唔教佢讀書同埋劍術,改教佢兵法,但項羽都只係略知大意,跟住就唔肯學曬佢。後嚟,項梁因為殺咗人,要著草避仇家,帶咗項羽走佬到吳中(今蘇州)定居。
前223年,王翦帶咗六十萬大軍打楚國,項燕被殺,楚國亦滅亡。
秦始皇帝三十七年(公元前210年),秦始皇喺會稽郡巡遊,過緊錢塘江個陣,廿二歲嘅項羽就跟住項梁一齊睇皇帝出巡,項羽就話:「彼可取而代也」(我可以取代佢),嚇到項梁即刻掩埋佢個口,但從此以後亦對項羽刮目相看。而因為呢個典故,湖州府城東北十六里弁山東亦畀人叫做掩浦或者項浦。
起兵反秦(前209-前207)
[編輯]秦二世元年(前209年)七月,陳勝、吳廣喺大澤起義,開始反秦。到咗九月,會稽郡假守殷通(代理太守)打算先發制人派兵反秦,於是搵咗項梁傾。但項梁就命令項羽趁機殺咗殷通,史書記載嗰陣時項羽喺殷通府入面拔劍斬咗佢頭,同埋殺死佢門下百幾人。項梁就喺吳中各縣自行舉兵起義反秦,冇幾耐就招募到精兵八千,亦即係所謂嘅「八千江東子弟」。
項梁封自己做會稽郡郡守,而封項羽做任裨將,帶八千子弟,渡長江,得到一啲反秦軍隊嘅歸附,兵力增至六、七萬人,進駐下邳,而且消滅咗自立做楚王嘅景駒勢力。范增講過楚國好興「楚雖三戶,亡秦必楚」呢個講法,所以建議項梁立楚國嘅後人做王,項梁採納咗,就係民間搵咗楚懷王嘅嫡孫熊心,立佢做楚王,亦叫佢做「楚懷王」(即楚後懷王),以爭取楚地民心。