鑊底灣

鑊底灣（Wok Tai Wan）喺香港青衣島，喺島西北便，隔個馬灣海峽，對住馬灣。鑊底灣曾經有沙灘，做過天體勝地，家下係青馬大橋橋塔座落嘅地方。

天體

1932年連伯氏喺香粉寮搞天體活動，當時叫祼體運動，而個會叫裸體會。初時比較冷清。1935年起城門水塘，影響到會址。1936年8月16號左近，活動搬到青衣島鑊底灣。香粉寮環境都好，但無沙灘，做日光浴唔夠正。青衣島比起香粉寮人多，有男有女，唔同國籍嘅人都有，唐人女人都有六七人。

1946年，香港政府檢討海灘問題。香港裸體運動會會長去函，要求再撥青衣島做裸體會員運動之所。