遺忘
![](http://upload.wikimedia.org/wikipedia/commons/thumb/c/ca/Ensom_og_forladt_%289076803078%29.jpg/300px-Ensom_og_forladt_%289076803078%29.jpg)
遺忘(粵拼:wai4 mong4;英文:forgetting),粵語俗稱唔記得(粵拼:m4 gei3 dak1),泛指存在喺個腦嘅短期或者長期記憶裏面嘅資訊喪失或者走樣,例如一個人本來記住自己條鎖匙擺咗喺邊,佢嘅記憶裏面儲住咗有關「條鎖匙係咩位置」嘅資訊,但過咗一陣之後佢唔記得件資訊,想要搵返條鎖匙嗰陣就會有困難[1][2]。
原則上,遺忘係必然會發生嘅:廿世紀嘅認知科學確立咗心腦同一論嘅諗法,即係話腦就等同人嘅心靈;心靈入面嘅嘢—包括性格同記憶呀噉—冚唪唥都會對應住個腦嘅某啲部份,所以一件件嘅記憶都實會對應住個腦入面嘅某啲睇得到掂得到嘅部份;而腦神經學上已知,隨住一個人老化,佢個腦啲神經細胞會萎縮;噉亦都表示,儲喺個腦入面啲記憶梗會慢慢噉走樣。事實係,老人家零舍常會有記性唔好嘅問題[3][4]。
遺忘會造成人生活上好多不便,因而成為咗認知心理學上嘅一個重點研究課題。認知心理學家會嘗試用心理實驗同神經造影等嘅方法剖析遺忘嘅起因,建立遺忘曲線噉嘅數學模型嚟描述遺忘,會想搵出有咩方法可以減慢甚至避免遺忘[1]。
定義
[編輯]![](http://upload.wikimedia.org/wikipedia/commons/thumb/1/19/%22Casi_extra%C3%B1os%22.jpg/240px-%22Casi_extra%C3%B1os%22.jpg)
遺忘係同記憶相關嘅一種認知功能。由日常生活上嘅觀察經已可知,人有能力睇一啲資訊,然後喺呢資訊消失咗一段時間(唔再直接感知得到)之後攞返啲資訊嚟用;即係例如一個人睇到自己條鎖匙嘅位置,然後佢行開去第間房(唔再睇到條鎖匙嘅位置)度,喺一段時間後佢想要攞條鎖匙嚟用,假設佢冇乜特別理由相信條鎖匙移咗位,佢會返去佢上次見過條鎖匙嘅位置—噉即係話佢喺「行開咗」至「返去條鎖匙度」之間嗰段時間裏面,應該係以某啲方式喺腦入面記住咗條鎖匙嘅位置,令到佢有得用呢件資訊嚟引導自己嘅行動;記憶就係指個腦呢種「儲起資訊」嘅能力,而且記憶仲有得按「會儲住幾耐」而分做短期記憶同長期記憶等嘅唔同種類,認知心理學有對呢啲唔同嘅記憶功能作出詳細嘅研究[5]。
- 記憶嘅開端係感官—眼耳口鼻等嘅器官會由外界接收各種嘅資訊,感官嗰啲神經細胞[歐 1]會以電同化學訊號等嘅型式,將感官收到嘅資訊傳上去個腦嗰度;
- 跟住工作記憶[歐 2]噉嘅短期記憶系統會暫時儲住個腦用緊嗰啲資訊;根據心理實驗嘅結果,呢種記憶維持唔到幾耐,頂嗮櫳都淨係維持到 1 分鐘左右;
- 呢啲短期記憶資訊當中有一啲可能會俾個腦判定為「有價值,需要儲起做長期記憶」,於是就個腦就將呢啲資訊轉化做長期記憶,日後會對隻動物嘅行為產生更加深遠嘅影響;
- 另一方面,工作記憶又會幫手提取一啲由打前儲起咗嘅長期記憶嗰度得到嘅資訊,等隻動物識得運用過去接收過嘅資訊調整自己嘅行為。
响定義上,遺忘正正就係指記憶功能儲起咗嘅資訊喪失或者走樣嘅過程。用返頭先搵鎖匙個例子,如果個人行開咗去第間房之後唔記得咗條鎖匙嘅位置(一件佢之前記得嘅資訊),佢想搵條鎖匙嗰陣就會改為例如逐間逐間房摷,摷到搵得返條鎖匙為止[5]。
理論模型
[編輯]記憶痕跡
[編輯]廿一世紀初嘅心理學同神經科學基本上確立咗心腦同一論[歐 3]嘅諗法:心腦同一論主張,心靈等同個腦,人嘅心靈特性-記憶、意識、性格同思緒呀噉-冚唪唥都係物理性質嘅,會喺個腦入面有某啲睇得到掂得到嘅對應,即係話如果一位神經科學家有充足嘅知識,佢應該會能夠做到(例如)靠開刀切走個人腦嘅其中一忽,令到嗰個人喪失嗰一忽對應嘅記憶;廿世紀嘅神經科學研究經已確定,腦嘅唔同部份病變會損害一個人嘅認知或者情緒功能,例如視覺皮層受損會搞到一個人視覺功能跟住受損,而呢啲噉嘅證據撐咗心腦同一論嘅諗法[6]。而基於心腦同一論,有神經科學研究者就提出咗記憶痕跡嘅概念[7]:
「 | 」 |
同時神經科學上齋靠簡單嘅觀察就可以得知,腦入面嗰啲神經細胞同第啲生物組織實會隨住一個人老化而或多或少噉萎縮。將呢一點同記憶痕跡嘅概念結合埋一齊嘅話就表示,記憶實會隨住時間噉慢慢「衰變」-假設唔用任何神經科技作出干預,一個人腦最終一定會因為組織萎縮而喪失嗮啲記憶(唔記得嗮),問題只係在於「呢個過程發生得有幾快」[3]。
![](http://upload.wikimedia.org/wikipedia/commons/thumb/a/a5/Alzheimer%27s_disease_brain_comparison.jpg/540px-Alzheimer%27s_disease_brain_comparison.jpg)
順帶一提,廿一世紀初嘅神經科學界經已確立咗,記憶痕跡係分散嘅,即係唔係存在喺一個單一腦區:神經科學界做咗好多實驗,例如係特登破壞一隻大鼠嘅某個腦區,再睇吓呢個操作會點樣影響受試動物嘅記憶能力;佢哋做嘅結果發現,搵唔到有任何一個腦區係「一旦呢個腦區破壞咗,就會乜記憶都冇嗮」嘅;有多個腦區都會幫手做記憶方面嘅作業,包括咗海馬體、杏仁核、紋狀體同乳頭狀體呀噉[8],好似係杏仁核噉,杏仁核有份幫手學一啲情緒性質嘅記憶,即係一啲令個人零舍開心或者感受到第啲強烈情緒嘅記憶;除咗噉,各個記憶相關腦區唔單止會個別噉扮演重要嘅記憶功能,而且仲會合作做某啲記憶功能[9],不過無論係邊一個腦區受到破壞,啲記憶都唔會話完全冇嗮-噉即係話,長期記憶嘅儲藏係廣泛噉分佈喺成個腦嘅唔同部份嗰度嘅[9][10]。
記憶衰變
[編輯]根據廿一世紀初嘅研究,遺忘嘅現象可以用所謂嘅記憶衰變理論[歐 5]嚟思考,基於幾樣可以用心理實驗觀察到嘅事實[11]:
- 一件資訊一旦儲咗喺記憶裏面,呢件記憶就會隨住時間而衰變-時間()過得愈耐,個人能夠「成功記住件記憶而且件記憶唔走樣」嘅機率()會穩定噉下降;當中短期記憶入面嘅資訊如果唔轉化做長期記憶,就會喺 15 至 30 秒之內完全衰變到冇嗮咁滯。
- 如果個人嘗試回想返件記憶,件記憶就會「重新啟動」( 會或多或少噉升返);
- 所以果有件記憶唔係起碼「間中就要用」嘅話,個人會慢慢噉遺忘呢件記憶。亦即係話,「定時定候用一件記憶」係確保件記憶恆定唔走樣嘅主要方法。
上述嘅過程可以用遺忘曲線[歐 6]呢種數學模型嚟模擬: 會隨時間()而下降,數學化噉講即係話 係 嘅函數[12]。
想像以下噉嘅實驗:研究者家陣要求一班人類受試者睇一列生字,跟住攞走生字列表,過咗一段時間之後再叫班受試者盡可能寫返嗮佢哋睇咗嗰柞字出嚟;一般嚟講,如果一個受試者對某隻生字嘅記憶愈強,佢應該愈有可能會寫返低嗰個字。原則上,假設第啲因素不變,時間過得愈耐,受試者就愈會唔記得學過嘅生字,即係話如果將「受試者能夠成功回想返隻字嘅機率」()同時間 畫條線,理應會出一條下跌(斜率 )嘅曲線[13][14]。而實證嘅研究表明,遺忘可以用好似以下噉嘅數學模型嚟模擬,而跟呢條式畫嗰條線就係所謂嘅遺忘曲線[15][16]:
例: 係過咗 咁多單位時間冇回想之後,再回想返原本嗰件記憶嗰陣嘅表現(記得嘅機率或者記嗰陣嘅反應時間), 係一個參數,大致上反映班人記性有幾好, 反映件記憶有幾穩定()-隨住時間過去( 數值上升), 變得愈嚟愈負, 嘅數值會慢慢噉下降,最後去到一個穩定嘅低水平[17]。將上述講嘅嘢畫做圖,Y 軸反映一件記憶嘅「強度」同 X 軸做時間嘅話,會出到好似下圖噉嘅線:
![](http://upload.wikimedia.org/wikipedia/commons/thumb/6/62/Ebbinghaus_Forgetting_Curve_canto.jpg/540px-Ebbinghaus_Forgetting_Curve_canto.jpg)
一件記憶嘅「重新啟動」就可以想像成「响重新啟動嗰點 , 因為件記憶受到回想而突然升返」[15]。
進化適應
[編輯]廿一世紀初嘅心理學界一般認為,遺忘呢家嘢查實係有適應性嘅[註 1]:喺廿世紀嘅心理學界,遺忘呢家嘢一般都俾人覺得係一樣記憶功能上嘅失靈,係要盡力噉防止嘅;不過有進化心理學就由進化論物競天擇嘅角度嚟諗-一般嚟講,是但攞一種可遺傳嘅特性 x,如果 x 係幫到一隻生物生存同繁殖嘅,噉有 x 嘅生物個體理應會生到多啲後代,反之如果 x 係不利於生存同繁殖嘅,噉有 x 嘅生物個體理應會生到冇咁多後代,久而久之,一個生物種群會一代一代噉進化,而 x 會「變得愈嚟愈普遍」定「慢慢噉消失」就視乎 x 對生存繁殖幾有利;呢種思路就表示[18],
「 | 如果有種可遺傳嘅特性喺一個種群裏面好普遍,呢隻特性應該係喺嗰個種群嘅進化史上幫過個種群嘅祖先生存繁殖,先會流傳到落嚟。
|
」 |
由簡單嘅觀察可知,遺忘呢種認知功能極之常見,人身上有遺忘嘅現象,而對動物嘅認知功能做嘅研究亦都指出,遺忘係响所有動物物種身上都會發生咁滯嘅,即係話[19],
「 | 遺忘呢種特性好普遍,無論係邊個物種嘅動物都係噉。
|
」 |
「 | 遺忘查實係一種有適應性嘅認知功能。
|
」 |
有研究者主張,諗深一層就會發覺,遺忘查實有好多有用嘅功能,例如[1][19]:
- 減輕認知負擔:有研究者指,遺忘可以減輕一個人認知上受嘅負擔;人身邊有極大量嘅資訊,呢啲資訊大部份都係冇乜用嘅,而同時一個人嘅喺一個時間能夠同時處理嘅資訊嘅量係有限嘅,如果一個人吓吓都要記住嗮自己感受過嘅資訊,會搞到佢「處理緊嘅資訊」嘅空間俾好多冇乜用嘅資訊掗住嗮,有損佢處理有用資訊嘅能力;事實係認知心理學上有超憶症[歐 7]呢種現象,超憶症會搞到個患者有異常強嘅自傳式記憶,會係噉醒返起好多(正常人唔會記住嘅)有關自己人生嘅濕碎資訊,仲要係一啲濕碎到冇用嘅資訊,例如「五年前某日嘅早餐食咗啲乜」,呢啲長期記憶係噉湧入工作記憶會阻礙患者,搞到佢唔能夠做啲正常嘅記憶工作或者記住一啲真正有用嘅資訊-對個患者整體嘅認知表現產生負面影響[21]。
- 保護群體和諧:某啲記憶可以引起情緒,例如 A 君記得 B 君之前害過自己,諗返起 B 君害佢嗰段回憶嗰陣,A 君好有機會會出現嬲等嘅情緒;噉亦即係話,記憶理論上係報仇嘅一個起因,而根據呢條思路,「將之前俾人侵害過嘅記憶遺忘」可以減少報仇嘅發生機率,有助社群嘅和諧;事實係,公元前 4 世紀嘅古希臘嗰時經已有文獻提到呢個諗法,主張禁止停咗戰嘅雙方成日喺度回想返「敵人之前害過自己」嘅嘢,用意在於想促進停戰雙方和睦共處[22]。
... 呀噉。有啲研究者仲進一步主張,因為遺忘有價值,所以認知心理學唔應該齋係集中於防止遺忘發生,而係應該學識分辨「邊啲遺忘係有利,邊啲遺忘係不利嘅」同埋集中防止不利嘅遺忘,甚至應該嘗試用精神科藥等嘅方法嚟促進有利嘅遺忘[註 2][20]。
睇埋
[編輯]註釋
[編輯]歐詞
[編輯]文獻
[編輯]- Chun, M. M., & Jiang, Y. (2003). Implicit, long-term spatial contextual memory. Journal of Experimental Psychology: Learning, Memory, and Cognition, 29(2), 224.
- Connerton, P. (2008). Seven types of forgetting (PDF). Memory studies, 1(1), 59-71.
- Davis, R. L., & Zhong, Y. (2017). The biology of forgetting - a perspective (PDF). Neuron, 95(3), 490-503.
- Dudai, Y (2004). "The neurobiology of consolidations, or, how stable is the engram?". Annual Review of Psychology. 55: 51-86.
- Wixted, J. (2004), "The psychology and neuroscience of forgetting". Annual Review of Psychology, 55, pp. 235-269.
引述
[編輯]- ↑ 1.0 1.1 1.2 Connerton, P. (2008). Seven types of forgetting (PDF). Memory studies, 1(1), 59-71.
- ↑ 2.0 2.1 Chun, M. M., & Jiang, Y. (2003). Implicit, long-term spatial contextual memory. Journal of Experimental Psychology: Learning, Memory, and Cognition, 29(2), 224.
- ↑ 3.0 3.1 3.2 Maddox, G. B.; Balota, D. A.; Coane, J. H. & Duchek, J. M. (2011). "The role of forgetting rate in producing a benefit of expanded over equal spaced retrieval in young and older adults". Psychology and Aging. 26 (3): 661-670.
- ↑ Wayne, W. & McCann, D. (2007). Psychology: Themes & Variety 2nd Canadian ed. Nelson Education Ltd: Thompson Wadsworth Publisher.
- ↑ 5.0 5.1 Eysenck, M.W. (2012). Fundamentals of cognition. New York: Psychology Press.
- ↑ Ryle, G., 1949, The Concept of Mind, London: Hutchinson.
- ↑ Liu, X., Ramirez, S., Pang, P. T., Puryear, C. B., Govindarajan, A., Deisseroth, K., Tonegawa, S. (22 March 2012). Optogenetic stimulation of a hippocampal engram activates fear memory recall. Nature, 22 March 2012 (Vol. 484 Issue. 7394 p. 381-385).
- ↑ LaBar K.S.; Cabeza R. (2006). "Cognitive neuroscience of emotional memory". Nature Reviews Neuroscience. 7 (1): 54-64.
- ↑ 9.0 9.1 Gallistel C.R.; King A.P. (2009). Memory and the computational brain: Why cognitive science will transform neuroscience. Chichester, England: Wiley-Blackwell.
- ↑ Gallistel, C.R.; Matzel, Louis D. (2013-01-02). "The Neuroscience of Learning: Beyond the Hebbian Synapse". Annual Review of Psychology. 64 (1): 169-200.
- ↑ McLeod, Saul. "Forgetting". Simply Psychology. Retrieved 1 May 2014.
- ↑ Hewitt, D., Sprague, K., Yearout, R., Lisnerski, D., & Sparks, C. (1992). The effects of unequal relearning rates on estimating forgetting parameters associated with performance curves. International Journal of Industrial Ergonomics, 10(3), 217-224.
- ↑ "Recall (memory)". Encyclopædia Britannica.
- ↑ Baddeley, Alan D., "The Psychology of Memory", pp. 131-132, Basic Books, Inc., Publishers, New York, 1976.
- ↑ 15.0 15.1 Jaber, M. Y. (2006). Learning and forgetting models and their applications. Handbook of industrial and systems engineering, 30(1), 30-127.
- ↑ Globerson, S., Levin, N., & Shtub, A. (1989). The impact of breaks on forgetting when performing a repetitive task. IIE transactions, 21(4), 376-381.
- ↑ Woźniak Piotr A., Gorzelańczyk Edward J. and Murakowski Janusz A. (1995) "Two components of long-term memory.". Acta Neurobiol Experimentalis (1995) 55(4):301-5.
- ↑ Buss, D. M. (Ed.). (2005). The handbook of evolutionary psychology. John Wiley & Sons.
- ↑ 19.0 19.1 19.2 Kraemer, P. J., & Golding, J. M. (1997). Adaptive forgetting in animals. Psychonomic Bulletin & Review, 4(4), 480-491.
- ↑ 20.0 20.1 Nørby, S. (2015). Why forget? On the adaptive value of memory loss. Perspectives on Psychological Science, 10(5), 551-578.
- ↑ Forgetfulness is the Key to a Healthy Mind. New Scientist.
- ↑ Meier, Christian (1996) 'Erinnern – Verdrängen – Vergessen', Merkur, 50: 937-52
拎
[編輯]- 遺忘(呢種現象)嘅終結 (英文)
- 遺忘:高中心理學 (英文)
- 遺忘同學習嘅起因 (英文)