軍事戰術
提示：呢篇文講嘅唔係軍事戰略。軍事戰術（粵拼：gwan1 si6 zin3 seot6；英文：military tactics）係指軍事上用嘅戰術，即係實際喺戰場上組織同指揮軍隊嘅技術。
定義
[編輯]2022 年嘅不列顛百科全書係噉樣描述軍事上講嘅「戰術」嘅[1][2]：
| 「 | 原版英文："Tactics, in warfare, the art and science of fighting battles on land, on sea, and in the air. It is concerned with the approach to combat; the disposition of troops and other personalities; the use made of various arms, ships, or aircraft; and the execution of movements for attack or defense."
粵文翻譯：喺打仗上講嘅戰術，（係指）喺陸地、海面同埋空中打戰役嘅藝術同科學。戰術在意嘅係對戰鬥嘅處理方法；對部隊同第啲人員嘅部署；對各種武器、船艦或者航空器嘅使用；同埋執行移動嚟作出進攻或者防守。 |
」 |
軍事戰術有別於軍事戰略（military strategy），但兩個概念相輔相成：戰術包括啲實際喺戰場上做嘅動作，屬於短期嘅行動，而戰略係指對於「整體嚟講，應該點樣達到目標」嘅長遠宏觀計劃，可能會指定「乜嘢時候要用乜嘢戰術」；舉個例說明，戰略會包含「要點安排軍隊要用嘅物資」同埋「要拉攏邊幾方做盟友」等戰鬥以外嘅考量，而戰術就淨係集中諗戰鬥進行期間要做嘅嘢，包括「啲士兵要點郁動」或者「每樣武器要攞嚟做乜」呀噉[3][4]。
出名戰術
[編輯]内文：軍事戰術一覽
- 埋伏（ambush）：指一隊部隊運用隱蔽上嘅優勢（對方唔知自己方喺邊個位）嚟出奇不意噉攻擊放低咗戒備嘅敵人；使用埋伏嘅部隊，好多時都係有地理上嘅優勢，例如場戰鬥喺一笪多掩護物嘅地方（山或者森林呀噉）進行，而自己方對笪地熟啲，知邊啲位置有地方可以匿埋，所以就利用呢點埋伏進入笪地嘅敵人。埋伏呢種戰術歷史好悠久－史前嘅人類已經有用埋伏嘅做法，獵殺大隻（人類唔能夠正面制服）嘅獵物[5]
- 側擊（flanking）：指一隊部隊移去敵人嘅側面，爭取戰略上嘅優勢；喺軍事上，一隊部隊嘅攻擊力量主要會集中喺最前方，所以由側面或者後面攻擊就等如攻擊緊敵人一個反擊能力比較弱嘅部份，令到自己嘅攻擊比較大機會成功，而且亦有人指側擊能夠達到一定嘅心理戰效果－敵方嘅士兵覺得自己受包圍，容易驚同喪失士氣。負責做側擊嘅部隊好多時都係機動性高啲嘅，能夠以快啲嘅速度郁動[6]。
- 帕提亞回射（Parthian shot）：一種古時畀輕騎兵用嘅戰術；指騎住喺隻馬上面、揸住弓箭嘅單位後退（睇埋假扮撤退），跟住擰返轉頭向追佢嘅敵人射擊[7]。
- 打完閃戰術（hit-and-run tactics）：指攻擊者係噉做「搵個方便攻擊又多逃走路線嘅地點，突然向對手作出攻擊，然後即刻走佬」嘅過程；用呢種戰術嘅通常係因為攻擊方敵眾我寡，冇能力同敵人直接交戰，於是就係噉打完閃，試圖靠噉嚟慢慢削弱敵人嘅戰力[8]。
- 搔擾式開火（harassing fire）：一種心理戰戰術，指自己隨機唔定時噉向敵方係噉咦（用火力唔係咁勁嘅武器）開火，尤其係喺夜晚呢啲令人放鬆戒備嘅時段，持續噉做一段時間，目的係要令敵方士兵持續處於緊張嘅狀態難放鬆，從而慢慢噉磨損敵方嘅士氣[9]。
睇埋
[編輯]攷
[編輯]- ↑ Wragg, David W. (1973). A Dictionary of Aviation (第1版). Osprey. p. 259. ISBN 9780850451634.
- ↑ Tactics. Encyclopedia Britannica.
- ↑ Freedman, Lawrence (2013). Strategy. Oxford University Press.
- ↑ Strategy Vs. Tactics: The Main Difference & How to Track Progress Of Both.
- ↑ Bunn, Henry T.; Alia N. Gurtov (February 16, 2014). "Prey Mortality Profiles Indicate That Early Pleistocene Homo at Olduvai Was an Ambush Predator". Quaternary International. 322-323: 44-53.
- ↑ A.I. Akram (1970). The Sword of Allah: Khalid bin al-Waleed, His Life and Campaigns. National Publishing House. Rawalpindi.
- ↑ Belis, Alexis M.; Colburn, Henry P. (January 2020). "An Urartian Belt in the J. Paul Getty Museum and the Origins of the Parthian Shot". Getty Research Journal. 12: 195-204.
- ↑ Abdifitah Ibrahim (2011-04-26). "Hit-And-Run Tactics Shows Insurgent Weakness". Somalia Report.
- ↑ "World Battlefronts: Battle of Europe: Harassing Fire". TIME. July 3, 1944.
拎
[編輯]- Tactics. Encyclopedia Britannica.
