白雪公主
![](http://upload.wikimedia.org/wikipedia/commons/thumb/f/f9/Schneewittchen2.jpg/270px-Schneewittchen2.jpg)
《白雪公主》(粵拼:baak6 syut3 gung1 zyu2;德文:Schneewittchen)係一個源自德國嘅童話故事。格林兄弟喺 1812 年嗰陣出版《格林童話》將個故仔收錄咗做第 53 個故仔[1]。
《白雪公主》故仔嘅主角係一位公主,相傳佢生得好靚,而且肌膚好似雪咁白淨,所以個名叫白雪。根據家陣流通嗰個版本,白雪個後抵乸母后妒忌白雪生得靚過佢,所以就逼害白雪;白雪逃走咗去森林,遇到七個小矮人仲喺佢哋度住,之後惡毒女皇扮成阿婆請白雪食毒蘋果,搞到白雪陷入昏迷。不過王子嚟到救返白雪,而惡毒女皇最後亦都無好下場。
喺廿一世紀初,《白雪公主》係世上最出名嘅童話故事之一,世界各地嘅細路都會喺故仔書等嘅媒體度接觸到佢。個故仔畀人改編過做好多影視作品,當中最出名嘅係迪士尼動畫片《雪姑七友》,而日本嘅著名恐怖漫畫家伊藤潤二仲有將個故事改編做恐怖故仔[2]。
嗌法
[編輯]- 德文:Schneewittchen —要留意嘅係,德文內部差異唔細。精確啲講,依個名係結合咗
- 法文:Blanche-Neige,公主個名,由兩隻陰性嘅字詞組成,字面解係
- Blanche,白 / Neige,雪
- 葡文:Branca de Neve,字面解係白雪,文法上都係陰性。
- 英文:Snow White,字面解係雪白噉嘅意思。
- 日本話:Shirayuki hime,しらゆき ひめ / 白雪姫。
- 韓國話:Baekseol gongju,諺文轉寫係 백설 공주。
- 中文名:白雪公主
《白雪公主》源自民間故事,所以坊間有流傳多個唔同版本。某啲版本可能同以下嘅大要有明顯出入[1][3]。
白雪嘅身世
[編輯]個故仔開頭係一個白雪紛飛嘅冬天晏晝,喺一笪遙遠嘅地方有座城堡,城堡嘅女皇坐咗喺窗邊做縫紉,做做吓佢唔小心拮親手指,流咗幾滴血出嚟。佢望住紅色嘅血、白色嘅雪同埋黑色嘅窗框,就喺度諗:
「 | 」 |
過咗一段時間之後,女皇生咗個女,個女嘅名就叫做白雪。女皇喺生產過程當中有困難而死咗[註 2]。國王喺一年後娶咗個新嘅老婆做白雪嘅後抵乸,後抵乸女皇生得好靚,但佢份人心哋唔好仲會用巫術。依個惡毒嘅新女皇擁有一塊魔鏡。惡毒女皇朝朝早都會同塊魔鏡講嘢,問佢:
魔鏡次次都會噉答:
- 「我親愛嘅女皇,你就係世界上最靚嘅。」
魔鏡唔識講大話,所以惡毒女皇每次聽到個答案都會好開心。
|
逃離城堡
[編輯]隨住白雪公主慢慢長大,佢親生母后嘅心願好明顯達成咗-白雪公主肌膚好似雪咁白,朱唇好似血咁紅,而秀髮就好似酸枝木咁黑。到咗白雪 7 歲嗰陣,個個都睇得出佢第時會係個大美人。有一朝,惡毒女皇一如既往噉同魔鏡講嘢,問世界上邊個最靚,魔鏡噉答:
- 「我親愛嘅女皇,你個繼女白雪公主係世界上最靚嘅。」
惡毒女皇聽到第一個反應係難以置信。心生妒忌嘅佢開始憎白雪公主。過咗一段時間之後,惡毒女皇決定要殺白雪公主,於是佢搵咗個獵人返嚟,叫獵人帶白雪公主入森林然後殺咗佢。佢仲特登叫獵人攞白雪公主嘅心臟返嚟,證明白雪公主死咗。有啲版本仲話,惡毒女皇打算食咗白雪公主嘅心臟,令自己長生不死。
獵人聽惡毒女皇話帶住白雪公主入森林。入到咁上下,獵人就攞起一把匕首想殺白雪公主,不過佢發覺自己唔忍心落手,跟住仲將成件事講嗮畀白雪公主知。白雪公主聽到,覺得好錯愕,
|
白雪公主一路係噉跑,最後喺森林深處搵到一間屋仔。白雪公主又驚又攰又肚餓,就上前去敲門。無人喺屋企。但白雪公主一推開道門見到檯上面擺滿嗮嘢食又有美酒,佢飢腸轆轆就忍唔住攞咗啲嘢食嘢飲嚟充飢,然後佢覺得好攰就搵咗張舒服嘅床攤上去,攤吓攤吓睏著咗。
無幾耐,間屋仔嘅主人返到嚟-間屋嘅主人原來係七個小矮人。班小矮人發覺自己啲嘢食嘢飲畀人掂過嚟,然後就搵到睏著咗嘅白雪公主。白雪公主醒咗見到班小矮人,心知自己問都唔問就又飲又食係唔啱嘅,於是就道歉,仲向班小矮人解釋埋成件事嘅來龍去脈。班小矮人得知惡毒女皇噉樣嚟糟質白雪公主,就覺得好同情,肯收留白雪公主。心懷感激嘅白雪公主想報答班小矮人,決定要幫佢哋打理家頭細務。
班矮人叮囑白雪公主,叫佢自己一個人喺屋企嗰陣(班小矮人朝頭早會去山度採礦)要小心,唔好畀任何人入屋。
|
公主大個咗
[編輯]白雪公主一路同班小矮人住一路慢慢噉長大。一如所料,大個咗嘅白雪公主真係個絕世美女,而且佢唔只靚,仲心哋好好又落力做嘢,班小矮人都好鍾意佢。喺依個時候,惡毒女皇以為白雪公主死咗好耐,慣常噉企喺魔鏡面前問魔鏡:
- 「魔鏡魔鏡牆上嘅魔鏡,依個世界上邊個最靚?」
魔鏡好老實噉答,話白雪公主係世界上最靚嘅,而且仲話埋畀惡毒女皇知白雪公主喺啲小矮人度住。
|
惡毒女皇聽到就好扯火,決定要親自殺白雪公主。佢假扮成一個普通嘅阿婆,趁住班小矮人去咗採礦,走去森林屋仔嗰度。惡毒女皇一敲門就見到白雪公主,惡毒女皇聲稱話自己係商販,手上有啲好靚嘅蘋果-啲蘋果其實落咗毒。惡毒女皇將個蘋果切開,乾淨無毒嗰邊就自己食,食完佢就將有毒嗰邊遞畀白雪公主,白雪公主覺得啲蘋果真係幾靚,就接受阿婆嘅禮物。點知白雪公主咬咗一啖,跟住就暈低咗。惡毒女皇大笑住噉返城堡[註 5]。
|
|
班小矮人返到嚟搵到不省人事嘅白雪公主,叫極都唔醒,就即刻將白雪公主抬上床上面急救,但無論佢哋做啲乜,都救唔返白雪公主。班小矮人諗住白雪公主死咗,於是就喊住噉將白雪公主放喺一個擺滿嗮花嘅玻璃棺材裏面,準備同白雪公主搞喪禮。
班小矮人喺森林入面同白雪公主舉行喪禮。咁啱得咁橋有個王子打獵路過[註 6][6],佢見到白雪公主咁靚就停低望咗陣,仲問班小矮人發生咗咩事。班小矮人將成件事講嗮畀王子聽。王子聽到就提出,應該要帶白雪公主返去城堡(白雪公主家族世居嘅地方)嗰度安葬先至合理。於是王子、小矮人同埋王子啲僕人就郁手將白雪公主嘅棺材搬返去城堡。搬搬吓,王子其中一個僕人唔小心差錯腳,搞到個棺材震咗一吓。點知噉樣震咗吓,就令到白雪公主由喉嚨嗰度
|
最尾嘅結局
[編輯]在場嘅眾人見到白雪公主奇蹟返生,就好開心喺度又嗌又跳。跟住白雪公主同王子一見鍾情,王子仲即場求婚。白雪公主接受。於是王子就同佢啲僕人話要郁手搞最盛大嘅婚禮。
同時返咗城堡嘅惡毒女皇諗住自己奸計得逞,就問魔鏡:
- 「魔鏡魔鏡牆上嘅魔鏡,依個世界上邊個最靚?」
魔鏡話,佢見到有個王子,個王子娶咗個好靚嘅新娘,個新娘生得靚過惡毒女皇。惡毒女皇聽到簡直不敢相信,於是就走咗去依位王子嘅婚禮嗰度,想知個新娘係何方神聖。
惡毒女皇一到咗婚禮現場,見到個新娘就係白雪公主,就又嬲又驚。佢即刻開始度橋,想諗新計整死白雪公主。不過王子已經知佢想點,於是就同在場嘅人開口,話惡毒女皇嘗試謀殺白雪公主,理應要受到懲罰。然後佢就下令,叫佢啲手下準備一對用鐵造嘅鞋,對鐵鞋搵火燒到又紅又熱。熱到咁上下,王子就命令啲士兵迫惡毒女皇著住對鐵鞋嚟跳舞,惡毒女皇承受火燒噉嘅痛楚一路跳,跳跳吓就躂低死咗[註 7]。
最後王子同白雪公主嘅婚禮就繼續和平噉進行,大團圓結局。
|
影響
[編輯]![](http://upload.wikimedia.org/wikipedia/commons/thumb/0/09/Snow_white_1937_trailer_screenshot_%282%29.jpg/300px-Snow_white_1937_trailer_screenshot_%282%29.jpg)
《白雪公主》係史上其中一個最出名嘅故事。到咗廿一世紀初,世界各地嘅大人同細路都會喺各種媒體度接觸到《白雪公主》或者改編自《白雪公主》嘅創作品,例如迪士尼嘅 1937 年動畫片《雪姑七友》(英文名叫 Snow White and the Seven Dwarfs —個故仔基於白雪公主)就舉世聞名,考慮埋通脹嘅話套戲係廿世紀其中一套票房最好嘅戲[7]。
除咗《雪姑七友》之外,仲有數唔嗮咁多套戲係取材自《白雪公主》嘅-例子可以睇吓 2012 年奇幻片《白雪公主之魔幻復仇記》、2016 年奇幻片《獵神:魔雪叛變》同埋 1955 年港產片《雪姑七友》... 呀噉。
黑暗版
[編輯]值得一提嘅係,有唔少創作者都有作《白雪公主》嘅黑暗版,例如
- 著名日本恐怖漫畫家伊藤潤二就有畫漫畫版《白雪公主》[2][8],個故仔講惡毒皇后因為妒忌白雪公主靚過佢而殺死白雪公主,但後嚟惡靈令白雪公主復活變成喪屍噉嘅樣。
- 亦可以睇吓著名美國作家尼奧基文(Neil Gaiman)喺 1994 年寫嘅恐怖短篇故仔《Snow, Glass, Apples》(粵文:雪、玻璃、蘋果)-依個故仔將白雪公主描繪成一隻好似吸血鬼噉嘅怪獸,同時又將後抵乸女皇描繪成忠嘅,講到後抵乸女皇點樣嘗試消滅吸血鬼但最後被監生燒死[註 8]。個故仔取得咗相當嘅成功,仲有畀人改編做美式漫畫[9]。
... 呀噉。
睇埋
[編輯]註釋
[編輯]- ↑ 唔少人覺得「好似血咁紅」有啲得人驚,所以將句嘢改做例如「朱唇好似車厘子咁紅」或者「朱唇好似玫瑰咁紅」。
- ↑ 唔同版本喺依個位有明顯差異。而家主流版本係話女皇喺生產途中死咗;而 1812 年原版係話女皇無死,但打後佢啲行為變到同後抵乸一樣。
- ↑ 標準英文版:"Mirror mirror on the wall, who is the fairest one of all?"
- ↑ 依度可能有翻譯問題。雖然依度譯做廣東話靚,但 fair 依隻字(嚟自古英文 fæger)攞嚟形容人嗰陣通常係特定噉指「靚得嚟皮膚白淨」嗰種靚。
- ↑ 查實原版有講,惡毒女皇三次嘗試謀害白雪公主,第三次用毒蘋果先成功。依篇文省略咗頭嗰兩次嘗試。
- ↑ 喺中世紀嘅歐洲,打獵係貴族男人之間一種常見嘅消遣,啲人認為打獵可以用嚟訓練射箭等嘅技能。
- ↑ 好多人都覺得依 paat1 暴力得滯,所以好多版本嘅故仔都會對依段做啲修改。例如迪士尼嘅《雪姑七友》就話惡毒女皇下場係跌落懸崖死。
- ↑ 個短篇故仔相當暴力而且有性愛描寫,唔啱細路睇。
引述
[編輯]- ↑ 1.0 1.1 Jacob Grimm & Wilhelm Grimm: Kinder- und Hausmärchen; Band 1, 7. Ausgabe (children's and households fairy tales, volume 1, 7th edition). Dietrich, Göttingen 1857, page 264-273.
- ↑ 2.0 2.1 5 Junji Ito Short Stories You Must Read (& 5 To Skip). CBR.com.
- ↑ Bruford, Alan and Donald A. MacDonald (1994). Scottish Traditional Tales Edinburgh: Polygon, pp. 98-106,有講到蘇格蘭版本嘅《白雪公主》。
- ↑ fair (adj.). Online Etymology Dictionary.
- ↑ Mirror, Mirror: Does 'Fairest' Mean Most Beautiful Or Most White?. npr.
- ↑ Gerard Brault (1985). "Hunting and Fowling, Western European". Dictionary of the Middle Ages, vol.6, pp. 356-363.
- ↑ "Top Lifetime Adjusted Grosses". Box Office Mojo.
- ↑ 伊藤潤二が独自の視点から「白雪姫」描く読切
- ↑ Classic Comic Compendium: Snow, Glass, Apples. The Beat.
拎
[編輯]![](http://upload.wikimedia.org/wikipedia/commons/thumb/4/4a/Commons-logo.svg/30px-Commons-logo.svg.png)