瑣羅亞斯德教
![](http://upload.wikimedia.org/wikipedia/commons/9/91/CIMRM_44-Mithraic_pater_%28Dura_Europos%29.jpg)
瑣羅亞斯德教(英文:Zoroastrianism),喺伊朗叫做馬茲達教(英文:Mazdaism),由於呢個教有個儀式係拜火,有啲人見到佢咁,所以就笑佢哋做「拜火教」,慢慢好多人亦叫瑣羅亞斯德教做拜火教,不過教徒強調佢哋係拜神唔係拜火,所以對拜火教呢個稱呼反感。呢個教係一個源自古波斯(即而家伊朗)嘅宗教,大約喺公元前6世紀產生,以二元神論作為基本教義,始創人瑣羅亞斯德。瑣羅亞斯德教相信,教主瑣羅亞斯德喺三十歲時得到「亞胡拉‧馬茲達」啟示,喺古代雅利安多神信仰基礎上,創立咗瑣羅亞斯德教。
瑣羅亞斯德教曾經係波斯入面最興盛嘅宗教,224年阿爾達希爾統一波斯建立咗薩珊王朝之後,瑣羅亞斯德教重一度成為波斯國教。
喺公元三至四世紀,瑣羅亞斯德教透過絲綢之路傳入中國,當時喺中國將瑣羅亞斯德教叫做祆教,唐時同景教、摩尼教合稱「唐代三夷教」。但到咗公元845年,唐武宗頒佈法令,打擊佛教,瑣羅亞斯德教亦受到連累,結果令瑣羅亞斯德教喺中國慢慢式微。
瑣羅亞斯德
[編輯]瑣羅亞斯德教相信,創教人瑣羅亞斯德其實來自天國,由於牛精古舒爾曼喺人間受盡折磨,畀人類欺壓同殘暴對待,於是向 阿胡拉‧馬茲達 求救,阿胡拉就問眾天神點解救,其中一個天神巴赫曼就提議畀熟悉教誨嘅瑣羅亞斯德幫手,但係牛精古舒爾曼似乎對瑣羅亞斯德無乜信心,認為瑣羅亞斯德太過柔弱,但瑣羅亞斯德仍然接受咗呢項任務。瑣羅亞斯德就因為咁而嚟到呢個世界傳教。
關於瑣羅亞斯德嘅史實問題,喺學術上仍然存在爭議,同其他有爭議嘅宗教人物,即係好似耶穌、佛祖咁,到底佢係咪真實存在嘅歷史人物,定係畀人神化咗嘅人?到而家仍然未有定論,就連瑣羅亞斯德出生喺邊個時代,都重仍然有好多唔同嘅講法。
火祆教
[編輯]![](http://upload.wikimedia.org/wikipedia/commons/thumb/f/f9/Sogdian-Zoroastrian_Deities%2C_Tunhwang.jpg/220px-Sogdian-Zoroastrian_Deities%2C_Tunhwang.jpg)
根據中國史學家陳垣(1880-1971)喺 1923年發表《火祆教入中國考》入面,對「祆1」字有咁考究過:
『曰天神,曰火神,曰胡天神,皆唐以前之稱。祆字起於隋末唐初,北魏南初時無有,魏書康國傳雖有祆字,然魏收書西域傳原佚,後人手持取北史西域傳補之。北史西域傳之康國傳,則又全採自隋書,故與其謂祆字始見於魏書,母寧謂祆字始見於隋唐。祆蓋唐初之新造字也』
由陳垣先生呢段考究見到,「祆」字係喺隋唐時代新造嘅字,而呢個字亦係專為瑣羅亞斯德教而設,唐代有好多外來文化同宗教,除咗瑣羅亞斯德教外,重有佛教、摩尼教、景教等,但只有瑣羅亞斯德教有專為佢而設嘅字,咁睇瑣羅亞斯德教喺唐代其實有某種程度影響力[1]。
聖火
[編輯]有人將瑣羅亞斯德教叫做拜火教,原因呢個教嘅主要宗教儀式,就係拜聖火,拜火嘅原因,係因為喺波斯神話入面,善神阿胡拉係用火嚟創造呢個世界,同時火亦代表住光明。
拜聖火通常都係喺火廟入面進行,一般敬拜儀式之前,教徒都會先洗面,然後再洗乾淨雙手同雙腳,之後先會開始敬拜儀式。儀式入面,教徒會將雙手放係身前,然後一邊睇住聖火,一邊念伽薩頌歌,深思頌歌嘅意義。成個過程大約有幾分鐘。
瑣羅亞斯德教將一日分成五個時辰,每個時辰都有一個神保護,所以教徒每日會祈五次禱。
火廟入面嘅聖火有好多唔同種類,有一種叫做勝利之火,要收集呢種火,要去搵齊幾種職業嘅人屋企嘅火,包括:金匠、銀匠、鐵匠、麪包師、牧羊人、武士,喺拎呢啲人嘅火之前,重要呢啲人先悔改,講明自己無同魔鬼接觸,或者已經唔再同魔鬼接觸,之後再經過思想上嘅淨化,達到三善境界,然後先會用呢啲火。收集之後,再經過禮拜,就可以供奉喺火廟入面,之後火廟會有專門嘅祭司睇住啲火,唔畀佢熄,一代一代咁傳。
除咗勝利之火,另外重有帶畀祭司力量同智慧嘅祭祀之火,又有帶畀戰士勇氣同毅力嘅戰士之火,同埋帶畀農民豐收嘅農業之火[2]。
思想同教義
[編輯]瑣羅亞斯德教嘅思想同教義,都係嚟自佢嘅宗教經典-波斯古經《阿維斯塔》,《阿維斯塔》唔單止係瑣羅亞斯德教思想同教義嘅基礎,佢嘅思想同世界觀,例如佢提倡嘅三善,到而家仍然係伊朗人所遵奉嘅道德規範。另外佢講嘅善惡二元論,對當代思想亦曾經有過好重要嘅影響。
二元對立
[編輯]七位一體
[編輯]塵世說
[編輯]三善
[編輯]來世說
[編輯]現代情況
[編輯]雖然瑣羅亞斯德教係起源喺波斯,即係而家伊朗,但自從喺公元7世紀波斯畀阿拉伯遊牧民族征服咗之後,啲人就開始改咗信伊斯蘭教,不過,瑣羅亞斯德教仍然對伊斯蘭教發生咗一啲影響,間接孕育咗伊斯蘭教什葉派。今日嘅伊朗,就只得返1.2%人係瑣羅亞斯德教教徒[3]。
不過由於古代波斯人因為打仗或者做生意等原因,而令瑣羅亞斯德教傳到世界各地,所以而家瑣羅亞斯德教教徒可以話係遍佈全世界,主要喺印度、巴基斯坦,除此之外重有喺美國、加拿大、澳洲等國家亦有瑣羅亞斯德教活躍,而喺香港亦有瑣羅亞斯德教嘅教會喺銅鑼灣。據統計而家全世界大約有二十萬瑣羅亞斯德教教徒,而當中以印度同伊朗嘅數目最多[4]。
瑣羅亞斯德教之所以越傳越少人,原因係由於傳統上瑣羅亞斯德教只可以傳畀波斯人,而唔會畀其他人入教。但由於各種原因例如打仗或者做生意咁,而令好多波斯人離開咗波斯去到第二個國家,呢啲波斯人去到第二個國家又搵唔返波斯人做配偶,而慢慢令瑣羅亞斯德教開始傳到畀其他唔係波斯人,而當中以印度人嘅數目最多,呢啲信咗瑣羅亞斯德教嘅印度人,又畀人叫做「巴斯人(Parsis)」。
伊朗派
[編輯]而家瑣羅亞斯德教分為主要兩個派系,分別係保守嘅伊朗派,同比較開明嘅帕爾西派。伊朗派堅持所有宗教聚會入面一定傳統儀式,同埋一定要用波斯話進行,對於唔係波斯人要入教,伊朗派完全無價講,絕對唔畀。
帕爾西派
[編輯]相對於伊朗派,帕爾西派比較開明,佢哋唔介意係宗教聚會入面用英文講道,而且亦比較願意革新,但同樣堅持唔會向外傳教,同唔會主動傳畀非波斯人,但如果有非波斯人要求入教,亦同樣歡迎,但條件係佢之前唔可以有其他宗教信仰背景,因為瑣羅亞斯德教認為,除非係一啲偽信宗教,否則所有宗教都係平等,每個人嘅宗教都係根據天使安排,喺出世前已經預備好,所以去改變一個人嘅信仰,等如違背上帝意志,係一種罪惡[5]。
註解
[編輯]- 註 1: 祆字根據黃錫凌《粵音韻彙》電子版,讀音係“牽”,參考:黃錫凌《粵音韻彙》電子版查祆字
參考
[編輯]- ↑ 《中古三夷教辨證》 北京中華書局 2005 ISBN 7101046010
- ↑ 《西域聖火─神秘的古波斯祆教》 人民美術出版社 ISBN 7102029306
- ↑ 中東國家通史伊朗卷 ISBN 7100033608/K 715
- ↑ Barlow, Rich (2007-01-06). Ancient religion may face extinction. Boston Globe. Retrieved on 2007-01-06.
- ↑ 《祆教史》 上海社會科學院出版社 1998 ISBN 7806184635
- 《阿維斯塔:瑣羅亞斯德教聖書》,商務印書館 ISBN 7100040841/B·593
- 《二元神論─古波斯宗教神話研究》,中國社會科學院出版社 1997 ISBN 7500421745
- Zoroastrians: Their Religious Beliefs and Practices ISBN 0415239036
拎
[編輯]![](http://upload.wikimedia.org/wikipedia/commons/thumb/4/4a/Commons-logo.svg/30px-Commons-logo.svg.png)