撻生魚

廣東人鍾意食生魚進補，響劏生魚之前，會將條生魚猛咁撻，撻到佢暈為止。呢個行為叫做撻生魚。

撻生魚嘅目的，係方便劏魚。因為生魚非常生猛，離水幾個鐘頭都唔死，唔撻暈佢，劏嗰陣時就會掙扎，好難舞得佢掂。

不過，一般廣東人就唔係咁諗：佢哋撻生魚，係為咗避免食錯「化骨龍」而死。化骨龍係傳聞中嘅生物，外表極之似生魚，只係多咗四隻腳。但係化骨龍平時會縮埋佢啲腳，扮生魚扮到十足十，要到暈咗先致會伸返啲腳出來。所以廣東人劏生魚之前，要撻暈條魚，睇下佢會唔會凸返啲腳出來，見唔到有腳，先致敢劏來食。