1956年夏季奧林匹克運動會
1956年夏季奧林匹克運動會係第16屆現代奧林匹克運動會，1956年11月22號到12月8號喺澳洲墨爾本搞；由於牲口入境檢疫問題嘅關係，呢屆奧運會嘅馬術比賽改咗喺瑞典嘅斯德哥爾摩搞，日期係6月11號到6月17號。
呢屆奧運會，一共有72個國家同埋地區嘅代表團參加，當中埃塞俄比亞、斐濟、肯尼亞、利比利亞、馬來亞聯合邦、北婆羅洲、烏干達、柬埔寨都係第一次派代表團參加奧運會。另外，有5個國家代表團淨係參加响斯德哥爾摩舉行嘅奧運馬術比賽，包括柬埔寨、埃及（之後因為忙於應付蘇彝士運河危機）、西班牙、荷蘭、瑞士（因為佢哋抗議蘇聯入侵匈牙利，而冇派選手去墨爾本）。
背景
編輯呢個係奧運史上，第一次响澳洲舉辦嘅奧運會，同時亦係第一次喺南半球同埋大洋洲國家舉辦。由於墨爾本係南半球嘅溫帶地區，喺7至9月嗰陣重係冬季，天氣寒冷。因此嗰次奧運會亦改至南半球嘅初夏，即係11至12月期間舉行，亦係奧運史最遲開幕嘅夏季奧運會。
賽事焦點
編輯- 喺12月6號舉行嘅水球決賽，分別由匈牙利男子水球隊同埋蘇聯男子水球隊爭冠，雙方比賽中多位球員大打出手，搞到成面都係血，呢場比賽最後匈牙利隊贏蘇聯隊4比0，贏得金牌，賽後媒體因影到匈牙利水球員沙度·艾榮（Zádor Ervin）喺賽後右眼角流血嘅場景，叫做「水中血戰」。
- 中華民國呢屆以「福爾摩沙—中國」嘅名義參賽。9月14號，中國國民黨中央委員會副秘書長鄧傳楷擔任第16屆夏季奧運會嘅中華民國代表團團長，率團响10月18號飛抵澳洲墨爾本，29號抵達悉尼奧運會新村，奧運會第一次响歐美以外嘅其他洲舉行。
- 二次大戰後，德國分裂為東德、西德。由於東德奧委會比西德遲申請入會，因此1955年嘅國際奧委會喺巴黎召開大會，向東德提出聲明：「如果1956年墨爾本奧運裏面，東西德能夠合組代表隊參賽，東德奧委會就可以入會。」正因為咁，東西德分裂嘅兩個國家首度合組為一個代表團參賽，叫做「德國聯隊」，代表團國歌以貝多芬嘅「第九號交響曲」當中嘅「歡樂頌」代替，國旗以德國旗中央畫上奧運五環代替。
- 中華人民共和國同埋中華民國一樣亦有會籍問題，1952年喺挪威奧斯陸舉行嘅國際奧委會大會上，台海問題成為討論嘅焦點；1954年喺雅典經由國際奧委會嘅投票表決，認定「北京嘅中國奧委會（中華全國體育總會）係代表中國唯一嘅正式奧林匹克運動機構」，但係國際奧委會主席布倫達治同時講到明：「除咗承認北京嘅中華全國體育總會，亦都承認喺台北設有國際奧委會分部嘅中華全國體育協進會嘅資格」。之但係，1954年先至被國際奧委會認可正式加入會員嘅中華人民共和國，喺呢屆奧運前唔允許中華民國使用國旗、國歌、國號參加奧運，但喺墨爾本奧運嘅選手村入面，仍然升起青天白日滿地紅旗，呢種舉動激嬲北京當局，搞到中華人民共和國宣佈退出呢屆奧運，直到1984年先至再次亮相夏季奧運會。
- 蘇聯體操皇后拉迪妮娜响呢屆奧運，為蘇聯贏得4面金牌（女子團體、女子個人全能、女子跳馬、女子自由體操）。