გუდაუთა
![](http://upload.wikimedia.org/wikipedia/commons/thumb/8/8b/Stop_hand.svg/40px-Stop_hand.svg.png)
ნოღა
გუდაუთა
Гәдоуҭа
|
გუდაუთა — (აფხ. Гəдоуҭа) ნოღა საქორთუოს, აფხაზეთიშ ავტონომიურ რესპუბლიკას. რე გუდაუთაშ რაიონიშ ადმინისტრაციული ცენტრი. იდვალუაფუ უჩა ზუღაშ პიჯის რზენს, 37 კილომეტრით ოორუე-ბჟადაალშე სოხუმშე, წყარმალუ გვიდოუშ ნადუწკჷმა. ნოღაშ სტატუს მეჩეს 1926 წანას. 1991 წანაშ მუნაჩემეფით, ნოღაშ მახორობა რე 15 300 კოჩი. გუდაუთას რე ცხუმ-აფხაზეთიშ ეპარქიაშ რეზიდენცია.
გუდაუთას, ბომბორაშ აეროპორტის სხუნუეფიშ პერიოდის რდჷ სხუნუეფიშ ოჰაერე დუდიშთხილუაშ ნძალეფიშ ბაზა. რგილ ლჷმაშ ბორჯის ოურდუმე ავიაციაშ 171 დო 529 დივიზიეფიშ სუ-27 ტიპიშ ავიამოიერიშეეფი გილაფურინჷნდეს. 1992-93 წანეფიშ აფხაზეთიშ კონფლიქტიშ ბორჯის გუდაუთა რდჷ აფხაზ სეპარატისტეფიშ თარი ბაზა საქორთუოშ თარობაშ ნძალეფწკჷმა ლჷმას.
სხუნუეფიშ რსხუშ ფაჩუაშ უკული ბომბორაშ ავიაბაზაქ რუსეთიშ ოურდუმე ბაზათ გეგნიკეთჷ, უკულ მა-10 დუდიშული ორჩქალე ოჰაერე დივიზიაშ ბაზათ. თე გიმენგჷნორთი ომორჩილჷდჷ რუსეთიშ გენერალურ შტაბის.
1999 წანას ავიაბაზაშ ეკიპირებაშა მიშეშჷ 142 AIFV/APC (თენეფ შქას 62 BMD-1 დო 11 BMD-2) დო 11 self- propelled ოარტილერიე სისტემა 2S9 "Nona-S". თე ბაზაქ ართ-ართ დიდი როლი ილაჸაფჷ აფხაზეთიშ კონფლიქტიშ ბორჯის. ქორთული განიშ დო ბრელი ბჟადალური დუდიშული ექსპერტიშ ნტკიცებათ, გუდაუთაშ ბაზა თარი ოურდუმე ალმარინჯე რდჷ აფხაზ სეპარატისტეფშო 1992-93 წანეფს. 1995 წანას საქორთუოქ აძვილებურქ იჸუ რუსეთშა ლეგიტიმური სტატუსიშ მეჩამაშე თე ბაზაშ ლიზინგშე.
1999 წანაშ სტამბოლიშ ეუთოშ სამიტის რუსეთიქ დეალჷ ბაზაშ კილუას დო მუშ ჯარეფიშ დო ოურდუმე ტექნიკაშ გჷშაჸონაფას. თეშ უკული თე ბაზა დსთ-შ ქიანეფიშ საშვიდობოეფიშ გჷმორინაფას სქჷდუდჷ. აფხაზეთიშ დე-ფაქტო თარობაქ დობლოკჷ ეუთოშ ინსპექტორეფიშ ვიზიტი დო თეშ უკულ ტექნიკაშ გჷშაჸონაფაშ ახალი თარიღი ვადოდგინელე.
2008 წანაშ მარაშინათუთაშ ლჷმაშ უკული რუსეთიქ ჩინებულ ჸუ აფხაზეთიშ ზოხორინა დო სეპარატისტულ თარობა დო რუსეთიშ თარობას შქას დოდვალირქ იჸუ ართმაჟირაშ მოხვარაშ ხეშაკოკირუაქ, ნამუშ მეჯინათ რუსეთის შეულებუ გუდაუთაშ ბაზაშ გჷმორინაფა.