OMS ye fɛɛrɛ kuraw bila sen kan koronabana gɛlɛli hokumu kɔnɔ
Koronabana kunbɛnni ko la, diɲɛ kɛnɛyaso tɔnba, OMS ye fɛɛrɛ kura dɔ sigi sen kan bana in kɛlɛli kaman fanta jamanaw. O kaman, tɔn y'a laɲini walasa miliyari 23 ɲɔgɔn k'a bila a ka bolo kan kalo 12 nataw la.
A jɛnsɛnna :
k'a lamɛn - 01:02
Nin weelen kan lase kɛrɛnkɛrɛnyala diɲɛ seetigijamana 20 ma, olu min k’a kan k’u ka lajɛrɛ dɔ kɛnɛ sigi nin dɔgɔkun furancɛ in na Rome Italie faaba la.
Diɲɛ kɛnɛyako tɔnba ɲɛmɔgɔ Tedros Adanon Ghebreyesus k’a dantigɛli kɔnɔ kunu, a y’a laɲini seetigijamana ninnu fɛ u ka tɔn in dɛmɛ ni miliyari 23, ni murumuru ye yasa a ka fɛɛrɛ jɔnjɔnw bila senkan Fanta jamanaw kɔnɔ, ka koronabana kɛlɛ koɲuman. Laɲini ye k’o fɛɛrɛw boloda kalo 12 nataw kɔnɔ.
Tɔn in ɲɛmɔgɔ y’a ka jɔrɔ yira k’a ɲɛsin koronabana sɛgɛsɛgɛliji ‘’test’’ ko la ani boloci-furaw, o min dɛsɛlen bɛ misaliyala fantajamanaw kɔnɔ.
An bi lon min i ko bi‘’seringue’’ fana tɛ k’a bɔli kɛ jamana dɔw kɔnɔ yasa ka mɔgɔw boloci, a kɛra koronabana ta ye walima bana wɛrɛw.
Tedros Adanom Gebreyesus ye kankari da jamana ɲɛmɔgɔw ye, ko danfara min bɛ jamanaw cɛ korona sɛgɛsɛgɛlijii ani boloci-furaw sɔrɔli ko la, k’o ye degun dɔ ye bana in kɛlɛli la diɲɛ kɔnɔ, wa k’a bi se k’a kɛ sababu ye koronabana sugu wɛrɛ bɛ bange diɲɛ fan wɛrɛw fɛ.