ನಾನು ಆರಂಭದಿಂದ ಗಮನಿಸಿರುವ ಉತ್ತಮಾಂಶವೆಂದರೆ ಪ್ರಜಾವಾಣಿಯು ಒಂದು ಕ್ಷೇತ್ರ ಅಥವಾ ಒಬ್ಬ ವ್ಯಕ್ತಿಗೆ ಅತಿಯಾಗಿ ಅಂಟಿಕೊಳ್ಳದೆ ಮತ್ತು ಆತುಕೊಳ್ಳದೆ ಸಮದೃಷ್ಟಿಯಿಂದ, ಒಂದು ನಿರ್ದಿಷ್ಟ ಅಂತರದಿಂದ ನೋಡುವ ಕ್ರಮ. ಅದು ಸದೂರ ಉಳ್ಳ ಸಮಚಿತ್ತದ ಆರೋಗ್ಯಕರ ನೋಟ ಕೂಡಾ. ಇದು ಪ್ರಜಾವಾಣಿಗೂ ಕನ್ನಡ ಸಿನಿಮಾಗೂ ಅನ್ವಯ. ಕನ್ನಡ ಸಿನಿಮಾದ ಅಂದಿನ ‘ಕಲಾತ್ಮಕ ಹೊಸ ಅಲೆ’ ಮತ್ತು ಇಂದಿನ ‘ಕಮರ್ಶಿಯಲ್ ಹೊಸ ಅಲೆ’ಗಳೆರಡೂ ವಿಶ್ವದ ಗಮನ ಸೆಳೆದಿವೆ. ಇದಕ್ಕೆ ನಾವು ಹೆಮ್ಮೆಪಡುತ್ತಲೇ ಎಚ್ಚರದಿಂದ ಇರಬೇಕಾಗಿದೆ. ಕೆಜಿಎಫ್ ಮತ್ತು ಕಾಂತಾರಗಳಂಥ ಚಿನ್ನದ ನವಿಲುಗಳನ್ನು ನೋಡಿ ಬಡಕೆಂಬೂತಗಳು ಪುಕ್ಕ ಕಿತ್ತುಕೊಳ್ಳಬಾರದು. ಗುಣಮಟ್ಟವೊಂದೇ ನಮಗಿರುವ ಏಕೈಕ ಉಳಿವಿನ ಮಾರ್ಗ. ಉಳಿದದ್ದು ಪ್ರೇಕ್ಷಕ,ಕಾಲ ಮತ್ತು ಮಾಧ್ಯಮಗಳಿಗೆ ಬಿಟ್ಟದ್ದು. ಪ್ರಜಾವಾಣಿ ನಮ್ಮ ಕನ್ನಡ ಸಿನಿಮಾದ ಸಹಯಾತ್ರಿಯೂ ಹೌದು; ಹಿತೈಷಿಯೂ ಹೌದು.

ನಾಗತಿಹಳ್ಳಿ ಚಂದ್ರಶೇಖರ್,
ನಿರ್ದೇಶಕರು

‘ಇದು ಪ್ರಜಾವಾಣಿಯ ಜತೆಗಿನ ಹಳೆಯ ಋಣ ಅನಿಸುತ್ತದೆ. ಮುಂಬೈನಲ್ಲಿ ನಾಟಕಗಳಲ್ಲಿ ಅಭಿನಯಿಸುತ್ತಿದ್ದೆ. ಆ ಸಂದರ್ಭದಲ್ಲಿ ಬೆಂಗಳೂರಿಗೆ ಬಂದಾಗ, ಪ್ರಜಾವಾಣಿ ಕಚೇರಿಗೆ ಬರುವಂತೆ ದೂರವಾಣಿ ಕರೆ ಬಂದಿತು. ಅಲ್ಲಿ ವೈ.ಎನ್‌. ಕೃಷ್ಣಮೂರ್ತಿ ಸುದ್ದಿ ಸಂಪಾದಕರಾಗಿದ್ದರು. ಅವರನ್ನು ಭೇಟಿ ಮಾಡಿದೆ. ಅವರು, ಜಿ.ವಿ.ಅಯ್ಯರ್‌, ಗಿರೀಶ ಅವರು ಸೇರಿ, ಪಿ.ವಿ. ನಂಜರಾಜ ಅರಸು ನಿರ್ದೇಶನದ ‘ಸಂಕಲ್ಪ’ ಸಿನಿಮಾದಲ್ಲಿ ಅವಕಾಶ ಕೊಡಿಸಿದರು.

ಅನಂತನಾಗ್‌,
ನಟ

ಇದು ಬರಿ ಪ್ರಶಸ್ತಿ ಅಲ್ಲ, ‘ಪ್ರಜಾವಾಣಿ’ ನೀಡುವ ಪ್ರಶಸ್ತಿ. 75 ವರ್ಷಗಳ ಇತಿಹಾಸ ಇರುವ ವಿಶ್ವಾಸಾರ್ಹತೆಯನ್ನು ಕಾಪಾಡಿಕೊಂಡು ಬಂದಿರುವ ಪತ್ರಿಕೆ ‘ಪ್ರಜಾವಾಣಿ’. ಉದಯೋನ್ಮುಖ ನಟ-ನಟಿ, ನಿರ್ದೇಶಕರು, ತಂತ್ರಜ್ಞರಿಗೆ ಈ ರೀತಿಯ ಪ್ರಶಸ್ತಿ ತುಂಬಾ ಮಹತ್ವದ್ದು. ‘ಪ್ರಜಾವಾಣಿ’ ಮೊದಲ ಸಲ ಸಿನಿ ಸಮ್ಮಾನ ಪುರಸ್ಕಾರ ನೀಡಿದೆ. ನಾನು ನಿರೀಕ್ಷಿಸಿದ್ದಕ್ಕಿಂತ ಅಚ್ಚುಕಟ್ಟಾಗಿ, ಅದ್ದೂರಿಯಾಗಿ ಸಮಾರಂಭ ನಡೆಯಿತು. ಫಿಲಂಫೇರ್ ಪ್ರಶಸ್ತಿ ಸಮಾರಂಭವನ್ನು ನೋಡಿದ್ದೆ, ನಿರೂಪಿಸಿದ್ದೆ. ಕನ್ನಡದ ಪತ್ರಿಕೆ ಕೂಡ ಅದೇ ಮಟ್ಟಕ್ಕೆ ಕಾರ್ಯಕ್ರಮ ಆಯೋಜಿಸಿದ್ದು ತುಂಬಾ ಖುಷಿ ತಂದಿತು.

ರಮೇಶ್‌ ಅರವಿಂದ್‌,
ನಟ

‘ಪ್ರಶಸ್ತಿ ಪಡೆಯುತ್ತಿರುವುದಕ್ಕೆ ಒಂದು ಕಡೆ ಸಂತೋಷ, ಇನ್ನೊಂದೆಡೆ ಭಯ ಕೂಡ ಇದೆ. ನಾನು ಸಾಕಷ್ಟು ಪ್ರಶಸ್ತಿಗಳನ್ನು ಪಡೆದಿರುವೆ. ಆದರೆ ‘ಪ‍್ರಜಾವಾಣಿ’ ಎಂದರೆ ಘನತೆ, ಗೌರವ, ಹಿರಿತನವಿದೆ. ಇಂತಹ ಪತ್ರಿಕೆ ನೀಡುವ ಪ್ರಶಸ್ತಿ ಪಡೆಯುತ್ತಿರುವುದಕ್ಕೆ ಧನ್ಯತಾ ಭಾವವಿದೆ’

ಉಮಾಶ್ರೀ,
ನಟಿ