Pened de ‚Paulus‛ elanes di Colossae

KAPIT: I

‚Paulus‛, sekü vil Goda paostolan Yesusa: Kristus, e hisvist: ‚Timotheus‛,
svistes saludik ä fiedikes in Kristus tö ‚Colossae‛. Benäd e püd binonsös lü ols de God: Fat obas e de Söl: Yesus Kristus!
Ai plekölo demü ols danobs Godi: Fat Söla obsik: Yesus Kristus,
bi elelilobs lekredi olsik in Kristus: Yesus, e löfi olsik pro saludans valik,
demü spel pro ols in süls pekipedöl, e dö kel büiko elilols dub predam verata gospula,
kel ekömon lü ols, leigoäsä ini vol lölik, e kö fruton e progedon, leigoäsä bevü ols, de del, kü elilols oni ed edasevols verato benädi Goda.
Leigoso elärnols oni fa ‚Epaphras‛: hikedünan palöföl obsik, kel binom pro ols hidünan fiedik Kristusa,
keli enunom obes löfi olsik fa Lanal pelanälüköli.
Sekü atos de del, kü elilobs atosi, no estopedobs ad plekön e lebegön pro ols, dat fulikolsös me sev vila omik in sap valik e dasev lanöfik,
dat kondötolsös digädiko lo Söl, ad plitön omi in tefs valik, ko vobods gudik frutöl e sev ai gretikumöl Goda,
dat nämikolsös mu vemo ma näm glora omik, ad lesufön fredo valiko sufäd e lunasufäl,
dat danöfolsös lü Fat, kel efägükom olis ad kompenön pö gerot saludanas lita;
kel eramenom obis se nämäd daga, ed epladom obis ini regän Sona palöföl omik,
in kel labobs lelivükami, stiami de sinods,
kel binom mag Goda nelogädik, balidmotäb jafotema lölik,
bi in om val pejafon, kel binon in süls e kel binon su taled, dins logädik e nelogädiks, lindifo va binons trons, reigs, cifods u nämäds; val pejafon fa om e lü om,
edavedom bü dins valik, e val dabinon in om,
binom i kap koapa, cif komota. Binom prim, balidmotäb se deadans, dat öbinom tefü dins valik balidan,
ibä God äplidom ad leadön stebön fuli lölik okik in om,
ed ad rekosilön dub om ko ok vali, dubä kodom püdi dub blud omik len krod, si! dub om rekosilom vali, kel binon su taled ed in süls.
I olis, kels äbinols ettimo foginiks e ma meug olsik e kodü vobods badik olsik, nefleniks,
in koap midik omik dub krodam, dat dajonolsös olis saludiko, kliniko e neblamabiko foi om,
if nemu tefü lekred bleibols pastabön fimiko, e no perols speli in gospul, keli elilols, kel penotükon jafäbes valik dis sül, kelas ob: ‚Paulus‛ evedob hidünan.
Nu fredob, das sufob pro ols, e läfulükob me suf obik dränäli Kristusa demü koap omik, kel binon komot.
Evedob hidünan oma ma büad Goda, cal kelik pegivon obe demü ols ad fölön predami vöda Goda:
müster dü tumyels pö menäds valik peklänedöl, kel nu ye pesevädükon saludanes okik.
Ones God evilom ga notükön, kis lieg glorik müstera binon pro pagans, sevabo, das Kristus binom bevü ols: spel in beat.
Predobs omi, stigädobs meni alik e tidobs mene alik sapi valik, dat pladobsös alani onas lölöfiko in Yesus lekredöli lo God!
Pro atos töbidob, komipölo ma näm omik, kel vobedon nämädiko in ob.

KAPIT: II

Vilob ga, das sevols, me komip viogretik komipob pro ols, pro elans di ‚Laodicea‛, e pro utans, kels no elogons obi pösodiko,
dat ladäls olsik patrodonsös, dat ols dub löf pebalöls süadolsös susliegiko tefü sev lölöfik e dasev müstera Goda: Kristus,
in kel divs valik sapa e seva peklänedons.
Sagob atosi, dat nek olas pakofudükonös dub spikäds bätodik!
Ibä do binob koapiko fagik de ols, lanöfiko ye binob lä ols, du fredob, ven logob jästädi pötöfik olsik e fümi lekreda olsik in Kristus.
Kondöt olsik binonöd kludo baiädü utos, kelosi elüsumols de Söl: Yesus Kristus!
Bleibolsöd labön vulis e stabi in om, binolsöd fümiks in lekred, baiädü utos, kelosi elärnols, e danolsöd ai bundaniko!
Küpälolsöd, das nek midugon olis dub filosop, e dub lugs cütik, kels stabons su vönaoloveikods menas, e natanäms, e no su lejon Kristusa!
Ibä ful lölik Godäla lödon koapiko in om,
ed ols kompenols pö ful Godälik oma, kel binom sus reig e nämäd aliks.
I pesäprepüdols in om, fe me säprepüdam no dub nams pedunöl; dub klem koapa midik esufols säprepüdami in Kristus.
Dub bluned pesepülols ko om, e pelelifükols i ko om dub lekred in näm Goda ad lelifükön omi se deadans.
I olis, kels äbinols deadiks demü nefölots olsik, e no säprepüdam midik olsik, ekelelifükom ko om; epardom obes nefölotis valik.
Eduliunom debaröti negönü obs labü büdüls onik, kels äneletons obis. Enosükom oni, dubä efimaklufom oni leni krod.
Esäklänedom reigis e nämädis, ed edajonädom onis notidiko, e dub atos evikodom onis.
Nek cödonöd kludo olis tefü fid e drin, ni tefü zel zäla, u nulamuna, u jabatas!
Atos valik binon jadamagots dinas fütürik; koap voik binon Kristus.
Kälälolsöd, das nek desumon mätapremi de ols, dubä steifon ad dagetön ati me mük e kult silananas, dubä stäatikon sekü dins, kelis no elogon, du svolükon vaniko oki in meug midik okik,
nes dakipön kapi, se kel koap lölik me yoins e tans ad lölot gudik pekoyümöl glofon me glof Godik!
Ven nu edeadols ko Kristus ed evedols livätiks de natanämäds, sekü kis leadols-li täno, äsva lifols in vol, bligädön oles büdülis,
No gleipolöd! no gutolöd! no doatolöd!
(atos valik opäridikon dub geb). Binons büds e tidods menas.
Dins valik at binons cedisag, kel labon fe sapi tefü kult lönik, mük, e nespaläl koapa, ab no labons völadi anik pö föl desira midik.

KAPIT: III

Ven nu pelelifükols ko Kristus, sukolsöd täno utosi, kelos binon löpo, utöpo, kö Kristus binom, seadölo detü God!
Betikolsöd utosi, kel binon löpo, no utosi, kelos binon su taled!
Ibä edeadols, lif olsik peklänedon ko Kristus in God.
If nu Kristus, kel binom lif obsik, odasevädikom, tän i ols odasevädikols ko om in glor.
Deidolsöd kludo utosi, kelos binon in limeds taledik olsik: nepued, neklin, lefäk, desir badik, e labiäl, kel binon lugodikult.
Atos valik süükon pö God zuni ta utans, kels binons nelobediks.
So i ols äkondötols, ven nog älifols in döfäds at.
Ab nu i ols klemolsöd atosi valik: zun, vut, badäl, slän; vöd bapik no sekömonöd se muds olsik!
No lugolsöd ta ods! bi edeükols meni büik sa dunis onik,
ed elenükols meni nulik, kel penululon ad dasevön ma mag jafala okik.
Tän no dabinons Helänans e Yudänans, säprepüdäbs e prepüdilabans, barbarans e Skütänans, slafans e libans, ab Kristus binom val ed in val.
Klu lüsumolsöd, as saludans pevälöl ä palöföls Goda, ko ladäl keliedöl flenöfi, müki, sofäli, lunasufäli!
Sufälolsöd odis, e pardolsöd odes, if ek labon blameti ta votan! (äsä Kristus epardom oles, dunolsöd i so)!
Ab bü val labolsöd löfi, kel binon tan nendöfa!
E püd Kristusa dareigonöd in ladäls olsik, ad kel pevokols as dils koapa bal! E binolsöd danöfiks!
(Vöd Goda stebonöd bundano in ladäls olsik)! Tidolsöd e devodükolsöd odis sapo, e kanitolsöd ko plid in ladäls olsik stimü God psamis, hümis e lidis relöfik!
Ed alutosi, kelosi dunols ma vöd e vobod, dunolsöd vali nämätü Yesus, medamü kel danolsöd Godi: Fat!
O voms! binolsöd sumätöfiks lü himatans olsik, soäsä sötos me büad Söla!
O mans! lelöfolsöd jimatanis olsik, no biedälolsöd ta ofs!
O cils! lobedolsöd palis olsik in dins valik! ibä atos pliton Söli.
O fats! no skänolsöd cilis olsik, dat no peronsös kuradi!
O slafans! lobedolsöd in dins valik mastanis taledik olsik, no äsä lusumätans ad plitön menis, ab in balug ladäla, sekü dalestüm lü Söl!
Kelosi bo dunols, dunolsöd utosi ladöfo, äsva dunols osi pro Söl e no pro mens!
Bi sevols, das ogetols de Söl as bläfod geroti; binolsöd slafans Söla: Kristus!
Ibä utan, kel dunon negidiko, ogegeton mesedi negida okik. Paletöf no dabinon.

KAPIT: IV

O mastans! Dunolsöd gidiko e nepaletöfiko kol slafans olsik, sevölo das i ols labols mastani in sül!
Laidälolsöd in plek ko galäl e danöf!
Plekolsöd leigüpiko pro obs, dat God maifükomös obes yani demü predam, dat notükobsös müsteri tefü Kristus, demü kelos pejänädob!
dat sevädükobös oni, soäsä mutob sagön oni!
Kondötolsöd sapiko kol utans, kels binons plödü komot! frutidolsöd pöti alik!
Spikam olsik binonöd ai plitik! sevolsöd, vio mutols gespikön alane!
Lio ob stadob, atosi valik ‚Tychicus‛: hisvist palöföl, hidünan fiedik ä kedünan in Söl, onunom oles.
Ebo demü atos elesedob omi lü ols, dat sevolsös dinädis obsik e trodomös ladälis olsik!
Ko om lesedob eli ‚Onesimus‛: hisvist fiedik ä palöföl, kelomänan olsik. Onünoms oles vali, kel jenon is.
Olis glidoms ‚Aristarchus‛: kefanäb obik, e ‚Marcus‛: hinef ela ‚Barnabas‛, tefü kel egetols büdülis. (Ven kömom lü ols, getedolsöd täno gudiko omi)!
e ‚Iesus‛, penäinemöl: ‚Iustus‛; atans binoms kevobans teik pro regän Goda, kels pesäprepüdoms; äbinoms trod pro ob.
Olis glidom ‚Epaphras‛: kelomänan olsik, hidünan Kristusa, kel ai pläidom olis in pleks okik, dat ols, as mens nendöfik äd edagloföls, laidälolsös in utos valik, kelosi God vilom!
Ibä temunob tefü om, das bligädom oke töbi mödik demü ols, demü elans di ‚Laodicea‛ e di ‚Hierapolis‛.
Olis glidoms flen obik: ‚Lucas‛: sanan palöföl e ‚Demas‛.
Glidolsöd svistis in ‚Laodicea‛, ed eli ‚Nympha‛ ko komot, kel kobikon in dom ofik!
Ven pened at puloreidon lä ols, koedolsöd täno loreidön oni in komot elanas di ‚Laodicea‛, e kudolsöd, das i ols dagetolsös reidio penedi se ‚Laodicea‛!
Sagolsöd ele ‚Archippus‛: Kälälolöd, das fölol gudiko cali, keli ebligädol ole in dün Söla!
Getolsöd patiko glidi de ob: ‚Paulus‛! Betikolsöd jänädis obik! Benäd binonöd lä ols!

(At pepenon in ‚Roma‛ lü elans di ‚Colossae‛ fa ‚Tychicus‛ ed ‚Onesimus‛).

---------- oOo ----------

Ninädalised