On filosof

Giovanni Chiverny (1812-1900)‎

On filosof

El Cont Triulz, andand a passeggià
de Milan finna a Sest squas tutti i dì
de spess ghe capitva de incontrà
on omm cont su di pagn strasc de no dì.
El sò mestee l'era menà porscej
fors no trovand alter mestee de mej.

Ona giornada, freggia come on biss,
se trœuven tutt e duu, cont e porchee:
e 'l primm, fermandes: "Tœu, me piasariss
savè", el ghe dis, "perbio, come te fee
a stà mezz biott con sto caligh baloss!
Mì senti i sgrisolon finna in di oss!"

L'alter, ridend, el ghe rispond: "Oh, mò,
ghe 'l spieghi mì el perchè: perchè i sò pagn
gh'i ha minga tutti indoss, e ghe n'ha anmò
dent in di guardarobb: i mee, de ragn,
invece i porti tutti". El gentilomm
de allora, l'ha soccors quell pover omm.