Dji vôreu tchanter Tcheslet (tecses)
Dji vôreu tchanter Tcheslet (Dji vôreu tchantér Tchèss’lèt…), c' est ene schôtlêye di tecses, des arimés et des prôzes, sicrîts pa Mile Limpreur, ey eplaidîs e 2012 (après s' moirt).
I dviznut bråmint del veye di Tcheslet et del djonnesse do scrijheu, et do vî tins. Vî tins k' i tchoûle.
Les tecses sont ratournés e francès vizon vizu. Avou co des pî-notes di rawete, po des esplikêyes a pårt.
Li live est enimådjî pa des ouves di pondeus d' Tcheslet, ki vnèt del coleccion del veye.
Kitaeyaedje do live
[candjî | candjî l’ côde wiki]- pp. 5-6 : adrovaedje e francès di Jean-Luc Fauconnier
- pp. 10-11 : prumî tecse, et ki fwait incipite.
- pp. 12-93 : Arimés, rindjîs cronolodjicmint, sicrîts di 1929 a 2005.
- pp. 94-157 : Powinmes et prôzes, nén datés.
- 159-161 : Notes so li scrijheu (e francès)
- 162-165 : Notes so les pondeus (e francès pa Marianne Fauconnier)
Li tecse ki fwait incipite
[candjî | candjî l’ côde wiki]- Dji vôreu tchanter Tcheslet
- Dji vôreu tchanter Tcheslet, mins dji n' pou pus. Mins dji n' sai pus. Paski tot est evoye bén lon, bén lon. Tot di mes ayir. Les djins, les måjhons, les imådjes et les bruts.
- I n' dimeure ki l' tchant des clotches, si råle, si trisse, et ki dji n' etin pus ki cwand i houke po les moirts.
- Dji passe dins çki dmeure des rowes, al cache di vizaedjes di tchå ou d' pire. Dji n' ritrouve pus waire. Et co : e cachant bén. Dji n' oize pus lancî on bondjoû, di peu k' i n' mi rvegne pus ; ni stinde ene mwin, di peu k' ele ni trouve ki l' vude.
- Est çk' i gn a co des ovrîs ki påtnut a pî, timpe å matén, e xhuflant ene årgudinne ? Des efants ki vont a pî a scole, e s' racontant des kéntes après awè souné ås ouxhs ?
- On n' ramasse pus di stron di tchvå po-z ecråxhî les pårtchets d' rôzes ou d' celeris.
- Dji n' ti pou pus tchanter. Dji n' ti såreu pus tchanter. Dji t' a veyou voltî. Dji t' a siervou Sereut ç' dedja ça ? Les sminces ki dj' a lancî, li vint les a epoirté å lon. Gn a pupont d' blouwets et d' fleurs di tonwere dins les frumints. Mins gn a-t i co des belès hôtès dorêyès lujhantès påtes, ki fjhént ene mer, sipitante d' alouwetes.