Erik Verberckt

Erik Verberckt

Erik Verberckt (Brugge, 21 meie 1935 - Roeseloare, 27 meie 2014) wos e West-Vlamsche kunstschilder, têekenoare, etser, beeldhouwer en oentwerper van bijous.

Leevn

Erik Verberckt wos den oudste zeune van Louis Verberckt en Walburga Van Steelandt. Ols kiend eet 'n d' oorlogsjoarn (1940 -1945) styf intens meegemakt. Hy wos juste lyk zyn vader verboendn an de Moatschappy voe Goaze-en elektriek. Oendanks zyn teknische vormienge had hy ol van ost hy styf joenk wos 'n uutgesprookn preferensje voe de plastische kunstn. Têekenn en schildern woarn zyn grôte passie. Hy wos autodidact met e grôte bewoenderienge voe de grôte mêesters lyk Picasso, Michelangelo, Rubens en Rembrandt. Hy vertelde zelve dat hy olsan getêeknd eet, voe zoverre dat hy hem koste herinnern.

Erik Verberckt trouwde mè Rosika Heydens, e Belgische kampioene atletiek die gespecialiseerd wos in sprint en hordeloopn. Hy wos eur trainer en coach. Zyn moêder wos ôok e gedreevn loopster, gespecialiseerd in langn ofstand (1000 m) in de joarn 1923 en 1924.

Werk

Zyn êeste werkn dateern van 1955. Vanof 1965 begost zyn abstract constructivistische periode, beïnvloêd deur den trend van dien tyd. Hy makte abstracte werkn in straf contrasteernde kleurn en zyn beeldn woarn metoalconstructies in koper en brons. Roend 1971 begost hy met e hêel nieuwe styl, woaby dat hy wild en spontoan omsproeng mè verve en kleurn. 't Gebruuk van acrylverve resulteerde in 'n intense lichtwerkienge.

Begun de joarn 1980 begost hy met etwa totoal anders. Zyn nieuwe têekeniengn en schilderyen woarn realistische portrettn, naktn, stilleevns en hy gaf zyn oenderwerpn, lyk alloam, sloepn en botters, in 't klêenste detail were. Vanof 1984 kopieerdet hy zo juste meugelyk fragmentn van mêesterwerkn van byvôorbeeld Michelangelo of Rembrandt en voegde doa zyn eign ideeën by. Hy werkte met e combinoasje van potlôod en verve, nu en ton ook mè sepia, e bruun-grysde kleur. Zyn composiesjes van landschappn mè figeurn, ruïnes en gesluierde vrouwn zyn constructief ipgebouwd en hy gebruukte e kôorde of lint ols verbiendiengselement met e verwyzienge noa 't oneindige. Ôok de figeure van Christus liet hem nôois los, met ols resultoat oender andere zyn "triptiek mè beeldn van Christus".

De joarn tneegntig woarn voer hem de periode van 't magisch realisme. Hy makte taferêeln en composiesjes, surtout in pastel of acrylverve, met de noadruk ip snoarinstrumentn. Nie vele loater kwoamn ook de Delfts blauwe tegeltjes en de klimopplante in zyn werk vôorn.

Nie allêne in eign land wordt zyn werk geacht, ôok in Holland, Groot-Brittannië en Canada ist er werk van hem te viendn.

• 
  Botters
• 
  Nostalgie
• 
  Boeg
• 
  Hulde aan van Gogh

Exposiesjes

• In 't stadhuus van Roeseloare dêed hy in moarte 1969 voe den êeste kêe mee an e groepstentôonstellienge voe Roeseloarsche kunstnoars, De Nieuwe Vijf genoamd.
• Vôorts exposeerdet hy toet 2014 in Roeseloare, Houthulst, Ostende, Brugge, Yper, Woaregem, Kortryk, Vlissiengn, Gent, Ôostkamp, Oudenoarde, Koksyde, Zierikzêe, Mêenn, Jabbeke, Brussel, Stoavel, Nieuwpôort en Knokke-'t Zoute.
• In 2013 liept er 'n overzichtstentôonstellienge mè zyn werk in 't Palethof in Roeseloare.

Pryzn

• Geselecteerd voe de Provinciale prys van West-Vloandern in 1972, 1974, 1976 en 1978
• 1995: Werk angekocht deur Stad Roeseloare: "Hulde aan Roeselare"
• 1998: Portret scheepn J. Vanoverberghe in ipdracht van Stad Roeseloare
• 1999: Êretêekn voe cultuurverdiênste van de Stad Roeseloare
• 2005: Beeld voe Burgemêester Daniël Denys in ipdracht van de sportroad Roeseloare
• 2008: Werkn angekocht deur SG Private Banking

Boekn

• Over Erik, deur W. Santens, uutgegeevn in eign beheer
• Lexicon van West-Vlaamse beeldende kunstenaars, deel 7, uutgegeevn deur de provinsje West-Vloandern
• Kunstpatrimonium Stad Roeselare, uutgegeevn deur Stad Roeseloare
• Noar anleidienge van zyn 70ste verjoardag gaf Erik Verberckt e boek uut, 'n overzicht van zyn verschillige periodes.

Referensjes

Ofbeeldiengn die ier by passn ku je vien in de categorie Erik Verberckt van Wikimedia Commons.