Voz'

Voz' (latin.: annus, lühenduz a) om aigan märičemižen sistematoi ühtnik. Znamoičeb Man täuden pöruden aigad Päiväižes ümbri.

Üks' voz' kogoneb 12 kuspäi. Järgeline kalendarine voz' mülütab 365 päivest (31 536 000 sekundad, SI-sisteman rindataden), ližapäivvoz' — 366 päivest (31 622 400 sekundad). Mail'man standartan mödhe voz' zavodiše 1. päiväl vilukud, lopiše 31. tal'vkud. Märičendühtnikad voden kävutandanke: voden nelländez (fartal), pol'vot, voz'kümne, voz'sada, voz'tuha, galaktine voz', vauktuzvoz'.

Istorižešti voz' znamoiči kul'turoiden enambuses voz'aigoiden vajehtusen üks'kerdašt ciklad (keväz', keza, sügüz', tal'v). Astronomijas voz' kävutase planetoiden punondan tähthiš ümbri märičendühtnikaks. Planetan siderine pord voib nimitadas vodeks sen planetan nimen ližadusenke: oz., Marsan voz', Jupiteran voz'.

Toižendad

• astronomine voz';
• finansine (fiskaline) voz', büdžetvoz', satusenladindvoz';
• openduzvoz', akademine voz'.

Vodhe sidodud vepsän muštatišed

• Ed vozil elä, a tervhudel.
• Kuverz' om vozid, ka severz' i kezoid.
• Verhil vozid ei sa pakita, i ičeiž ei sa antta.

Vodhe sidodud vepsän tärtused

• Endemuloi, endemulošt — vodes edel mulošt vot.
• Muloi — männudes (edeližes) vodes.
• Tullävodel — tulebas vodes.
• Tämävozne — täl vodel, necen voden.
• Vozik — hen kala, vozne igäl.
• Vozikaz, voz'jäine, vozne — üks' voz' igänke, oz., vozne laps'.
• Voz'kalliž — pühä praznik voden aigan.
• Voz'kirj — pästtud kerdan vodes tedonandmižkirj.
• Voz'kund — semetud kevädel rugiž (tulg).
• Voz'päiv — dat kerdan vodes.
• Voz'rugiž — semetud edel tal'ved rugiž.

Lühendused

• vhesai — vodhesai, oz., vhesai 2023
• vl — vodel, oz., vl 2023
• vlpäi — vodelpäi: vlpäi 2023
• vspäi — vodespäi: vspäi 2023 (ottas kävutamižhe enamba mi vlpäi)

Kacu mugažo

• Uz' voz'