Sergijev Posad

Sergijev Posad
Сергиев Посад

Lidnanznam	Flag
Valdkund	Venäma
Eläjiden lugu (2024)	98,251 ristitud
Pind	50,40 km²
Pämez'	Mihail Tokarev (sügüz'ku 2016—)
Telefonkod	+7−496-xxx-xx-xx
Avtokod	50, 90, 150, 190, 750
Aigvö	UTC+3 (MSK+0)

Sergijev Posad (ven.: Се́ргиев Поса́д) om Venäman lidn da lidnankund Moskvan agjan pohjoižes. Se om agjan 21nz' lidn eläjiden lugun mödhe, Sergijev Posadan lidnümbrikon administrativine keskuz (edel vn 2019 sulakud — rajonan) da kaikiš suremb lidn.

Istorii

Eländpunktan aluz om pandud vl 1347 kuti ortodoksižen hristanuskondan kel'j da pen' pühäkodi. Sauvoškanzihe jumalankodid läz sidä, aidoidud lidnudeks. Ph. Sergii Radonežalaižen manahad-jäl'gendajad služiba siš. Eländpunktad mez'jumalankodinno oliba ühtenzoittud da saiba lidnan statusad vl 1782 kuti Sergijevskii posad.

Vozil 1919−1930 nimitihe lidnad Sergijev:aks, vozil 1930−1991 sen nimi oli Zagorsk.

Sergijev Posad šingotase tarkoiktan mašinansauvomižen tegimil, sömtegimištol (leibänkombinat, lihakombinat, konditerižiden tegesiden pästand, jähižen edheotand, jondveden pakuitez) i turizmal. Moskvan hengeline akademii i nell' tedoinstitutad ratas lidnas (sättutoitud himijan, räzintegimišton, lindvodindan, tegesiden lapsiden täht).

Geografijan andmused

Lidn sijadase lidnümbrikon suvipalas, seižub Končur-jogen muugotil randoil (ven.: Кончура́ 12 km pitte, Kläz'man hura randpol'), 210 m ü.m.t. keskmäižel korktusel.

Matkad Moskvan röunhasai (Moskvan rengazavtotehesai) om 52 km suvipäivlaskmha. Lähembaižed lidnad oma mülüjad lidnümbrikho Hot'kovo suvipäivlaskmha, Peresvet i Krasnozavodsk pohjoižhe.

Eläjad

Vl 1897 lidnan ristitišt oli läz 25 tuhad. Vn 2010 Venäman rahvahanlugemižen mödhe lidnan eläjiden lugu oli 111 179 ristitud, lidnankundan — 118 025 ristitud. Vn 2021 rahvahanlugemižen mödhe lidnan ristitišt oli 101 756 eläjad. Vl 2017 kaik 104 579 ristitud elihe lidnas, 111 497 ristitud — lidnankundas. Kaikiš suremb lidnan ristitišt oli 112..116 tuhad eläjid vll 1985−2006 (116 tuh. eläjid vozil 1991 i 1992).

Rahvahad (2010): venälaižed — 95,2 %, ukrainalaižed — 1,8 %, toižed rahvahad — 3,0 %.

Ortodoksižen hristanuskondan vižsadavozne keskuz sijadase lidnas — Pühän Stroican da Sergijan Laur i sen arhitekturine ansambl' (enamba 50 pertid), 20 tošt jumalanpertid i viž časounäd.

Professionaližen opendusen aluzkundad oma privatine Sergijev Posadan gumanitarine institut, valdkundaline Sergijev Posadan kolledž, mugažo üläopendusen aluzkundoiden viž filialad i agjan medicinižen kolledžan filial.

Galerei

• 
  Nevondkundaline torg (2011)
• 
  Hengeline seminarii (2011)
• 
  Sergijev Posadan valdkundaline istoriž-čomamahtoine muzei-kel'dtaho (2011)
• 
  Kul'turkeskuz Jurii Gagarinan nimed (2016)
• 
  Sergijev Posad-päraudtestancijan sauvuz vl 2007

Irdkosketused

• Lidnümbrikon administracijan oficialine sait (sergiev-posad.net). (ven.)