Nerüngri
Lidnanznam![]() | |
Valdkund | Venäma |
Eläjiden lugu (2020) | 57,934 ristitud |
Pind | 36,76 km² |
Pämez' | Il'ja Gudošnik (sügüz'ku 2022—, Илья Гудошник) |
Telefonkod | +7−41 147-xx-xxx |
Avtokod | 14 |
Aigvö | UTC+9 (MSK+6) |
![](http://upload.wikimedia.org/wikipedia/commons/thumb/2/2c/%D0%9F%D0%BE%D0%B5%D0%B7%D0%B4%D0%BA%D0%B0_%D0%B2_%D0%9D%D0%B5%D1%80%D1%8E%D0%BD%D0%B3%D1%80%D0%B8%D0%BD%D1%81%D0%BA%D0%B8%D0%B9_%D1%80%D0%B0%D0%B9%D0%BE%D0%BD%2C_2017_%28087%29.jpg/250px-%D0%9F%D0%BE%D0%B5%D0%B7%D0%B4%D0%BA%D0%B0_%D0%B2_%D0%9D%D0%B5%D1%80%D1%8E%D0%BD%D0%B3%D1%80%D0%B8%D0%BD%D1%81%D0%BA%D0%B8%D0%B9_%D1%80%D0%B0%D0%B9%D0%BE%D0%BD%2C_2017_%28087%29.jpg)
Nerüngri (ven.: Не́рюнгри, jakut.: Нүөрүҥгүрү, evenk.: Ньируунгра evenkan Нерунӈа-nimitusespäi «harjuzjogi») om Venäman lidn da lidnankund Saha Tazovaldkundan suves. Se om kahtenz' surtte lidn tazovaldkundas, Nerüngrin rajonan administrativine keskuz da pala.
Istorii
[vajehta | vajehtada lähtetekst]Eländpunktan aluz om pandud vl 1952 kangazpertil ühtennimižen jogen randal tedištamha kivihilen löudmižsijid. Vl 1975 formiruihe Suvijakutijan territoriališt tegimištkompleksad, Nerüngri-žilo sai lidnan statusad i zavodihe sauda Baikalan-Amuran raudted. Saudihe raudtestancijad vl 1984.
Sadas da ümbriratas kivihil't tähäsai. Nerüngri šingotase mugažo hil'koncentratan küllästamižtegimel, kaivuztehnikan kohendusen tegimel, Nerüngrin GRES:al, lindfabrikal, kahtel tipografijal. Pertinsauvondan kombinat i maidtegim radoiba ende, nevondkundaližel aigal.
Geografijan andmused
[vajehta | vajehtada lähtetekst]Lidn sijadase taigan rajonas, Čul'man-jogen oiktal randal (Lenan bassein), Stanovoi-mägisel'gan pohjoižen ezimägišton pautkil, 800..850 m korktusil valdmeren pindan päl. Matkad Jakutskhasai 820 km pohjoižhe «Len»-avtotedme, raudtel Alabestäh-stancijhasai vastrandal Jakutskha kacten om 799 km. Lähembaine lidn om Tind (Amuran agj) 168 km suvhe orhal, 210 km avtol vai raudtedme.
Klimat om kontinentaline, tal'v oleleb sorav da kuiv. Voden keskmäine lämuz om −6,9 C°, kezakun-elokun +13..+16 C°, tal'vkun-uhokun −25..−30 C°. Ekstremumad oma −61 C° i +34 C°. Paneb sadegid 583 mm vodes, enamba kezakus-sügüz'kus (79..108 mm kus), vähemba tal'vkus-keväz'kus (12..16 mm kus).
Nerüngri om lidnankundan üks'jäine eländpunkt.
Eläjad
[vajehta | vajehtada lähtetekst]Vn 2010 kaiken Venäman rahvahanlugemižen mödhe eläjiden lugu oli 61 747 ristitud, rajonan ristitišton koume nelländest. Kaikiš suremb ristitišt oli 76 700 eläjad vl 1996. Vl 2017 lidnan ristitišt oli 57 247 eläjad.
Rahvahad (enamba 0,2 % vl 2010, ozutadud rahvahudenke): venälaižed — 79,7 %, ukrainalaižed — 6,3 %, jakutalaižed — 2,5 %, totarlaižed — 2,0 %, burätalaižed — 1,9 %, evenkalaižed — 1,4 %, uzbekalaižed — 0,4 %, kirgizlaižed — 0,3 %, evenalaižed (ende lamutalaižed) — 0,2 %, armenijalaižed — 0,2 %, toižed rahvahad — 5,1 %.
Ortodoksižen hristanuskondan kaks' pühäpertid[1] oma avaitud lidnas: Jumalanmaman Kazanin jumalaižen jumalanpert' (om saudud vll 1992−1993) i Raštvoiden časoun' (letihe vll 2007−2009). Islaman pämečetin sauvomine tuleb lophu (2022).
Suvijakutijan tehnologine kolledž[2] i Pohjoižpäivnouzmaižen federaližen universitetan (Jakutsk) filial oma lidnan professionaližen opendusen aluzkundoikš. «Sibgiprošaht»-tedoinstitutan (Novosibirsk) filial sijadase täs.
Edeline lidnan pämez' (Administracijan pämez') om Leonid Oleinik (2012 — sügüz'ku 2022). Lidnan Deputatoiden Nevondkundan ezimez' om Julija Gnilickaja vn 2022 redukuspäi.
Galerei
[vajehta | vajehtada lähtetekst]-
Administracijan sauvuz Leninan torgul (2017)
-
Jumalanmaman Kazanin jumalaižen pühäpert', vn 2008 nägu
-
Tehnine institut (2017, Pohjoižpäivnouzmaižen federaližen universitetan filial)
-
«Gornäk»-stadion (2017, Kaivai)
-
Nerüngri-Passažirskai-päraudtestancijan sauvuz vl 2017
![](http://upload.wikimedia.org/wikipedia/commons/thumb/0/01/Night_panorama_of_the_Neryungri_town.png/1000px-Night_panorama_of_the_Neryungri_town.png)
Homaičendad
[vajehta | vajehtada lähtetekst]- ↑ Nerüngrin pühäpertid sobory.ru-saital. (ven.)
- ↑ Suvijakutijan tehnologižen kolledžan sait (юятк.рф). (ven.)
Irdkosketused
[vajehta | vajehtada lähtetekst]- Municipaližen «Nerüngri-lidn»-ühtnikan tobmuden aluzkundoiden oficialine sait (nerungri.sakha.gov.ru). (ven.) (jakut.)
![]() |
Nerüngri Vikiaitas |
Saha Tazovaldkundan lidnad | ||
Aldan | Jakutsk | Lensk | Mirnii | Nerüngri | Nürb | Olökminsk | Pokrovsk | Srednekolimsk | Tommot | Udačnii | Verhojansk | Vilüisk | ||