Aleksejevk

Aleksejevk
Алексеевка

Lidnanznam	Flag
Valdkund	Venäma
Eläjiden lugu (2021)	36,578 ristitud
Pind	37,87 km²
Telefonkod	+7−47 234-xx-xxx
Avtokod	31
Aigvö	UTC+3 (MSK+0)

Aleksejevk (ven.: Алексе́евка) om Venäman lidn Belgorodan agjan päivnouzmas. Se om Aleksejevkan lidnümbrikon administrativine keskuz (edel vn 2018 sulakud Aleksejevkan rajonan).

Istorii

Eländpunktan aluz om pandud vl 1685 kuti kozakoiden Aleksejevskai-slabad (ven.: слобода Алексеевская) kaičemha Venäman röunad. Ühtennimine stancii om saudud vl 1895 «Har'kov — Balašov»-keskustal. Vspäi 1918 oli makundan keskuseks. Kätihe slabadad radnikžiloks vl 1939. Suren sodan aigan žilo oli okkupiruidud (5. heinku 1942 — 19. viluku 1943), sen jäl'ghe Aleksejevkan ukrainine ristitišt poleni lujas. Radnikžilo sai lidnan statusad vn 1954 19. päiväl elokud.

Aleksejevk šingotase sömtegimišton edheotandoil (pühävoin, argvoin da razvoiden järed «EFKO»-tegim, maidkonservtegim, leibtegim, kombisötken tegim), himižel tegimel i katilmašiništon tegimel. Ende ladimensauvomižem «Deviz»-tegim, magaduzsijiden tegim, sahartegim i lihakombinat radoiba mugažo.

Geografijan andmused

Lidn sijadase Tün' Sosn-jogen randoil (ven.: Тихая Сосна 161 km pitte, Donan oiged ližajogi), 120 m ü.m.t. keskmäižel korktusel. Matkad Belgorodhasai om 148 km päivlaskmha orhal vai 172 km avtol. Lähembaižed lidnad avtoteidme oma Birüč 20 km päivlaskmha i Ostrogožsk (Voronežan agj) 50 km pohjoižpäivnouzmha.

Aleksejevk oli lidnankundaks vll 2004−2019, sen üks'jäižeks eländpunktaks. Lidnankundan pind oli 124,52 km².

Eläjad

Vn 2010 Venäman rahvahanlugemižen mödhe eläjiden lugu oli 39 026 ristitud, rajonan koume videndest. Vll 1996−2019 lidnan ristitišton lugu oli 38..39 tuhad eläjid (39 400 rist. vl 2008).

Ortodoksižen hristanuskondan nell' jumalanpertid oma olmas lidnas: ph. Aleksandr Nevalaižen, ph. Dimitrii Rostovalaižen, Eläban Eziauguižen Stroican, ph. Jurgii-vägestusenkandajan.

Aleksejevkan kolledž (ende pedagogine i maižandusen kolledžad eriži) i agrotehnine tehnikum oma lidnan professionaližen opendusen aluzkundoikš.

Lidnankundan jäl'gmäine pämez' oli Pavel Hvorostän vn 2017 keväz'kuspäi vn 2019 elokuhusai.

Galerei

• 
  Enččen lidnankundan administracijan sauvuz (2012)
• 
  Eläban Eziauguižen Stroican jumalanpert', vn 2014 nägu
• 
  «EFKO»-voitegimen ohjanduzkompanijan sauvuz vl 2014
• 
  Kodirandantedištandmuzei (2011, ende Lübivijad-torgovanoiden erižpert')
• 
  Sodakomissariat (2013, ende Mirošnikov-torgovanan pert')

Irdkosketused

• Lidnan da lidnümbrikon tobmuden sait (adm-alekseevka.ru). (ven.)
• Lidnan tobmuden enzne sait (gorod-alekseevka.ru). (ven.)