شاہد (اصطلاح حدیث)

لغوی اعتبار سے 'شاہد'، شہادت کا اسم فاعل ہے جس کا معنی ہے گواہ۔ اس کا شاہد اس لیے نام دیا گیا ہے کہ وہ اس حدیث کی اصل کی گواہی دیتا ہے اور اسے مضبوط اور قوی کرتا ہے جس طرح گواہ مدعی کی بات کو قوی کرتا اور اس کا سہارا بنتا ہے۔ اصطلاحی مفہوم میں اگر کوئی ایک راوی کسی صحابی سے کوئی حدیث روایت کر رہا ہو اور دوسرا راوی انہی الفاظ یا مفہوم میں وہی حدیث کسی اور صحابی سے روایت کر رہا ہو تو اس دوسری حدیث کو شاہد کہا جاتا ہے۔ اس میں شرط یہ ہے کہ دونوں سلسلہ ہائے سند کے صحابی مختلف ہونے چاہئیں۔ علم حدیث میں اس سے مراد وہ حدیث ہے جس میں کسی دوسرے صحابی سے ایسا متن مل گیا ہو کہ جو کسی حدیث فرد کے ساتھ لفظاً و معناً کی صرف مشابہ ہو تو اسے شاہد کہتے ہیں۔