زاہد فضل

زاہد فضل ٹیسٹ کیپ نمبر 118

فائل:Zahid fazal.jpeg
ذاتی معلومات
پیدائش	(1973-10-10) 10 اکتوبر 1973 سیالکوٹ، پنجاب، پاکستان
بلے بازی	دائیں ہاتھ کا بلے باز
گیند بازی	دائیں ہاتھ کا میڈیم، آف بریک گیند باز
بین الاقوامی کرکٹ
قومی ٹیم	پاکستان (1990–1995)
پہلا ٹیسٹ (کیپ 118)	15 نومبر 1990  بمقابلہ  ویسٹ انڈیز
آخری ٹیسٹ	22 ستمبر 1995  بمقابلہ  سری لنکا
پہلا ایک روزہ (کیپ 78)	6 نومبر 1990  بمقابلہ  نیوزی لینڈ
آخری ایک روزہ	11 ستمبر 1994  بمقابلہ  سری لنکا
کیریئر اعداد و شمار
مقابلہ ٹیسٹ ایک روزہ فرسٹ کلاس لسٹ اے میچ 9 19 122 129 رنز بنائے 288 348 5,730 3,424 بیٹنگ اوسط 18.00 23.19 34.72 33.56 100s/50s 0/1 0/2 12/27 3/24 ٹاپ اسکور 78 98* 201* 116 گیندیں کرائیں – – 217 58 وکٹ – – 1 2 بالنگ اوسط – – 168.00 22.50 اننگز میں 5 وکٹ – – 0 0 میچ میں 10 وکٹ – – 0 n/a بہترین بولنگ – – 1/24 1/0 کیچ/سٹمپ 5/– 2/– 104/– 104/–
ماخذ: ای ایس پی این کرک انفو، 24 جنوری 2014

زاہد فضل (پیدائش: 10 نومبر 1973ء سیالکوٹ، پنجاب) پاکستانی سابق کرکٹر تھے، جنھوں نے 1990ء سے 1995ء تک 9 ٹیسٹ اور 19 ایک روزہ بین الاقوامی میچز کھیلے۔ پاکستان کے علاوہ گوجرانوالہ ، لاہور،پاکستان آٹو موبلائز کارپوریشن اور پاکستان انٹر نیشنل ائیر لائنز کی طرف سے بھی کرکٹ کھیلی۔وہ دائیں ہاتھ کے بلے باز اور دائیں ہاتھ کے ہی میڈیم آف بریک بولر تھے۔

ٹیسٹ کرکٹ

زاہد فضل کو ویسٹ انڈیز کے خلاف 1990ء میں کراچی کے مقام پر ٹیم کا حصہ بنایا گیا تھا۔ اس پہلے ٹیسٹ میں ملنے والے اس موقع سے فائدہ نہ اٹھا سکے۔ پہلی اننگ میں 7 اور دوسری میں 12 رنز یہی ظاہر کر رہے تھے۔ فیصل آباد کے اگلے ٹیسٹ میں انھوں نے 32 اور 5 رنز بنائے جبکہ لاہور کے تیسرے ٹیسٹس میں وہ 13 اور 6 تک رسائی حاصل کرسکے۔ 1991ء میں جب سری لنکا کی ٹیم پاکستان آئی تو انھیں ہوم سیریز میں سلیکٹرز نے ایک بار پھر اعتماد کرکے ٹیم میں شامل کیا۔ سیالکوٹ کے پہلے ٹیسٹ میں 36 اور گوجرانوالہ کے دوسرے ٹیسٹ میں 21 رنز کے ساتھ وہ خاطر خواہ ٹیم کی مدد نہ کرسکے لیکن یہ ٹیسٹ فیصل آباد کا تیسرا ٹیسٹ تھا جب انھوں نے اپنا بہترین انفرادی سکور ٹیم کو دیا۔سری لنکا نے پہلے کھیلتے ہوئے 240 رنز بنائے جس میں سنتھ جیسوریا 81، روشن ماہنامہ 58 اور ہتھوراسنگھا 49 کے ساتھ نمایاں کھلاڑی رہے۔ پاکستان کی کرکٹ ٹیم مشکلات سے دوچار رہی اور رمیز راجا کے 63 رنز کی بدولت 221 رنز ہی بنا سکی۔ زاہد فضل صرف 13 رنز بنا کر وجے گوناوردنے کا شکار بنے۔ دوسری باری میں زاہد فضل نے اپنی ذمہ داری کا احساس کیا اور 13 چوکوں کی مدد سے 164 گیندوں پر 78 رنز کی باری کھیلی۔ ان کی اس اننگ کے باوجود پاکستان کا سکور 7 وکٹوں پر 188 سے آگے نہ بڑھ سکا۔ اس کے بعد انھوں نے آسٹریلیا کے خلاف کراچی اور راولپنڈی میں 2 ٹیسٹ کھیلے مگر بیٹنگ میں کوئی موثر کارکردگی دکھانے سے قاصر رہے۔ 1995ء میں سری لنکا کے خلاف سیالکوٹ کا ٹیسٹ ان کا آخری ٹیسٹ تھا جس میں وہ 23 اور 1 رنز تک ہی محدود رہے۔

ون ڈے کرکٹ

زاہد فضل کو نیوزی لینڈ کے خلاف 1990ء میں سیالکوٹ کے مقام پر ایک روزہ مقابلہ میں شرکت کا موقع ملا مگر وہ 5 ناقابل شکست رنز ہی بنا سکے جبکہ ویسٹ انڈیز کے دورہ پاکستان میں بھی وہ کوئی بڑی اننگ نہ کھیل سکے۔ شارجہ میں سری لنکا کے خلاف 11 اور بھارت کے خلاف 39 رنز کے ساتھ وہ کچھ فارم میں آتے ہوئے نظر آئے۔ 25 اکتوبر 1991ء کو شارجہ میں بھارت کے خلاف انھوں نے 98 ناقابل شکست رنز بنائے۔ ولز ٹرافی کے فائنل میچ میں پاکستان نے 6 وکٹوں پر 262 رنز سکور کیے۔ ابتدائی 2 کھلاڑیوں عامر سہیل اور ساجد علی کے جلد آئوٹ ہونے کے بعد زاہد فضل نے سلیم ملک کے ساتھ مل کر 171 رنز کی شراکت قائم کی۔ بدقسمتی سے زاہد فضل اس موقع پر ریٹائر ہرٹ ہو گئے جبکہ وہ اپنی سنچری سے محض 2 رنز کے فاصلے پر تھے۔ سلیم ملک 87 کے ساتھ پربھارکر کا شکار بنے اور پاکستان نے بھارت کو جیتنے کے لیے 263 رنز کا ہدف دیا جس کو عبور کرنے کی کوشش میں بھارتی بلے بازوں کا سانس پھول گیا اور پاکستان نے یہ میچ 72 رنز سے جیت لیا۔ میچ کی خاص بات عاقب جاوید کی تباہ کن بولنگ تھی جنھوں نے 10 اوورز میں 1 میڈن پھینک کر 37 رنز کے عوض 7 بھارتی کھلاڑیوں راستہ روکا۔ اظہر الدین، سچن ٹنڈولکر بغیر رنز بنائے عاقب جاوید کی گیند پر ایل بی ڈبلیو ہوئے۔ 1991ء میں فیصل آباد مقام پر زاہد فضل کی ایک اور نصف سنچری 53 رنز کی صورت میں سامنے آئی۔ 1994ء میں سری لنکا کے دورے میں انھوں نے کولمبو کے مقام پر اپنا آخری ایک روزہ میچ کھیلا جس میں وہ 15 رنز ہی بنا سکے۔

اعداد و شمار

زاہد فضل نے 9 ٹیسٹ میچوں کی 16 اننگز میں 78 کے بہترین سکور کے ساتھ 288 رنز سکور کیے۔ 18.00 کی اوسط سے بننے والے اس مجموعے میں 1 نصف سنچری شامل تھی جبکہ 19 ایک روزہ مقابلوں کی 18 اننگز میں 3 دفعہ ناٹ آئوٹ رہ کر 348 رنز ان کے ریکارڈ کا حصہ بنے جس میں 98 ناٹ آئوٹ ان کا بہترین انفرادی سکور تھا جس کے لیے انھیں 23.20 کی اوسط حاصل ہوئی۔ 2 نصف سنچریاں ان کے اس مجموعے کی تشکیل میں معاون ثابت ہوئی تھیں۔ زاہد فضل نے 122 فرسٹ کلاس میچوں کی 182 اننگز میں 17 مرتبہ ناقابل شکست رہ کر 5730 رنز سکور کیے۔34.72 کی اوسط سے بنائے گئے ان رنزوں میں 201 ناقابل شکست ان کا سب سے بڑا سکور تھا۔ 12 سنچریاں اور 27 نصف سنچریاں بھی انھوں نے سکور کی تھیں۔ فرسٹ کلاس میچوں میں انھوں نے 1 وکٹ بھی حاصل کی ہوئی تھی۔

مزید دیکھیے

• کرکٹ
• ٹیسٹ کرکٹ
• پاکستان قومی کرکٹ ٹیم
• پاکستان کے ٹیسٹ کرکٹ کھلاڑیوں کی فہرست