HURD
![](http://upload.wikimedia.org/wikipedia/sc/thumb/1/11/Provintzia_de_Casteddu-Istemma.png/26px-Provintzia_de_Casteddu-Istemma.png)
![](http://upload.wikimedia.org/wikipedia/sc/thumb/1/11/Provintzia_de_Casteddu-Istemma.png/26px-Provintzia_de_Casteddu-Istemma.png)
logudoresu · LSC · nugoresu
![](http://upload.wikimedia.org/wikipedia/commons/6/65/Hurd-logo.png)
Hurd est un'impari de programas po elaboradori chi in su sistema GNU fait su traballu de su nùcleu (kernel). Est progetau comenti grupu de serbidoris chi funtzionant asuba de unu micro-nùcleu[1].
Sa punna de Hurd est de essi cumpatìbili cun UNIX ma fintzas de ddu sorigai e bessiri mellus in fatu de progetu, seguresa, stabilidadi e lestresa[2].
Sendi chi no est mai istadu acabau, is distribuiduras de su sistema operativu GNU ant preferriu a oberai àterus nùcleus, comenti a Linux[3].
Stòria
[modìfica | modìfica su còdighe de orìgine]Su svilupu de Hurd est incumentzau in su 1990, candu su micro-nùcleu Mach est bessiu lìberu de impreai comenti basi de su traballu[4].
S'annùntziu de su progetu est arribau in su 1991 in su newsgroup de GNU, cun is tres punnas de su progetu:[5]
- cumpatibilidadi binària cun BSD 4.4 e àterus sistemas U*x o U*xish, candu fiat possìbili;
- cunformidadi cun POSIX;
- facilidadi de impreu, presentada de piessìnnius e funtzionalidadis nous.
Una versioni de proa, sa 0.0, est stètia publicada in s'austu de su 1996 e cumprendiat su còdixi de unus cantu serbidoris, librerias e programas de utilidadi[6]. Unu mesi apustis ant publicau sa versioni 0.1 e in su 1997 sa versioni 0.2[4].
Mancai su disènniu a micro-kernel de custu progetu siat prus modernu e cun bantaxus medas, est prus cumplicau chi no unu nùcleu monoliticu[7]. Difatis, is programadoris ant stentau a lompi a una versioni stàbili de Hurd e in s'interis chini fiat circhendi de otenni unu sistema operativu lìberu cumpriu at impreau su nùcleu Linux impari cun is programas de GNU[3]. Su traballu, comenti e chi siat, est sighiu e in s'interis funt nàscias unas cantu distribuiduras de su sistema GNU/Hurd[8].
In su 2013, 16 annus apustis de s'ùrtima versioni ofitziali, est arribada sa 0.5[9] po festai is 30 annus de su progetu GNU. Àteras cuàturu ndi funt arribadas intra su 2015 e su 2016, lompendi in su mesi de idas de su 2016 a sa versioni 0.9[10].
Riferimentus
[modìfica | modìfica su còdighe de orìgine]- ↑ (EN) What Is the GNU Hurd?, in www.gnu.org. URL consultadu su 23 martzu 2022.
- ↑ (EN) advantages, in www.gnu.org. URL consultadu su 23 martzu 2022.
- ↑ 3.0 3.1 (IT) Linux e il sistema GNU, in gnu.org.
- ↑ 4.0 4.1 (EN) history, in www.gnu.org. URL consultadu su 23 martzu 2022.
- ↑ (EN) FSF work on a GNU OS, in gnu.org.
- ↑ (EN) Hurd 0.0 and GNU 0.0 released, in gnu.org.
- ↑ (EN) Revolution OS (min 25:25). URL consultadu su 24 martzu 2022.
- ↑ (EN) distrib, in www.gnu.org. URL consultadu su 23 martzu 2022.
- ↑ (EN) 2013-09-27, in www.gnu.org. URL consultadu su 24 martzu 2022.
- ↑ (EN) 2016-12-18-releases, in www.gnu.org. URL consultadu su 24 martzu 2022.