Пражска ярь
![](http://upload.wikimedia.org/wikipedia/commons/thumb/4/4c/Adunare_Pia%C5%A3a_Palatului_August_1968.jpg/400px-Adunare_Pia%C5%A3a_Palatului_August_1968.jpg)
Пражска ярь, чеш. Pražské jaro, была чехословацка проба демократизации економикы, комунистичной партии, сполоченства и державы, сформованя «социализма з людсков тварьов», котра ся продовжала од януара до августа року 1968.
Термин Пражска ярь быв придуманый западныма медиями, коли новины о том, што ся одбывать в Чехословакии, зачали коловати по свѣтѣ.
Реформный поступ
[едітовати | едітовати жрідло]На зачатку 1960-х рокох Чехословакия зажила економичный спад. Процесы десталинизации ишли помалы, назрѣла остра потреба политичных и економичных реформ.
В януарѣ 1968, намѣсто одстраненого Антонина Новотного, наробившого копу незаконностей, Первым тайником Комунистичной партии Чехословакии став ся Александер Дубчек, котрый выголосив нову политику «социализма з людсков тварьов». Новотный зоставав еще Президентом Чехословакии, але недовго. Отворили ся корупчны аферы его приближеного генерала Яна Шейны, котрый устиг перед судом утѣкнути за границѣ. Резултатом политичного шкандала стала ся абдикация Новотного з поста Президента. На тот пост быв выбраный Лудвик Свобода, войновый ветеран и герой. Наступила цѣлком нова реформна влада. Програма «социализма з людсков тварьов» майже повторьовала довоенну програму комунистичной партии, котра силно ся розходила з догматичнов комунистичнов програмов совѣтского типа.
Меджи найважнѣйшыма реформами было скасованя цензуры, слободный выѣзд до загранича, ориентация економикы на спотребны товары, федерализация Чехословакии на двѣ ровноправны републикы.[1]
Слобода прояву отворила дверѣ розличным выступам в медиях, котры критиковали сталинску добу, говорили о комунистах, котры были выгнаны, засажены до арешту або забиты и так цѣлком вымазаны з комунистичной истории. Тота слобода пресы и вступ телевизии до каждоденного живота вынесли проблемы зо сфера интелектуалных дискузий до сферы обычайных обывательох. Успѣх и популарность Дубчековых реформ была така, же хоть незадоволеность ситуациов в державѣ была величезна, в Дубчековой добѣ никто не оспорьовав ведучу роль комунистичной партии. Хоть Дубчек все старав ся о добры односины з Москвов, фурт потверджовав вѣрность социализму и Варшавскому пакту, веджѣня «братскых» комунистичных партий ясно видѣло, же кедь чехословацкому взору послѣдуе роботницькый клас их держав, недовго им ся судило быти при владѣ.
Братска интернационална помочь
[едітовати | едітовати жрідло]Самой назвы социализм з людсков тварьов, котра отворено указовала, же дотогдашный социализм совѣтского типа быв нелюдскый, было доста, жебы выволати в Москвѣ нервозиту. Найвекшу активность в пробах пересвѣдчити свого чехословацкого колегу указали Владислав Гомулка и Валтер Улбрихт. Але Дубчек, як честный и добронамѣреный чоловѣк не мог себе представити на их мѣстѣ и недооцѣнив важность ситуации.
Совѣтска армада спочатку лем напинала мускулы и указовала свою силу при границях Чехословакии, а од юна уже и на ей територии. Напятя фурт росло, аж наконець 3. августа 1968 в Братиславѣ Брежнев выголосив, же охрана социализма е сполочнов интернационалнов повинностьов братскых социалистичных держав. Была то так звана Брежневова доктрина. Тота «охрана социализма» зачала ся точно о 23:00 20. августа 1968 и держала довгы 20 рокы.[2]
Военскым засягом реформаторы были одстранены, а до влады поставлены послушны Москвѣ люде. Цвѣты Пражской яри дали плоды аж через 20 рокы.
Посуджѣня Пражской яри в минулости и днесь
[едітовати | едітовати жрідло]Традичне официалне посуджѣня подѣй Пражской яри в комунистичном блоку было таке, же была то проба буржоазии и западного империализма учинити контрареволуцию.[3]
„ | В року 1968 широкы масы працуючых Чехословакии, операючи ся на интернационалну помочь братскых социалистичных держав, змарнили планы контрареволуции, пробовавшой зликвидовати выдобыткы социализма. | ” | |
|
В року 1989 комунистичне веджѣня вшиткых пятеро держав, задусившых Пражску ярь официално признали свою хыбу и просили перебачѣня и поокреме и в сполочном проголошѣню з дня 4. децембра 1898:
„ | Ведучы представителе Болгарии, Мадярщины, ГДР, Польщи и Совѣтского Союза на встрѣчи в Москвѣ 4. децембра 1898 проголосили, же инвазия их войск до Чехословакии в року 1968 означала вмѣшованя ся до внуторных дѣл суверенной державы и мусить быти засуджена.
Тот протиправный засяг перерушив демократичну обнову в Чехословакии и мав довгодобы негативны наслѣдкы. История потвердила, як важне е и в найзложитѣйшой меджинародной ситуации послужити ся лем политичныма средствами на рѣшѣня всѣх проблем, а в одношѣнях меджи державами додержовати ся принципу суверениты, независимости и невмѣшованя ся до внуторных дѣл, што жадать и штатут Варшавского пакту. |
” |
Официалне проглашѣня, Москва, 4.12.1989[5] |
В року 2015 российска державна телевизия выпустила «документалный» филм Варшавскый пакт. Одкрыты тайны, русс. Варшавский договор. Рассекреченные страницы, в котром Пражска ярь повностьв подана в комунистичной интерпретации з року 1968. Президент Милош Земан повѣв о том филмѣ, же «российска телевизия лже, а ниякого иншого коментария ку тому не може быти, лем тот: е то новинарскый фалзификат».[6]
Жерела и одказы
[едітовати | едітовати жрідло]- Дмитрук В.І. Празька весна 1968. //Енциклопедія історії України : у 10 т. / Смолій В. и др. (ред.). Інститут історії України НАНУ. — К. : Наук. думка, 2003-2013. ISBN 966-00-0632-2; 2011 т. 8, сс. 484-485. ISBN 978-966-00-1142-7
- УСЭС: Украинский советский энциклопедический словарь в трех томах. / Кудрицкий А.В. и др. (ред.). Главная редакция Украинской Советской Энциклопедии им. М.П. Бажана. К., 1988. Том 3. ISBN 5-88500-007-7
- Mirko Raduševič: Gorbačov o roce 1968: V životě jsem nezažil větší dilema.
Референции
[едітовати | едітовати жрідло]- ↑ DUBČEK, Alexander. Hope Dies Last: The Autobiography of Alexander Dubcek. Kodansha International, 01. 1993. ISBN 1568360002.
- ↑ Mária Mlaková: Socializmus s vojenskou tvárou. Príbeh roku 1968 (foto)
- ↑ Енциклопедія історії України, т. 8, сс. 484-485.
- ↑ УСЭС, том 3, с. 628.
- ↑ Mirko Raduševič: Gorbačov o roce 1968: V životě jsem nezažil větší dilema.
- ↑ Zeman: Ruská televize o roce 1968 lže, invaze byla zločin