Визиготы
Визиготы, лат. Visigothae, западны Готы — западный конарь выходногерманского племени Готох, языково близкый сѣверным Германцям.
Походжѣня
[едітовати | едітовати жрідло]Визиготы ся одокремили в току миграции Готох зо Шкандинавии ку Чорному морю и на Балканы; час и мѣсто роздѣлѣня Готох на западных (Визиготох) и восточных (Остроготох) остаточно не выяснены. Предкы Визиготох заселяли южны берегы Балтицкого моря и нижню Вислу. Од конця II. стороча зачали мигровати ку границям Римской империи, ку котрым пришли в зачатку III. стороча. Сполочно з иншыма племенами вламовали ся на землѣ Римской империи.[1]
Односины з Римом
[едітовати | едітовати жрідло]Визиготы осадили ся на запад од Днѣстра, але по впадѣ Гунох в року 376 мусѣли уступити на юг за Дунай, де их прияв римскый император Валенс. Ту вшак терпѣли голод и притѣснѣня од римскых урядникох, што их привело ку бунту и зачали пустошити и рабовати балканскы провинции. Император Валенс рушив на нѣ з войском, але 9. августа 378 при Адрианополю его войско было розбите, ай сам быв забитый.[2][3] Аж року 382 Теодозий I., наступник Валенса, дав Визиготам землѣ на выход од Дрины до Чорного моря, де мали обороняти граничны землѣ империи. Правдоподобно, же ту прияли арианство. На службѣ империи выступали яко сериозна военска сила в роках 388 и 394.[1] В року 395 выбрали собѣ за краля Аларика I., под велительством котрого рушили ся добывати спочатку Грецию, а пак обернули на Рим. В року 410 добыли Рим и страшно го спустошили. Затым хотѣв Аларик ити на Сицилию и Африку, але тот поход перервала его смерть.[3] Далшый визиготскый краль Атаулф повюг свой народ до Галии, а пак до Испании. Там основали Визиготы властне кральовство и были од року 418 на службѣ Римской империи яко федераты (военны споенцѣ): вытѣснили одтам Свебох и Вандалох. Найвекшым кральом и правдивым монархом быв Теодорик I. (панованя: 419–451). Визиготы зоставали в службах Римской империи до року 475, коли Ейрик (466–484), сын Теодорика I., выголосив независимость од Рима. Визиготске кральовство упало в роках 711–713 под ударами Арабох и Берберох.[2]
Арианство
[едітовати | едітовати жрідло]В IV. сторочу Визиготы прияли христианство во формѣ арианства.[1] По тому, як основали властне кральовство, найшли ся в окружѣню католицкых народох, штовецей, была то вѣра пановной версти, а векшина подданых кральовства были католици, утримовати тото дале было неможне. Краль Реккаред (586–601) скоро по вступѣ на трон перейшов ай зо своим визиготскым народом на католицтво.[3]
Жерела и одказы
[едітовати | едітовати жрідло]- Visigoth people. Encyclopaedia Britannica (online). April 13, 2017. https://www.britannica.com/topic/Visigoth. [перевірено 2020-04-18].англ.
- Ottův slovník naučný. Illustrovaná encyklopaedie obecných vědomostí. Díl 10. Vyd. J. Otto. V Praze, 1896.
- Буданова В. П.. ВЕСТГОТЫ. // Большая российская энциклопедия (online, 2016). https://old.bigenc.ru/world_history/text/1910692. [перевірено 2020-04-18].русс.
