Për amprende a dovré 'l sistema dle parlà locaj ch'a varda sì.
Deformassion ëd n'elastòmer. Le caden-e polimériche a son gropà con dle liure chìmiche ant ij pont nèir dla figura. Coj pont a bogio e as dësgropo nen. Ant lë stat d'arpòs, ël polìmer a l'é 'n garboj (A). An deformandse (B) le caden-e as dëstendo ëd fasson paralela.
J'elastòmer a son dle sostanse naturaj o artifissiaj con propietà chìmiche e fìsiche tìpiche dla goma natural. La pì particolar a l'é la capassità d'arsèive e dle gròsse deformassion elàstiche, pr'esempi as peul slongheje e sgnacheje tant, për peui feje torné a soa forma inissial, pen-a ch'as crea torna na situassion d'arpòs. J'elastòmer a son modlà ant le forme progetà via estrusion e stampage càud.
J'elastòmer a son dij polìmer e a së spartisso an doe class:
Elastòmer termoandurent: j'elastòmer termoandurent a son fàit gropand j'un-e con j'àutre le caden-e d'un polìmer an dovrand dij reagent chìmich, la temperadura e la pression ant un process ciamà volcanisassion. Sta modificassion an soa strutura a fa dësvlupé le propietà termoandurente, e a sarà ampossìbil modleje torna apress che la volcanisassion a l'ha avù sòj efet.
