Smaug

Smaüg es lo darrièr dels grands dragons de la Tèrra Mejana, l'univèrs de ficcion descrich per J.R.R. Tolkien.

Es l'antagonista principal del roman Lo Hobbit, que racònta cossí un grop de nans assaja de recuperar lo tresaur e lo Reialme de la Montanha Solitària que lo dragon aviá raubat. Smaug es descrich coma roge/daurat, e dins lo Libre Roge es dich qu'èra plan grand; es atal classat coma lo segond dragon mai grand de la Tèrra Mejana (aprés Ancalagon). Atanben es conegut coma Smaug lo Daurat o Smaug lo Magnific.

Lo Hobbit

Dins Lo Hobbit, un grop de nans fan una expedicion per recuperar lo tresaur que lo dragon lor aviá raubat fasiá temps. Amb eles an un hobbit en qualitat de raubaire, Bilbon Saquet, que los a d'ajudar en la mission.

Smaug coneissiá plan totes los objèctes de son tresaur e sul pic sabèt qu'una copa sens cap de valor èra estada raubada per Bilbon. Segon Tolkien, sa ira èra aquela que "solament pòt èsser vista quora las gènts fòrça ricas pèrdon qualque causa que fasiá temps qu'avián mas qu'avián pas volgut ne utilizat." Lo panatòri de la copa, la coneissença d'Smaug de totes los objèctes de son tresaur e la posteriora colèra del dragon fan pensar en l'istòria de Beowulf, que Tolkien n'èra un expèrt important e que descriguèt coma "la fònt mai estimada" per lo Hobbit. Entre las autras possessions de Smaug i aviá atanben la Pèira de l'Arca e divèrsas còtas de mithril, que una ne foguèt una donada a Bilbon per Thorin Escutdegarric. Dins Lo Senhor dels Anèls, situat ans aprés, la còta salva plusors còps la vida de Frodo.

Lo pitrau d'Smaug èra cobèrt de gemmas que lo fasián gaireben invulnerable. Mas quora Bilbon l'encontrèt dins sa tuta, trobèt una partida sens cobrir al pitrau esquèrre. Quand Bilbon parlèt d'aquò a sos collègas nans foguèt ausit per un còrb qu'o expliquèt a Bard l'Arquièr d'Esgaroth. Quand Smaug ataquèt la vila, Bard lancèt una sageta al ponch descobèrt del dragon e l'auciguèt.

Aprés la mòrt del dragon, Thorin e sos amics demandèron lo tresaur. Aquò creèt un problèma entre Brad e lo rei elf Thrànduil del Bòsc Lugubre, que volián una partida del tresaur coma compensacion per los dans que los dragons avián provocat dins lors reialmes pendent d'annadas. Thorin volguèt pas partejar lo tresaur e declarèt, la guèrra a ambedos. Fin finala, i aguèt pas cap lucha dirècta pr'amor qu'arribèt una autra armada de goblins e wargs que tamben ne volián l'aur, e tot finiguèt en la Batalha de las Cinc Armadas.